Хрестоматия по истории СССР. Том 1

Се яз князь велики Иван Васильевич всея Руси пожаловал есми своих людей белозерцов, горожан и становых людей и волостных всех белозерцов: кто наших наместников у них ни будет, и они ходят по сей по нашей грамоте. Взоежжого корму горожане и становые люди наместником нашим на взоезд что кто принесет, то им взяти: на Рожество христово наместником нашим дадут корм со всех сох[107] со княжих, и с боярьских, и с монастырьских, и с черных, и с грамотников, и со всех без оменки², с сохи за полоть³ мяса два алтына, за десятеро хлебов десять денег, за бочку овса десять денег, за воз сена два алтына; а на Петров день дадут корм наместником нашим, со всех же сох, с сохи за боран восмь денег, за десятеро хлебов десять денег. А тиуном корм рожественской и петровьской вполы наместнича корму. А доводчиком ⁴ побор, со всех же сох, с сохи на Рожество христово за ковригу денга, за часть мяса денга, за зобню⁵ овса две денги; а на Петров день доводчиком побор, со всех же сох, за ковригу денга, за сыр денга. А наместником нашим у них держати в городе и во станех два тиуна да десять доводчиков, во станех восмь доводчиков, а два в городе; а станы и деревни своим доводчиком поделять. А доводчику ездити во стану без паробка и без простые лошади своего деля ⁶ прибытка; а побора им в стану и не брати, имать им свой побор у соцкого в городе; а доводчику из своего розделу в другой роздел не ездити; а где доводчик ночует, туто ему не обедати, а где обедает, туто ему не ночевати. А наместники тиунов и доводчиков до году не переменяют. А кормы наместничьи и тиуновы и довод-чиковы поборы берут в станех сотцкие да платят наместником и тиуном и доводчиком в городе: о Рожестве христове рожественской корм платят и наместником и тиуном и доводчиковы поборы, а о Петрове дни петровьский корм платят в городе и наместником и тиуном и доводчиковы поборы. А пошлин наместником на Белеозере в городе: явка⁷ с гостей, кои гости приходят из Московские земли, из Тверские, из Ново-городские земли, или откуды кто ни приедет, с болшаго судна с ватамана гривна, а людей на судне сколко ни будет, ино с головы по денге; а кто приедет в малых судех в гребных на Бело-озеро из Московские земли, или из Новгородские, ино с ватамана и с людей, колко их на судне ни будет, ино с головы по денге. А на Волочке на Словенском наместником держать своих пошлинников, а явку емлют с гостей по тому же: кто придет из Московские земли, из Тверские, из Новогородские земли, и с Устюга, и с Вологды, ино с болшого судна с ватамана гривна, а с людей, сколко их на судне ни будет, ино с головы по денге; а в малом судне в гребном кто приедет, ино с ватамана и с людей, колко их ни будет на судне, ино с головы по денге. А который гость заплатит пошлину на Волочке, а на том другие пошлины на Белеозере не емлют. А кто придет из Московские земли, из Тверские, из Новогородские земли, изо всех монастырей Московские земли, и Тверские и Новогородские земли, и с белозерьскых монастырей, из Кирилова, из Фарафонтиева, изо всех белозерьскых монастырей, торговати им всем на Белеозере в городе житом и всяким товаром; а за озеро им всем торговати не ездити. А по волостем и по монастырем не торговати житом и всяким товаром, опрочь одное волости Углы; а на Угле быти торгу по старине. А кого изымают, кто поедет за озеро, или кто учнет торговати по волостем и по монастырем белозерьским, и они с купца возмут два рубля, рубль наместником, а рубль таможни-ком; а с продавца возмут два же рубля, рубль наместником, а рубль таможником; а что у них будет товару, у купца и у продавца, и тот товар у них емлют таможники на великого князя, а их дают на поруце наместники и таможники да ставят перед великим князем. А городьским людем белозерьским посажаном за озеро ездити и торговати по старине…

А учинится у них в городе душегубьство, а не доищутся душегубьца, ино вины четыре рубли заплатят горожаня; а учинится душегубьство в коем стану или в коей волости, а не доищутся душегубца, и они вины четыре рубли заплатят в стану или волости, в коей душегубьство учинилося; а доищутся душегубца, и они его дадут наместником или их тиуном, а хре-стьаном в том продажи нет…

А кто дасть дочерь за мужь, из города в волость, или из волости в город, или из волости в волость, и он дасть за выводную куницю алтын; а кто дасть дочерь за мужь за рубеж, в Мо-сковьскую землю или Ноугородскую, и он дасть за выводную куницю два алтына; а в городе и во стану и в волости в одной, ино свадебного за убрус⁸ две денги, а десятнику владычню знамени три денги…