Благослови, душа моя!.. Псалмы русских поэтов

Блажен муж, иже во злых совет не вхождаше,
ниже на пути грешных человек стояше,
ниже на седалищех восхоте седети
тех, иже не желают блага разумети.
Но в законе Господни волю полагает,
тому днем и нощию себе поучает.
Будет бо яко древо, при водах сажденно,
еже дает во время си плод свой неизменно.
Лист его не отпадает, и все, еже деет,
по желанию сердца онаго успеет.
Не тако нечестивый, ибо исчезает
яко прах, его же ветр с земли развевает.
Тем же нечестивии не имут востати
на суд, ниже грешницы в совет правых стати.
Весть бо Господь путь правых, тыя защищает,
путь паки нечестивых в конец погубляет.

Псалом 18

Славу Божию небо поведает,
твердь руку Его дело возвещает.
День глагол славы дневи отрыгает,
нощь нощи разум Божий извещает.
Не суть языцы, им же не слышати
гласа их, что Бог вся весть управляти.
Изыде в мир весь онех вещание
и в концы земли их глаголание.
В солнце положи свое селение,
его же светло есть исхождение.
Яко жених з чертога исходит,
весело, точне и оно восходит.
Яко исполин радостно путь деет,
от края небес исход его спеет.
Запад на ином краи содевает,
от зноя его никто ся скрывает.
Чист закон Божий, души обращающ,
и глагол верен, дети умудряющ.
Оправдания Господня правдива,
веселящая сердца незлобива.
Заповедь светла очи просвещает,
страх Его чист есть, вечно пребывает.
Судбы Господни верны, оправданны,
паче чистаго злата суть избранны.
Паче камене честна многа драги
и паче сота медвеннаго благи.
Тем же я раб Твой тщится соблюдати,
дабы сохранну мзду многу прияти.
Обаче грехи кто уразумеет,
никто их кроме быти доумеет.
От тайных, Боже, изволь очистити,
и от чуждих мя раба си щадити.
Аще аз от тех не одолен буду,
кроме порока в то время пребуду
и от велика греха очищуся,
достоин жизни вечныя являюся.
Тогда уст моих слово возлюбиши,
на мысли сердца моего призриши,
Господи Боже, мой пособителю
и от всяческих бед избавителю.

Псалом 22

От Господа аз пасуся,
лишения не боюся:
в месте злачне мя вселяет,
у покойных вод питает.
Душу мою обратил есть,
на путь правый наставил есть,
за имя Си пресвятое,
содевает благо тое.
Аще смерти приближуся,
зла от нея не боюся:
яко Ты сам при мне еси,
Боже живый на небеси.
Жезл Твой мене утешает,
и палица защищает.
Ты трапезу пред очима
в лице врагов дал моима.
Маслом главу мастил мою
и дал еси чашу Твою:
яже дивне упояет,
радость в сердце содевает.
Милость Твоя мне прибудет,
дондеже жив раб Твой будет:
да в Господень дом вселюся,
в долготу дний веселюся.

Псалом 24