Хрестоматия по истории СССР. Том1.

Того же лета взяша немци медвежане, юрьевци, вельядци[74] с князем Ярославом Володимеричем город Избореск². И прииде весть в Псков, яко взяша немцы Избореск, и выиде противу им весь град, и сътвориша с ними брань, и бишася с ними крепко, и бысть сечя межи ими велика. Ту же убиша Гаврила Гориславичя воеводу, и погониша псковичь, и много их гонячи били, а иных руками яша, и пригонивше под город зажгоша посад весь, и много зла бысть, погореша бо и церкви многы и святыя иконы в них и вся руга церковная; и села пусты сътвориша около Пскова, стояша же под городом неделю, но города не взяша и, полон мног вземше, отъидоша. И тако беша без мира. Бяху бо перевет³ держаще с немци псковичи, подвел их Твердило Иванковичь с инеми, и сам почя владети Псковом с немцами, воюя села Новогородцкая, и инии псковичи вбегоша в Новъгород и з женами и з детми. Toe же зимы паки приидоша от западныя страны немцы и чюдь на Водь⁴ и повоеваша все, и дань на них възложиша, и срубиша город в Копорьи в погосте, в отчьстве великаго князя Александра. Но не то бысть зло, но и Бесово взяша и гонишася за 30 верст до Новагорода, гость бьючи, и семо и до Лугы, и до Сабля. А великий князь Александр отъеха тогда в землю Суздальскую, в Переяславль град, с материю и с княгинею и с двором своим, роспревъся с новогородци. Новогородци же с челобитьем послаша к великому князю Ярославу Всеволодичю, просяще у него сына себе и вдасть им сына своего князя Андрея. Новогородци же здумавше и послаша владыку⁵ Спиридона с бояры опять к великому князю с челобитьем, просяще собе сына его великаго князя Александра. А в то время на волость на Новогородцкую наидоша литва, немци и чюдь, и поимаша по Лугы⁶ кони все и скот, не на чем бе и орати по селом. Князь же великий Ярослав, приим моление владычне и новгородцев чедобитие, вдасть им опять сына своего Александра.

В лето 6750 прииде великий князь Александр Ярославичь в Новъгород и изыде въскоре с новогородци и с ладожаны, и с корелою и с ижеряны на град Копорью⁷ и изверже град из основаниа, а самих немець изби, а иных с собою приведе в Новъгород, а иных пожалова отпусти, бе бо милостив паче меры, а вожан и чюдцу переветников извеша и иде в Переславль. Събраша же ся немци с сея стороны в зимнее время и приидоша на Псков, и полкы псковскиа победиша, и наместников своих посадиша на Пскове. Се же слышав великий князь Александр, и велми оскорбе за кровь христианьскую и не умедьлив нимало, но разгореся духом своим и ревностию по святей Троици и по святей Софеи, и поим с собою брата своего Андрея и вся воя своя, и прииде к Новугороду…

ЛЕДОВОЕ ПОБОИЩЕ

И пойде с братом Андреем и с Новогородци и с Низовци⁸ на Немецкую землю в силе велице, да не хвалятся, рекуще: «укорим Словеньский язык, нежели себе». Уже бо бяшеть взят град Псков, и тиуни их посаждени в граде. Великий же князь Александр зая все пути до Пскова и изгони град, и изъима немци и чюдь и наместники немецкиа, и сковав поточи в Новъгород, а град Псков свободи от плена, а землю Немецкую повоева и пожже, и полона много взя, а иныя изсече. Они же гордии сьвокупишася, рекуще: «Пойдем на Александра и победивше руками имеем его». И егда же приближишася, тогда почюдившеся стражие великаго князя Александра силе немедцкои и ужасошася… Князь же великий Александр помолився в церкви святыя Троица, и пойде на землю Немедцкую, хотя мстити кровь христианскую. Бе бо зима в то время, и якоже бысть на земли их, пусти вся полкы в зажитиа, а Домашь Твердиславичь и Кербет быша в розгоне; и убиша ту Домаша, брата посадничя, мужа добра, и иных много избиша с ним, а иных руками яша, а иные прибегоша к великому князю в полкы. Се же слышав местерь⁹ изыде противу их с всеми бискупы своими, и с всем множьством языка их, власти их, что ни есть на сеи стороне, и с помочью королевою; и снидоша на озеро, глаголемое Чюдское. Великий же князь Александр въспятися назад. Немци же и чюдь поидоша по нем. Князь же великий постави полкы на озере Чюдском на Узмени у Ворониа камени, укрепився силою крестною и ополчився, пойде противу их. На-ступиша же озеро Чюдское; бысть же обоих множество вельми. Бе же ту с Александром и брат его Андреи с множеством вой отца своего и бысть у Александра множество храбрых, сильных и крепкых, и исполнишася вси духа ратнаго, беху же сердца их, акы лвом. Ркоша же: «Княже, се ныне приспе время положити главы свои за тя «…Бе же тогда день суботныи, въсходящу солнцу, и съступишася обои полци. И немци и чюдь пробишася свиньей¹⁰ сквозе полкы. И бысть ту сеча зла и велика немцем и чюди, и бе труск от копий ломлениа, и звук от мечнаго сечениа, якоже озеру помръзшу двигнутися, и не бе видети леду, покры бо ся кровию. Слышах же и се от самовидца, бывшаго тогда тамо…»