Избранные сочинения

Во градѣ превелицѣ нѣкто царствоваше,
многими земли, страны славно обладаше.
Ему же даде господь супругу благую,
благочестным житием доброцвѣтущую.
5 Той умыслил святая мѣста посѣтити,
идѣже страда Христос поклон сотворити;
Восприем убо путь свой, странствие творяше,
а супруга во градѣ царственном осташе.
При ней же и брат царский, юный тѣлом, был есть,
10 иже не мало время доброчинно жил есть.
Елма же прият возраст, нача свѣрѣпѣти
и на красная лица женская смотрѣти,
А зане же царица зѣло красна бяше,
очы своя на ону часто обращаше,
15 И нача безвременно к онѣй приходити,
таже не убояся мысли си открити,
Что любовию ея велми палим бяше
и плотска сожития с оною желаше.
Царица удивлшися безстудствию его,
20 не яви лица ему весело своего.
И яла есть к чистотѣ словом увѣщати,
да бы не мыслил братня ложа оскверняти.
Он, посрамлен тогда быв, печален явися
и воздержен на нѣко время сотворися.
25 Но демону палящу паки его тѣло,
еще дерзнул к царицѣ приступити смѣло
И о нечистом дѣлѣ точнѣ глаголати, —
даже не зна царица, что с ним содѣяти.
Рече убо оному: „Имам на пирг ити,
30 во еже бы ся нѣчто тамо утѣшити;
Ты мене аще тамо един предвариши,
желаемое дѣло удобь получиши“.
Он с радостию иде и на пирг возшел есть,
ожидая царицы, на долзѣ сѣдѣл есть.
35 Она в той час лѣствицу велѣла отъяти,
да бы не ктому дерзал словом ей стужати.
Пристави же два раба оному служити
и двѣ дѣвѣ нуждная по вся дни носити,
Яже свыше вервием он к себѣ влачаше
40 и сосуды вниз тѣм же вервием спущаше.
Тако сѣдѣ цѣлое лѣто и другое,
даже царь возвратися во царствие свое.
Ему же близ пришедшу, царица мыслила,
да бы честь достойную царю сотворила.
45 Грады, веси и пути строити веляше,
сама во стрѣтение царское идяше
С боляры и велможи. Но и заключенна
царска брата содѣя тогда свобожденна, —
Иже предварь царицу ко царю течаше,
50 цѣлование ему достойное даше.
Царь, видя брата блѣда и во долгих власѣх,
непщева, яко болен бяше в многих часѣх;
Ят его о здравии плоти вопрошати,
худости и влас долгих хотѣ вину знати.
55 А зане же брат с царем на единѣ бяше,
на честную царицу клеветы вѣщаше,
Глаголя: „Яко жена не есть вѣрна тебѣ,
многи прелюбодѣи собрала есть себѣ;
С ними же ложе твое выну оскверняше
60 и мене на зло дѣло часто увѣщаше.
Но бояся аз бога, не хотѣх пребыти,
аще бы ми от нея и убиту быти.
Она, яко по воли мене не имяше,
на пирзѣ мене гладом и хладом томяше“
65 Царь, услышав глаголы, вѣру брату ял есть,
царицу погубити во ум себѣ взял есть, —
Яже о бѣдѣ своей ни от части знаше,
во стрѣтение царю радостно идяше.
И пришедши смиренно ему поклонися,
70 лобзание подати царю приближися, —
Иже, гнѣвом палимый, ону похитил есть
за власы и о землю люто ударил есть; —
Яже ели живая на земли лежаше,
ничто слыша слов мужа, ничто глаголаше.
75 И он в ярости блудом ону обвинил есть
и смертию казнити абие судил есть.
Призвав же рабы своя, велѣ восхитити
жену на колесницу, скоро овозити
В далекочюжду страну и смерти предати,
80 во еже бы никому о ней вѣсти взяти.
Раби царское слово дѣлом сотвориша,
вземше на колесницу, ону возложиша
И в далеку пустыню, бѣдну, отвезоша;
в ню же по мнозѣх дниех егда приидоша,
85 Зашедше во глубину, хотѣша убити,
но сердца жену красну начаша любити;
Первие убо ону блудити хотѣша,
потом же погубити волю си имѣша.
