Лекарство от скорби и утешение в унынии. Молитвы и обереги

Господи Боже наш, Едине Благий и Человеколюбче, Едине Святый и на святых почиваяй, Иже верховному Твоему апостолу Петру явивый видением, ничтоже скверно, или нечисто мнети, от Тебе сотворенных на пищу и в наслаждение человеком и сосудом Твоим избранным апостолом Павлом вся чиста чистым заповедавай: Ты Сам, Владыко Пресвятый, призыванием страшнаго Пречистаго Твоего имене, и знамением Честнаго и Животворящаго Креста, благослови и очисти мя, раба Твоего (имя), оскверншагося от всякого неприязненнаго духа, от всякаго мечтания и гада ядовитаго, от всякаго беззакония и от всякия лести, от всякаго потвора и от всякия суеты, от всякаго недуга и всякия язи, и от всякаго противнаго злодейства диаволя. И ныне недостойнаго мене, раба Твоего (имя), сподоби по Твоему милосердию служити пречистым Твоим Таинам. И прежде очисти ми душу и тело от всякия скверны и остави всякое прегрешение, вольное и невольное, еже согреших во вся дни живота моего, делом, словом и помышлением, во дни и в нощи, и до нынешняго часа. И даждь ми, Господи, служение сие страшное небесных чинов, и причастие Пречистых Твоих Таин, не в суд, ни во осуждение, но в прощение грехов, и в Духа Святаго пришествие, и живот присносущныя радости, егоже уготовал еси истинным Твоим служебником. Сохрани мя, Владыко Всесильне, от всякаго греха и злобы, соблюди нескверна и непорочна от всякия проказы противнаго диавола; и даждь ми, Господи, Служити Тебе в преподобии и правде до последнаго дне и часа и скончания моего; Ты бо еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Молитва от осквернения святителя Василия Великого

Многомилостиве, нетленне, нескверне, безгрешне Господи, очисти мя, непотребнаго раба Твоего, от всякия скверны плотския и душевныя, и от невнимания и уныния моего прибывшую ми нечистоту, со инеми всеми беззаконии моими, и яви мя нескверна, Владыко, за благость Христа Твоего, и освяти мя нашествием Пресвятаго Твоего Духа; яко да возбнув от мглы нечистых привидений диавольских, и всякия скверны, сподоблюся чистою совестию отверсти скверныя моя и нечистая уста, и воспевати Всесвятое имя Твое, Отца и Сына и Святаго Духа, ныне и присно и во веки веков. Аминь.

Молитва о заключенных

Господи Иисусе Христе Боже наш, святаго апостола Твоего Петра от уз и темницы без всякаго вреда свободивый, прими, смиренно молим Ти ся, жертву сию милостивно во оставление грехов рабов Твоих (имена), в темницу всажденных, и молитвам их, яко Человеколюбец, всесильною Твоею десницею от всякаго злаго обстояния избави и на свободу изведи. Аминь.

Молитва о доме, в коем поселился злой дух

Господи Боже спасения нашего, Сыне Бога Живаго, на херувимех носимый, превыше сый всякаго начала и власти, и силы, и господства, Ты еси велий и страшный над всеми сущими окрест Тебе, Ты еси сотворивый землю в крепости Твоей, и исправивый вселенную в премудрости Твоей, трясый поднебесную от оснований, столпы же ея неподвижны, глаголяй солнцу, и не возсияет, звезды же запечатлеяй, запрещаяй морю, и изсушай е, егоже ярость тает начала и власти, и камение сотрошася от Тебе. Врата медная стерл еси, и вереи железныя сломил еси, крепкаго связал еси, и сосуды его раздрал еси, мучителя крестом Твоим низложил еси, и змиа удицею вочеловечения Твоего привлекл еси, и узами мрака в тартаре посадив, связал еси. Сам убо, Господи, отжени и в бегство претвори всякое диавольское действо, и всякое сатанинское нахождение, всякий навет сопротивныя и належащия силы от крова сего, и от одержимых от него, и от обходящих под ним; вся сущия во дому сем сохрани, избавляя их от страха нощнаго, и стрелы летящия во дни, от вещи, во тьме преходящия, от сряща и демона полуденнаго. Яко Ты еси Боже утверждение мое, крепкий обладатель, князь мира, Отец будущаго века, и Царство Твое, Царство Вечное, Тебе Единаго есть царство и сила и слава, со Отцем и Святым Духом, ныне и присно и во веки веков. Аминь.

Молитва об избавлении от труса (землетрясения)