Читаем Молитвенник полностью

Молитвенник

Кондак, гл. 3 Днесь лик святых, в земли нашей Богу угодивших, предстоит в церкви и невидимо за ны молится Богу: ангели с ним славословят и вси святии Церкве Христовы ему спразднуют: о нас бо молят вси купно Превечнаго Бога.

На утрени Величание: Величаем вас, святии вси, в земли Российстей просиявшии, и чтим святую память вашу, вы бо молите за нас Христа, Бога нашего.

На литургии

Прокимен гласа и святым, гл. 7: Честна пред Господем смерть преподобных Его.

Стих: Что воздам Господеви о всех, яже воздаде ми.

Аллилуиа, гл. 1: Бог даяй отмщение мне, и покоривый люди под мя.

Стих: Величай спасения царева, и творяй милость Христу Своему Давиду, и семени его до века.

Причастен: Хвалите Господа с небес, хвалите Его в вышних.

И Святым: Радуйтеся праведнии о Господе, правым подобает похвала.

Тропари, кондаки и прокимны

На празники Господские, Богородичные и Великих Святых

8 сентября Рождество Пресвятой Богородицы

Тропарь, гл. 4

Рождество Твое, Богородице Дево, радость возвести всей вселенной: из Тебе бо воссия Солнце правды, Христос Бог наш, и разрушив клятву, даде благословение, и упразднив смерть, дарова нам живот вечный.

Кондак, гл. 4 Иоаким и Анна поношения бесчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.

На утрени

Величание: Величаем Тя, Пресвятая Дево, и чтем святых Твоих родителей, и всеславное славим рождество Твое.

Прокимен, гл. 4: Помяну имя Твое во всяком роде и роде.

На литургии

Прокимен, гл. 3, песнь Богородицы: Величит душа моя Господа, и возрадовася дух мой о Бозе Спасе моем.

Стих: Яко призре на смирение рабы Своея; се бо отныне ублажат мя вси роди.

Аллилуиа, гл. 8: Слыши дщи и виждь, и приклони ухо Твое.

За Достойно, ирмос: Чужде матерем девство, и странно девам деторождение: на Тебе, Богородице, обоя устроишася. Тем Тя вся племена земная непрестанно величаем.

Припев: Величай душе моя от неплодове рождшуюся Деву Марию.

Причастен: Чашу спасения прииму, и имя Господне призову.

14 сентября Всемирное Воздвижение Честного и Животворящего Креста

Тропарь и кондак: как в среду

Величание: Величаем Тя, Живодавче Христе, и чтем Крест Твой святый, имже нас спасл еси от работы вражия.

На утрени

Прокимен, гл. 4: Видеша вси концы земли спасение Бога нашего.

Тропарь поклонения: Кресту Твоему покланяемся, Владыко, и святое воскресение Твое славим.

На литургии

Антифон 1: Боже, Боже мой, вонми ми, векую оставил мя еси. Молитвами Богородицы, Спасе, спаси нас.

Далече от спасения моего словеса грехопадений моих. Молитвами…

Боже мой, воззову во дни, и не услышиши, и в нощи, и не в безумие мне. Молитвами…