Хрестоматия по истории СССР. Том 1

Того же месяца в восьмой день, в четверток, на первом часу дни, начаше бити из наряду по граду из троих туров из двадцати пищалей, и бише беспрестанно весь день до ночи, тако же и на утрие биша беспрестанно по городу из наряду, и выбиша города городовые стены да Покровскую башню всюду земли до Свиной² башни половину земли збиша, да местами стены городовые збиша… и городовую стену во многих местех испроломаша. И сие к королю своему возвестиша. Он же велми о сем радостен бысть. И повеле своим гетманам и рохмистом³ со своими гайдуки и всем воинским людям у себя на радости быти. Сим же всем к королю сшедшися. Тогда же литовский король Степан, сед на своем горделивом месте королевском, гетманы же своя и великие паны и вся воя первосоветники и всех рохмисты и все воинские люди и градоемцы, и гайдуки на обед к себе всех созвал. По обеде же всем город Псков взяти повеле. Они же радостно и похвально сшедшися к королю совершенно и похвально сказоваша: «Яко тепери, государю, королю милостивый, ласкою обедаеве и пируеве в обозе у тебе. Сего же дни, государю, в замце во Пскове вечеревати у тебе требуеве, с великим и прекрасным градом Псковом». Король же сие слыша, всех гетманов и ротмистов и всех воинских людей и на обеде у себя великим учрежением учреди и друголюбие и молебие о градоемстве конечное безотступно сладко условествоваше, и великими обеты всем воинским людям милость свою и ласку показати обещавшеся, и все богатство псковское и весь плен и корысть беззавистно с ними по чину разделите ска-зоваше. Они же противу ему отвещеваше, яко государю совершение сего дни замок Псков за щитом возмем, или, государь сами твоему имени покорятся; не возмогут противу твоея бесчисленные силы и мудрых градоемцев отстоятися. Такоже и своим паньям из замка Пскова радостно и с корыстью себе стретяти веляше. И толико литовский король Степан гетманов своих и ротмистов, всех градоемцев отпущает Псков взяти… Государевы же бояре и воеводы и все воинские люди и псковичи, увидевши из станов из королевских великие многие полки и с знаменами к городу идяше, и все борозды⁴ утеснене наполняшеся литовских гайдуков, уразумеша же, яко градоимством напроломныя места идущим, в осадный колокол звонити веляше, в среднем городе на стены градовной у великого Василия на горке, весть дающе литовскаго к городу приступа всему псковскому народному множеству. Сами же государевы бояре и воеводы со всеми воинскими людми, коим приказано в том месте быти, все наготове стояще. И изо многа наряду по полком стреляте веляще. Из наряду же по полком безпрестан стреляющимся, многие же полки побивающе. Они же напорне и дерзостне, яко вода многая к городу лияшеся. Страшилищами же своими, яко волнами морскими страшающе. Саблями же своими, яко молниями бесчисленными на город сверкающе. И у живоначалной Троицы в соборной церкви освященной собор⁵ с плачем и слезами и с воплем многие молебны совершающе, о избавлении града бога моляще. Псковские же народы з женами и з детьми простившеся, на проломное место все збежавшеся, и крепко на враг и на бой уготовившися и всем сердцем богу обещавшеся за христову веру и безвыдачно друг з другом умрети за Псков град, и за свою домы, и за жоны, и дети, и сим же тако бывающим. Того же дни яко многа вода возшуме и силный гром возгреме, и все бесчисленное войско воздвижеся на проломное место, на городскую стену и спешне устремишася. Щитами же и оружием своим и ручницами, и бесчисленными копьями, яко кровлею закрывающеся. Государевы же бояре и воеводы со всем войском… на стене с ними крепко сразившеся. Литовская же бесчисленная сила на градную стену, яко вода лиющеся. Християнское же множество войска яко звезды небесные противу крепящеся, восходу на стены не дающе и бе яко гром велик и шум мног и крик несказанен от множества обоего войска и от пушечного стуку и от ручного обеих стреляния и от воинского крика, Псковскому же войску восходу на градную стену литовскому войску не дающе. Оному же беззаконному войску крепко и дерзостно на стены лезущу в пролом же и восходу во град от литовскаго наряду велику про-биту, и удобь восходну, яко и на конех на градную стену возможно ездити. Защищения же и затулы ни коея нет в тех проломных местех от литовскаго наряду… Того ради литовские многие люди стены града воскочиша. И многие рохмисты и гайдуки и з своими знамены в Покровскую и Свиную башню влезша и из защитов своих и из окон в город по христианскому воинству безчисленно стреляюще. Все же те надежные перво вскочивше на стену лютии литовские градоемцы, железы и бронями же окованы и вооружены бяху.