И елма яша ону к земли полагати,
90 она к господу яла слезы источати,
Просящи пособия, да не оживится,
но точию от злых раб да не осквернится.
Егда же паки ону нудиша лежати,
она гласом велиим яла есть кричати.
95 В то время нѣкто силный близу пут течаше
и вопль сущий в пустыни во уши прияше.
Притек с людми, обрѣте борющуся жену
со скверными рабами, но не одоленну;
Мня разбойники быти, оны погубил есть,
100 а благочестну жену скверны свободил есть.
И зря благообразну, нача вопрошати,
да бы о случаи си хотѣла сказати.
Она достоинство си пред ним утаила,
да приимет во рабу прилѣжно просила:
105 Токмо да не понудит в чистотѣ страдати,
а она вѣрно во всем хотѣ работати.
Велможа, видѣв бѣду, то ей обѣщал есть —
не прикоснутися ей — и с собою взял есть.
Пришед же в дом свой, женѣ по чину сказаше,
110 яко ту жену честну во рабу си взяше;
Жена, зрящи лѣпоту ея, удивися,
благонравию паче того почюдися.
Егда же дни доволны вѣрно им служаше,
божиим пособием всѣм любима бяше.
115 Князь убо со женою сына ей вручиста,
да наставляет его яко вѣсть, просиста;
Она того младенца тощно пѣствоваше,
здравие его паче своего храняше.
И о санѣ ни слова своем извѣстила,
120 но елико можаше в тайнѣ сохранила.
Присно же ко господу молбы возсылаше,
во бдѣнии и постѣ мнозѣ пребываше;
Ему же враг завидѣв, хотѣ спону дати,
да бы ю в супружество кому-либо взяти.
125 В то время в дворѣ князя брат его живяше,
иже воинску службу храбро совершаше.
Тому демон во сердце любовь к ней вложил есть,
иже ю в супружество прилѣжно просил есть;
Она всѣми образы ему отрицаше,
130 яко в чистотѣ жити имать, глаголаше.
Брат княжий разгнѣвався ял есть промышляти,
како бы отмщение женѣ той отдати.
Во едину убо нощь, егда утрудися
жена и с отрочатем спати положися,
135 Он во первосоние отрока заклал есть,
а ей спящей во руку нож держати дал есть.
Бѣдная, не знающи, что враг ей содѣя,
возбнувши, познала нож у руки своея;
Потом кровь отрочате многу ощутила,
140 страшным гласом абие мног вопл сотворила.
Тогда со свѣщами к ней мнози притекоша,
отрока закланнаго при ней обрѣтоша
И нож, во руцѣ ея держимый, узрѣша, —
ону заклавшу быти вси согласно рѣша.
145 Родители со страхом ту же прибѣгоша,
от жалости о сынѣ едва не умроша.
И враг, брат княжий, ту же абие явися,
аки не знаяй дѣло, на жену ярися:
Всяких мук достойную осуждая быти
150 и не престаше брата к тому приводити.
Но господь сердце его кротко сотворил есть,
о женѣ того дѣла никако мыслил есть;
Аггел божий во сердце его полагаше,
яко онаго врага то зло дѣло бяше.
155 Тѣмже не хотѣ жены на муки отдати,
точию умысли ю за море изгнати;
К корабленником убо слезную послал есть,
в чюждых ю оставити странах приказал есть.
Они, приемше жену, за море плаваху,
160 а зряще жену красну похотми горяху;
Наченше ей безстудно о том глаголати,
да бы ся не отрекла с ними пребывати.
Она, яко глас змиин, сей от них слышаше,
всячески неистовым себе защищаше;
165 Яша убо лютии плачущей претити,
яко, аще не ляжет, имут утопити.
Она рече: „Убийте или утопите,
точию плоти грѣшнѣй скверны не творите!“.
Сквернии, елма ничто успѣти могоша,
170 на пустый остров нѣкий ону извергоша.
По нем же она хождши зѣло утрудися,
хладна сущи и гладна, спати положися.
