Небесные покровители земного воинства

Песнь 6

Ирмос: Обы́де нас после́дняя бе́здна, несть избавля́яй, вмени́хомся я́ко о́вцы заколе́ния. Спаси́ лю́ди Твоя́, Бо́же наш, Ты бо кре́пость немощству́ющих и исправле́ние.

Припев: Святый праведный воине Феодоре, моли Бога о нас.

П равосла́вную страну́ Росси́йскую благомилосе́рдо пощади́, и ми́лостивно утверди́, Бо́же наш, и мир, и любо́вь, и здра́вие со все́ми сотвори́, Фео́дора моли́твенника име́я хода́тая о нас.

Припев: Святый праведный воине Феодоре, моли Бога о нас.

У кроти́, воево́до святы́й Фео́доре, нахо́ды злотво́рных челове́к и из рук их исхити́, гоня́щих и расхища́ющих неми́лостивно.

С лава: Моли́твами предваря́я к Бо́гу и Тому́ предстоя́ со А́нгелы, за весь мир моли́ся, брань неприя́зненную всю потреби́ти и побе́ду изве́стну да́ти на сопоста́ты во́инству на́шему.

И ныне: На Небеси́ Арха́нгели и А́нгели, Херуви́ми и Серафи́ми сла́вят, на земли́ же вси лю́дие раболе́пно покланя́ются Рождеству́ Твоему́, сего́ ра́ди мо́лим Тя, Влады́чице: спаси́ ду́ши на́ша.

Г о́споди, поми́луй. (Трижды.)

С ла́ва Отцу́ и Сы́ну и Свято́му Духу и ны́не, и при́сно, и во ве́ки веко́в. А ми́нь.

Конд а́ к

глас 2

А рхистрати́же Росси́йский, служи́телю наро́да Бо́жияго, ни́щих и угнете́нных свободи́телю, нечести́вых наказа́телю, поле́зная нам проси́ и ве́лию ми́лость, я́ко спобо́рник наш, пра́ведне боля́рине Фео́доре.

И́кос

В сечестну́ю па́мять почти́м уго́дника Христо́ва, вели́каго боля́рина Фео́дора, хра́браго во́ина на супоста́ты и ко́рмчаго благоути́шна, и ра́достными глаго́лы от се́рдца воззове́м к нему́, си́це* вопию́ще:

Р а́дуйся, я́ко дела́ блага́я со тща́нием твори́вый, ра́дуйся, упра́вителю му́дрый и терпели́вый; ра́дуйся, врачу́ усе́рдный и ми́лостивый, ра́дуйся, моли́твенниче те́плый и неутоми́мый; ра́дуйся, воево́до пра́ведный и непобеди́мый, ра́дуйся, ра́бе Бо́жий кро́ткий и человеколюби́вый; ра́дуйся, я́ко враги́ злочести́выя смиря́яй и устраша́яй, ра́дуйся, и ны́не со А́нгелы и все́ми святы́ми за ны моля́йся. Ра́дуйся, во́ине Фео́доре, архистрати́же держа́вы Росси́йския.

Песнь 7

Ирмос: По мно́жеству ми́лости Твоея́, Человеколю́бче, сотвори́ с на́ми, да Тебе́ ве́рно вси воспева́юще пои́м, я́коже о́троцы: благослове́н еси́, Бо́же оте́ц на́ших.

Припев: Святый праведный воине Феодоре, моли Бога о нас.

В е́лия по́двиги соверши́л еси́, несумне́нную ве́ру име́я, споспе́шествуемый моли́твами сро́дника твоего́, преподо́бнаго Фео́дора, взыва́ющаго: благослове́н еси́, Бо́же оте́ц на́ших.

Припев: Святый праведный воине Феодоре, моли Бога о нас.

К ро́тостию и простото́ю душе́вною к себе́ привлека́я, и цари́цу сим удиви́л еси́, и да́ры от нея́ почте́н, взыва́л еси́: благослове́н еси́, Бо́же оте́ц на́ших.

С лава: Скорбьми́ утесня́емь отовсю́ду, терпе́л еси́ вся, и на Человеколю́бца наде́жду возложи́в, вопия́л еси́: благослове́н еси́, Бо́же оте́ц на́ших.

И ныне: Наде́ждо всем, Госпоже́ Богоро́дице, разгони́, Влады́чице, враги́ души́ моея́ и напра́ви на стезю́ пра́ву. Пощади́, Помо́щнице и Наде́ждо христиа́нская, Сы́ну Своему́ зову́щи: благослове́н еси́, Бо́же оте́ц на́ших.