Духовная культура средневековой Руси

О сем бо златоглаголивый Иоанн глаголет в толковании своем: «яко вся си заповеди менши есть любви, но подручны суть ей». Господь бо о всех заповедех воспросив, таже глагола ему: возлюбиши искренняго своего, яко сам себе. Он же отвеща: вся си сохраних еще от юности. Се убо слово ложь глаголя, яко аще бы любил искренняго своего, яко сам себе, не бы убо был богат, много бо искренних в низщете, и аще бы их любил яко себе, убо раздаял бы им все богатество и был бы с ними равен в низщете. Сего бо ради Господь изъявляя неисправленное слово Его рече: аще хощеши совершен быти, иди и продажд имение свое и даждь нищим. Он же сего ради оскорбе, яко не любляше тем отдати своего богатества, их же рек любляше яко себе. Се убо он изъяви, еже не тако любляше искренняго яко себе. Сего ради рече Господь: яко неудобь богатый внидет во царство небесное. О таковых бо и Ияков брат л. 182 об. Господень по плоти пиша глаголет: «Богатии плачитесь рыдающе // о страстех ваших грядущих на вы, богатество ваше изгни и ризы ваша молиа поядоша, злато ваше и срёбро изржаве и ржа их в послушество вам будет»[811]. Мы же сих ради речем, о добрая нищета, ею же Христос Бог наш волею обнища, показуя нам нелицемернаго смиренна образ, им ' же возводимся к Нему во царство горняго Иерусалима. Яко же Сам Господь ко Отцу молясь о ученицех рече: «не о сих молю токмо, но и о верующих словесе их ради в Мя, да вси едино суть, яко же ты Отче во Мне и Аз в Тебе да и Ти в нас едино будут»[812]. И паки рече Господь: «Отче, их же дал еси Мне, хощу, да идеже есми Аз и Ти будут со Мною, да видят славу Мою, юже дал еси Мне, яко возлюбил Мя еси преже сложениа мира. Отче праведный, мир Тебе не позна, Аз же Тя познах и сии познаша, яко Ты мя посла. И сказах им имя Твое и скажу да любы, ею же Мя еси возлюбил, в них будет и Аз в них»[813]. О сем же глаголет и возлюбленный Господом богословный Иоанн в послании своем:

л. 183 // «Не любяи брата своего во тме есть»[814]. И паки рече: «да любим друг друга, не яко же Каин от неприязни бе и закла брата своего. И за кую вину закла его? Яко дела его лукава быша, брата же его праведна»[815].

Сего бо ради великий богослов сию притчю написа, понеже мнози и до ныне зависти ради о делех друг друга снедают. Понеже сих множайши, елицы возлюбиша неправду, елицы же обретаются живущии по Бозе, сих вмале. Посему убо противу неправде ополчатись не могут и снедаеми сут завистию. И паки же великий богослов рече: миже бо аще имат житие мира сего и видит брата своего требующа и затворит утробу свою от него, како Божиа любы пребывает в сем. Чадца моя, не любим словом и языком, но делом и истинною»[816]. О сем же Ияков брат Господень по плоти рече: «аще брат или сестра нага будета и лишена будета дневныя пища, речет же има кто от вас, идита с миром, грейтася и насыщайтася л. 183 об. и не даст же има требование // телесное, кая полза»[817]. И паки же богословный Иоанн глаголет: «яко любы от Бога есть и всяк любяй от Бога рожен есть и разуме Бога, а не любяй не разуме Бога, яко Бог любы есть. О сем явися любы Божиа в нас, яко Сына Своего единородного посла Бог в мир, да живем о нем. О сем есть любы, не яко мы возлюбихом Бога, но яко той возлюби нас и посла Сына Своего оцыщение о гресех наших. Возлюбленнии, аще сице возлюби нас Бог и мы должны есмы друг друга любити. Бога никто же нище не виде. Аще любим друг друга, Бог в нас пребывает и любы Его совершенна есть в нас. О сем разумеем, яко в Нем пребываем, и той в нас»[818]. Се бо рече богословный, яко аще заповедь Господню соблюдем, юже Господь положи нам, яко сам любляше и Его возлюбленна заповеди, еже от Него изшедшая, в нас пребывают, се Сам Бог в нас пребывает и мы пребывающе в повелении Его се в Нем пребываем. И паки богослов рече: л. 184 «И мы познахом и веровахом любовь, // еже имат Бог в нас. Бог любы есть и пребываяй в любви, в Бозе пребывает и Бог в нем пребывает»[819]. И паки рече: «Мы любим Бога, яко той первие возлюби нас»[820]. Се бо изявляше богословный, яко любовь есть безначялна Отца и Сына и Святого Духа. Яко бо сего ради Бог сотвори человека по образу Своему и по подобию, яко хотяши любити и, любя же человеки сниде с небес и одеяся человеческою плотию, и умертвися за человеки плотию, дая образ любве человеком. Паки же богословный глаголя: «аще кто речет, яко любя Бога, а брата своего ненавижу — ложь есть, ибо не любяй брата своего, его же виде, Бога, его же не виде, како может любити. Сию заповедь имамы от него: «да любяй Бога, любит брата своего»[821]. «Всяк веруяй, яко Исус есть Сын Божий, от Бога рожен есть, и всяк любяй рожешаго любит и роженнаго от Него. О сем разумеем, яко любим чяда Божия, еща Бога любим и заповеди Его соблюдаем»[822]. Се бо богословный, похваляя любовь, блажит творящих ю. Еже рече: «веруяй