Елма же уснула есть по молитвѣ мнозѣ,
с упованием цѣлым о господѣ бозѣ,
175 Тогда мати божия спящей ей явися,
ея же, яко солнце, лице просвѣтися,
И рече ей: „О, жено, много ты страдала,
да бы супружескую чистоту сдержала.
Отселѣ не имаши искусов прияти,
180 бог ти имать от всѣх враг свободу подати;
Обида и невинность твоя проявится,
а злокознство врагов ти свѣтло обличится.
Собери токмо траву, яже под главою,
прокаженных будеши исцѣляти тою;
185 Тѣм художеством имать бог тя прославити
и пред лицем мужа ти здраву поставити“.
Возбудившися она, зѣло рада бяше,
с молитвою слезною траву собираше.
И рукава оною своя исполнила,
190 потом, во корабль вшедши, чинно усушила, —
Ибо в третий час на день корабль приближися,
правлением божиим к онѣй устроися;
Она корабленники яла есть просити,
да бы ю изволили в корабль свой впустити;
195 Они, видяще жену честну, сотвориша
милость с нею и в корабль, да плывет, впустиша.
Преплывши убо море, в град нѣкий вступила,
прокаженна травою тамо исцѣлила,
Потом и ины многи тою исцѣляше,
200 мало ея во винѣ пити подаяше.
Слава о ней велика вездѣ разширися,
даже и князю тому слышати случися,
Его же брат отрока при онѣй заклаше, —
той же враг проказою в то время боляше.
205 Хотя убо князь брата того исцѣлити,
посла рабы ту жену к себѣ умолити,
Яже по многих молбах в град его идяше
и в дом вниде, но никто оныя познаше.
Прием ю князь, начал есть прилѣжно просити,
210 да бы хотѣла брата его исцѣлити.
Она, богом правима, сице глаголаше:
„Исцѣления дѣло нѣсть то сила наша;
Бог врачь есть всемогущий, убо того требѣ,
да грѣхи своя скажет брат твой при мнѣ тебѣ
215 И при седми послусѣх, тогда исцѣлѣет;
без того врачба моя силы не имѣет“.
Князь брату слово ея скоро извѣстил есть,
а на исповѣдь его едва увѣстил есть.
Собравшымся убо всѣм, грѣхи сказоваше
220 многи, а о убийствѣ сына не сказаше.
Цѣлителница рече: „Вижду тя таити
грѣх нѣкий, того ради не могу цѣлити“.
Князь брата всеприлѣжно нача увѣщати,
да бы, ничтоже тая, потщался сказати.
225 Видя же, яко болный страхом держим бяше,
аще бы нань смерть мыслил, сказати веляше,
С клятвою обѣт дѣя, что имать простити,
о отмщении злобы никогда мыслити.
Тогда, вѣру ем, болный нача воздыхати
230 и многия из очес слезы изливати;
С покаянием сердца грѣх свой изъявил есть,
яко он княжа сына иногда убил есть,
Отмщая кормилицѣ, юже он любяше,
а она в супружество с онѣм не идяше.
235 Сей глагол князь услышав зѣло умилися,
изгнания честныя жены прослѣзися;
Жаль бѣ сына умерша, но одолѣваше
жаль, яко невинную жену он изгнаше.
Поплакав же час нѣкий, просил есть от жены,
240 да бы брат, еще и враг, был уисцѣленны.
Она по обычаю вином напоила
с травою и абие цѣлбу сотворила.
Вси возрадовавшеся, жену ту блажиша,
но о изгнаннѣй женѣ умилно тужиша.
245 Она же им рекла есть: „Печаль отложите!
Аз изгнанная вами, — бога похвалите,
Яко чрез мене, грѣшну, цѣлбу сотворил есть,
здраву мя на ту вашу нужду возвратил есть“.
Князь со женою слышав зѣло веселися,
250 да с нима пребывает, прилежно молися;
Многая ей богатства радостно даяху,
исцѣленному, да есть супруга, прошаху.
Но она рече: „Нѣсть лѣть того ми творити,
еще бо ми далече подобает ити“.
255 И почивши ту нѣчто, в путь свой запустися,
от князя же ей почесть многа сотворися;
Даров от них прияти никаких хотяше,
но цѣлѣнием болных в пути ся питаше.
