Минея праздничная

Сла́ва, и ны́не,Богоро́дичен: Пречи́стая Де́во Богоро́дице, / поми́луй нас, прибега́ющих с ве́рою к Тебе́, Милосе́рдой, / и прося́щих те́плаго заступле́ния Твоего́. / Мо́жеши бо, я́ко Блага́я, всех спасти́ / и я́ко Ма́ти Бо́га Вы́шняго Ма́терними Твои́ми моли́твами / всегда́ избавля́еши чту́щих Тя от всех бед, Умиле́ние.

По 2-м стихосло́вии седа́лен, глас 1:

Во глубине́ пусты́ни Саро́вския коле́на преклоня́л еси́ на ка́мени, / воздева́я преподо́бнеи твой ру́це ко Го́споду, / те́мже от Спа́са благода́ть Свята́го Ду́ха прия́л еси́ / стра́ждущия телесы́ исцеля́ти и ду́ши ве́рных просвеща́ти. / Сего́ ра́ди вопие́м ти: / моли́, преподо́бне, Христа́ Бо́га спасти́ся нам, / пра́зднующим святу́ю па́мять твою́.

Сла́ва, и ны́не,Богоро́дичен: Ма́терь Тя Бо́жию мо́лим вси вои́стинну / и к щедро́там Твои́м вопие́м, любо́вию прибега́юще к Твое́й ико́не: / Тя бо и́мамы, гре́шнии, Засту́пницу, Умиле́ние, / и Тебе́ стяжа́хом в напа́стех спасе́ние, Еди́ну Пречи́стую.

Полиелей и величание:

Ублажа́ем тя, / преподо́бне о́тче Серафи́ме, / и чтем святу́ю па́мять твою́, / наста́вниче мона́хов / и собесе́дниче А́нгелов.

Псалом избранный.

¹ Терпя́, потерпе́х Го́спода, и внят ми, и услы́ша моли́тву мою́.

² Поста́ви на ка́мени но́зе мои́, и испра́ви стопы́ моя́.

¹ Се удали́хся бе́гая и водвори́хся в пусты́ни.

² Уподо́бихся нея́сыти пусты́нней.

¹ Бдех и бых я́ко пти́ца осо́бящаяся на зде.

² Коле́на моя́ изнемого́ста от поста́.

¹ И плоть моя́ измени́ся еле́а ра́ди.

² Слеза́ми мои́ми посте́лю мою́ омочу́.

¹ Я́ко обыдо́ша мя пси мно́зи, сонм лука́вых одержа́ша мя.

² Напряго́ша лук свой, вещь го́рьку.

¹ Состреля́ти в та́йных непоро́чнаго.

² Предзре́х Го́спода предо мно́ю вы́ну, я́ко одесну́ю менé eсть, да не подви́жуся.

¹ Вси язы́цы обыдо́ша мя, и и́менем Госпо́дним противля́хся им.

² Благослове́н Госпо́дь, И́же не даде́ нас в лови́тву зубо́м их.

¹ Да испове́дятся Тебе́, Го́споди, вся дела́ Твоя́.

² И преподо́бнии Твои́ да благословя́т Тя.

¹ И уве́дите, я́ко удиви́ Госпо́дь преподо́бнаго Своего́.

² И утруди́ся во век и жив бу́дет до конца́.

¹ Храни́т Госпо́дь ду́ши преподо́бных Свои́х.

² Восхва́лятся преподо́бнии во сла́ве и возра́дуются на ло́жах свои́х.

¹ Честна́ пред Го́сподем смерть преподо́бных Его́.

² По́йте Го́сподеви, преподо́бнии Его́, и испове́дайте па́мять святы́ни Его́, во всех лю́дех чудеса́ Его́.

Сла́ва, и ны́не: Аллилу́иа, трижды.

По полиеле́и седа́лен, глас 7:

Просия́ доброде́тельное житие́ твое́, преподо́бне, ны́не в Росси́йстей земли́, / и от всех пе́сньми похва́льными сла́вишися: / ты бо, я́ко Илия́, на колесни́цу доброде́телей вшед, / на Небеса́ душе́ю возлете́л еси́ / и та́мо пра́ведно пресве́тлым венце́м венча́лся еси́. / Те́мже, благодаря́ще, вопие́м ти, блаже́нне Серафи́ме: / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Сла́ва, и ны́не,Богоро́дичен: Стена́ необори́мая нам, христиа́ном, еси́, Богоро́дице Де́во: / к Тебе́ бо прибега́юще, невреди́мы пребыва́ем / и, па́ки согреша́юще, и́мамы Тя Моли́твенницу, Умиле́ние; / тем, благодаря́ще, вопие́м Ти: / ра́дуйся, всех ра́достей Ра́досте.

Степе́нна, 1-й антифо́н 4-го гла́са:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Проки́мен, глас 4: Честна́ пред Го́сподем / смерть преподо́бных Его́.

Стих: Что возда́м Го́сподеви о всех, я́же воздаде́ ми?

Други́й проки́мен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Ева́нгелие от Матфе́я, зача́ло 43 (Мф 11:27–30).

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц: ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

По 50-м псалме́.

Сла́ва: Моли́твами преподо́бнаго Серафи́ма, / Ми́лостиве, очи́сти / мно́жества согреше́ний на́ших.

И ны́не: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Та́же, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.