Киево-Печерский патерик

Вѣра ихъ зла и законъ ихъ нечистъ есть: во Савелиеву вѣру и въ ины ереси многы въступили суть и всю землю осквернили. Ты же, благовѣрный, самодръжче, блюди себе от нихъ. Ереси бо их сиа суть: прьвое— иконъ не целуют; второе— мощи святыхъ не целуют; третие— крестъ на земли написавши, цѣлуют и въставше, попирают ногами; 4-е— в пост мясо ядят; 5-е— опреснокы служат; 6-е— попове их крьщають въ едино погружение, а мы въ три, мы же мажемь миромь крещающаго и маслом, а они крещающемуся сыплют соль во уста, въ имя же святыхь не наричют, но како взовут родители их, в то имя крещают. Сего ради вѣры латыньскиа бѣгати лѣпо есть, ни обычаа их дръжати, и камканиа их не приимати, и не послушати реченное ими, зане неправо вѣруют, и глаголють, и нечисто живут. Ядят бо съ псы и с кошьками, пиють же свой сець — зло есть и проклято сие — иядят жолвыи, и дикиа кони, и ослы, и удавленину, и медвѣдину, и бобровину. Первыа же недѣли Великагопоста и въ вторник пущаются мяса, мнихы их ядят лой, в суботу же постятся. Христианом же своих дщерий недостоит даати за них, ни поимати у нихь за себе, ни братитись с ними, ни кумитися, ни цѣлованиа с ними имѣти, ни ясти с ними, ни питиизъ единого съсуда. Тѣм же просящимь у вас, дайте им, Бога ради, ясти, но въ их съсудѣх; аще ли небудет в них съсуда, въ своемь дати и потомь, измывше сосуд, молитва дати. А о съгрѣшениих своихне от Бога просят прощениа, но прощають их попове по дару их. Попове же их не женяться законною женою, но съ рабынями блуд творят, и службу дѣють, а грѣха собѣ в том не творять. Бискупи же их дръжат наложници и на войну ходять, перьстень на руцѣ носят. Мертвеци кладут на запад ногами, а главою на въстокъ, и руцѣ по длину полагають, очи, уши же и носъ въском залѣпляють. И женящеися поимают сестреници. И мертвымь тѣломъ служат, яко мертва Господа мняще, мы же службу творимь живымь тѣломь, самого Господа вѣдяще одесную Отца сѣдяща, и паки судити приидет живымь и мертвымъ. Они бо, латина, мертваа, иже мертву службу съдѣвают; мы же, живу Богу жертву чисту и непорочну приносяще, живот вѣчны обрѣсти имамы. Тако бо писано есть: “Въздасть комуждо по дѣлом его”. Брашнаих не приимати, яко многа суть тѣхъ злаа и неправеднаа. Развращенна и погыбелна вѣра их, яже и жидове не творят, то они творят. Множае же в Савелиеву ересь вступили суть, яко всѣх языкъ поганѣйши и злѣйши суть, зане не мощно блюстися ихъ, а поганых мощно. Латина бо и Евангелие, и Апостолъ имеют, и иконы святыа, и в церковь входят, но вѣра их и законъ нечистъ. Множествомь ереси их всю землю онечествоваша, понеже по всей земли варязи суть. Великанужда от них правовѣрнымь христианом, иже мѣжи тѣх живущеи въ единомь мѣсте. А иже кто ублюдется от нихъ, чисту вѣру нося, и пред Богом станеть одесную, радуяся; аще ли самоволиемь приближится к нимь, той с ними станет ошуею, плачася гръко. Нѣсть бо жизни вѣчныа живущимь в вѣре латыньстѣй, или в срачиньстей, или во аръменьстей, ни части имѣти съ святыми в будущий век. Не подобает бо их вѣры хвалити: аще ли кто хвалит ихъ вѣру, таковый обрѣтается свою хуля; или начнет хвалити непрестанно чюждаа вѣры, отреченныа православнаго христианьства, таковый обретается двоивѣрець и близъ ереси есть. Ты же, чадо, таковых дѣаний блюди себе и не присвойся ихъ, но бѣгай тѣх, и свою вѣру непрестанно хвали и, якоже можеши, подвизайся в ней добрыми дѣлы. Милостивъ же буди, христолюбче, не токмо до своихдомочадець, но и до чюжих, и аще види нага, одежди и́, или гладна, или бѣдою одръжима, помилуй и́. Аще ти от которыа вѣры еретикъ или латининъ, всякого помилуй и от бед избави, и мзды от Бога не погрѣшиши; Богъ бо и самь питаетьвсѣхъ, и поганыа якоже хрестианы. Поганым же и иновѣрным всѣмь попечение от Бога, въ будущий же вѣкъ чюжды будут възданиа благых; мы же, живуще въ правъславней вѣрѣ, и здѣ есмы набдимы Господомь, въ будущем же вѣце спасаеми Господемь нашим Иисус Христомь. Аще ли кому по вѣре сей святѣй Бога ради умерети, то дръзновениемь да не остается правыа вѣры, но умреть за Христа, святии бо, рече, за вѣру умроша, да оживут о Христѣ. Ты же, сыну, аще обрящеши иновѣрникы с вѣрными прю дѣюща и прелестию хотяща свѣсти от православныа вѣры правовѣрных, ты же, истинно вѣдый православие, не скрывай в себѣ, но помози правовѣрнымь на зловѣрныа. И аще поможеши, яко добрый пастырь, овца имаши избавити от устъ лвовых; аще ли умлъчиши, то якоотъемь у Христа и предаеши Сатанѣ, слово о них въздаси въ день Судный. И аще ти речет кто: “Сию вѣру и онуБогь далъ”, ты же рци ему: “Ты кто еси, кривовѣрне? Мниши Бога двовѣрна? Не слышиши ли, окаанне и развращенне злою вѣрою, писано бо есть: “Тако глаголеть Господь: единъ Богъ, едина вѣра, едино крещение”. И Господь рече тако: “Лѣпо есть намь исплънити всяку правду”, да сиа вся исплънивъ, и пакы взыде на небеса и ученикы своа пославъ на проповѣдание въ концавселенныа. Тѣм же ты, зловѣрне, толико лѣт дръжавъ православную вѣру, и нынѣ съвратил ся еси на зловѣрие и поучение сатанино. То не слышалъ ли еси апостола Павла, глаголюща, яко аще и нѣции сутьсмущающе вы и хотяще превратитиблаговѣствование Христово, аще и аггелъ, съшед съ небесе, благовѣстит вамь паче, не якоже мы благовѣстихом вамь, да будет проклят. Вы же отринувше проповѣдание апостольское и святыхь отець исправление, приасте неправую вѣру и учение разъвращенно, исполнено погыбели. Того ради от нас отвръжени бысте и отлучении, да того ради намь с вами недостоить житиа приимати и пресвятыхътайнъ обще с вами причастие имѣти или приступити ни вамь к нашей божественей службе: зане многы ереси в вас».