И прииде во град свой, в нем же обитала,
260 но яко бѣ царица, никому сказала.
И тамо убо болных премного цѣляше,
даже глас ушес царских о ней дохождаше..
А в то время брат оный, ю оклеветавый,
близ смерти проказою бѣ изнемогавый.
265 Посла убо царь скоро жену пригласити,
да бы брата недуга того свободити.
Цѣлѣбница пришедши недуга смотряше
и о исцѣлѣнии надежду творяше,
Аще токмо изволит вся грѣхи явити
270 пред царем, яже ему случися творити,
Пред архиереем же и пред всѣм сигклитом,
и не тяжка бысть царю тѣм она совѣтом.
Царь убо рече брату вся грѣхи сказати,
нимало и о смертных страха содержати.
275 Собранным убо бывшым, грѣхи сказоваше,
но иже о царицѣ во сердцѣ держаше.
Цѣлѣбница рекла есть: „Нѣчто ты таиши,
от моего врачевства цѣлбы не влучиши“.
Царь прилѣжно ят брата о сем увѣщати,
280 да бы не боялся всѣх грѣхов си сказати.
Тогда он рече, слезы из очес пущая:
„Оле, беззакония моя суть тяжкая!
Аз невинну царицу разлучих с тобою, —
о царю! — яко она не пребысть со мною.
285 Аз, окаянный, ону умышлях прелстити,
а она никакоже хотѣ блуд творити;
Моею клеветою она погубленна, —
се великая злоба моя всѣм явленна“.
Царь услышав ят себе за власы терзати,
290 по лицу бити, „увы, увы!“ глаголати:
„Како аз без вопроса дерзнух осудити,
тако чистую жену живота лишити!
О, горе мнѣ, бѣдному! Имам отвѣт дати,
от царя небеснаго казнь люту прияти“.
295 Сицевая прогласив, к брату обратися,
о грѣсѣ и болѣзни его умилися.
И плакався доволно к цѣлящей вѣщаше:
„Потщися исцѣлити, — се брат вся сказаше“.
Она дала есть траву ему с вином пити,
300 и абие в здравие нача приходити.
И помалѣ времени весь здрав сотворися,
о нем же царь с боляры радостен явися.
Но слезы радость его полма преплетаху,
о невинной царицѣ из очес течаху, —
306 Что и боляре зряще умилно сѣдѣша,
о той же во печали превелицѣ бѣша.
То видящи царица слез не удержаше,
но яко струи воды из очес точаше.
Егда же вины тѣх слез от нея прошаху,
310 от словес ю царицу бывшую познаху,
Поряду бо вся сказа, яже с нею быша.
Царь, егда ты глаголы от нея услыша,
Нападе ей на выю, нача лобызати,
прощения за грѣх свой, иже к ней, желати.
315 И в веселии мнозѣ хотѣ ю пояти
с собою, яко прежде с нею обитати;
Царь во супругу ону себѣ приимаше,
сигклит ю за царицу имѣти хотяше.
Но она ко епископу слово обратила:
320 „Вѣждь, отче, яко обѣт в скорбѣх сотворила,
Еже не ктому мужа до кончины знати,
но в иночестем чинѣ богу работати.
Аще убо обѣт сей ты мой разрѣшиши,
аз не буду виновна, ты же да узриши:
325 Бог истяжет от тебе за мене отвѣта,
за зло преступление моего обѣта;
Аще ся человѣком угоден явиши,
всяко разрѣшением бога огорчиши“.
То слышав, архиерей обѣт утвердил есть,
330 иноческия ризы на ню возложил есть.
И тако до конца си богу работаше,
его же пособием сохраненна бяше
От скверны и от смерти, — купно матерь бога
Марию прославляше за благая многа,
335 Яже ей в бѣдѣ бывшей матерски явила,
егда траву сказавши цѣлбы научила.
О, жены предоблия! Коль много терпяше
чистоты ради! — а бог ону соблюдаше.
Тако всѣм женам требѣ доблественным быти
340 и во нуждах чистоту не вредну хранити,
Паче нестерпимую смерть себѣ избрати,
неже осквернению плоть свою предати.