Новый Завет (на цсл., гражданский шрифт, с ударениями)

² Бога́тство ва́ше изгни́, и ри́зы ва́ша мо́лие поядо́ша.

³ Зла́то ва́ше и сребро́ изоржа́ве, и ржа их в послушество́ на вас бу́дет, и снесть пло́ти ва́ша а́ки огнь, его́же сниска́сте в после́дния дни.

⁴ Се мзда де́лателей де́лавших ни́вы ва́ша, удержа́ная от вас, вопие́т, и вопие́ния жа́вших во у́ши Го́спода Савао́фа внидо́ша.

⁵ Возвесели́стеся на земли́, и наслади́стеся, упита́сте сердца́ ва́ша а́ки в день заколе́ния.

⁶ Осуди́сте, уби́сте Пра́веднаго, не проти́вится вам.

⁷ Долготерпи́те у́бо, бра́тие моя́, до прише́ствия Госпо́дня. Се земледе́лец ждет честна́го плода́ от земли́, долготерпя́ о нем, до́ндеже прии́мет дождь ран и по́зден.

⁸ Долготерпи́те у́бо и вы, утверди́те сердца́ ва́ша, я́ко прише́ствие Госпо́дне прибли́жися.

⁹ Не воздыха́йте друг на дру́га, бра́тие, да не осужде́ни бу́дете; се Судия́ пред две́рьми стои́т.

¹⁰ О́браз приими́те, бра́тие моя́, злострада́ния и долготерпе́ния, проро́ки, и́же глаго́лаша и́менем Госпо́дним.

¹¹ Се блажи́м терпя́щия. Терпе́ние И́овле слы́шасте и кончи́ну Госпо́дню ви́десте, я́ко многоми́лостив есть Госпо́дь и щедр.

¹² Пре́жде же всех, бра́тие моя́, не клени́теся ни не́бом, ни земле́ю, ни ино́ю ко́ею кля́твою, бу́ди же вам е́же ей, ей, и е́же ни, ни, да не в лицеме́рие впаде́те.

¹³ Злостра́ждет ли кто в вас, да моли́тву де́ет; благоду́шствует ли кто, да пое́т.

¹⁴ Боли́т ли кто в вас, да призове́т пресви́теры Церко́вныя, и да моли́тву сотворя́т над ним, пома́завше его́ еле́ем во и́мя Госпо́дне.

¹⁵ И моли́тва ве́ры спасе́т боля́щаго, и воздви́гнет его́ Госпо́дь, и а́ще грехи́ бу́дет сотвори́л, отпу́стятся ему́.

¹⁶ Испове́дайте у́бо друг дру́гу согреше́ния и моли́теся друг за дру́га, я́ко да исцеле́ете: мно́го бо мо́жет моли́тва пра́веднаго поспешеству́ема.

¹⁷ Илиа́ челове́к бе подобостра́стен нам, и моли́твою помоли́ся, да не бу́дет дождь, и не одожди́ по земли́ ле́та три и ме́сяц шесть.

¹⁸ И па́ки помоли́ся, и не́бо дождь даде́, и земля́ прозябе́ плод свой.

¹⁹ Бра́тие, а́ще кто в вас заблу́дит от пути́ и́стины, и обрати́т кто его́,

²⁰ Да весть, я́ко обрати́вый гре́шника от заблужде́ния пути́ его́ спасе́т ду́шу от сме́рти и покры́ет мно́жество грехо́в.

Пе́рвое посла́ние Петра́

Глава 1

¹ Петр, Апо́стол Иису́с Христо́в, избра́нным прише́льцем разсе́яния По́нта, Галати́и, Каппадоки́и, Аси́и и Вифини́и,

² По прозре́нию Бо́га Отца́, во святы́ню Ду́ха, в послуша́ние и кропле́ние Кро́ве Иису́с Христо́вы, благода́ть вам и мир да умно́жится.

³ Благослове́н Бог и Оте́ц Го́спода на́шего Иису́са Христа́, И́же по мно́зей Свое́й ми́лости порожде́й нас во упова́ние жи́во воскресе́нием Иису́с Христо́вым от ме́ртвых,

⁴ В насле́дие нетле́нно, и нескве́рно, и неувяда́емо, соблюде́но на Небесе́х вас ра́ди,

⁵ И́же си́лою Бо́жиею соблюде́ни ве́рою во спасе́ние, гото́вое яви́тися во вре́мя после́днее.

⁶ О не́мже ра́дуйтеся, ма́ло ны́не, а́ще ле́по есть, приско́рбни бы́вше в разли́чных напа́стех,

⁷ Да искуше́ние ва́шея ве́ры многочестне́йше зла́та ги́бнуща, огне́м же искуше́на, обря́щется в похвалу́ и честь и сла́ву, во открове́нии Иису́с Христо́ве.

⁸ Его́же не ви́девше, лю́бите, и на Него́же ны́не не зря́ще, ве́рующе же, ра́дуетеся ра́достию неизглаго́ланною и просла́вленною,

⁹ Прие́млюще кончи́ну ве́ре ва́шей, спасе́ние душа́м.

¹⁰ О не́мже спасе́нии взыска́ша и испыта́ша проро́цы, и́же о ва́шей благода́ти прореко́ша,

¹¹ Испыта́юще, в каково́ или́ в ко́е вре́мя явля́ше в них Дух Христо́в, пре́жде свиде́тельствуя о Христо́вых страсте́х, и я́же по сих сла́вах.

¹² И́мже откры́ся, я́ко не им саме́м, но нам служа́ху сия́, я́же ны́не возвести́шася вам благовествова́вшими вам Ду́хом Святы́м по́сланным с небесе́, в ня́же жела́ют А́нгели прини́кнути.

¹³ Те́мже, возлю́бленнии, препоя́савше чре́сла помышле́ния ва́шего, трезвя́щеся соверше́нне, упова́йте на приноси́мую вам благода́ть открове́нием Иису́с Христо́вым.

¹⁴ Я́ко ча́да послуша́ния, не преобразу́ющеся пе́рвыми неве́дения ва́шего похоте́нии,

¹⁵ Но по зва́вшему вы Свято́му, и са́ми свя́ти во всем житии́ бу́дите.

¹⁶ Зане́ пи́сано есть: свя́ти бу́дите, я́ко Аз Свят есмь.

¹⁷ И а́ще Отца́ называ́ете, нелицеме́рно судя́ща кому́ждо по де́лу, со стра́хом жития́ ва́шего вре́мя жи́тельствуйте,

¹⁸ Ве́дяще, я́ко не истле́нным сребро́м или́ зла́том изба́вистеся от су́етнаго ва́шего жития́, отцы́ пре́даннаго,

¹⁹ Но честно́ю кро́вию, я́ко а́гнца непоро́чна и пречи́ста, Христа́.

²⁰ Предуве́дена у́бо пре́жде сложе́ния міра, я́вльшася же в после́дняя ле́та вас ра́ди,

²¹ И́же Его́ ра́ди ве́руете в Бо́га воздви́гшаго Его́ из ме́ртвых и сла́ву ему́ да́вша, я́ко да ве́ра ва́ша и упова́ние бу́дет на Бо́га.

²² Ду́ши ва́ша очи́стивше в послуша́нии и́стины Ду́хом, в братолю́бие нелицеме́рно, от чи́ста се́рдца друг дру́га люби́те приле́жно.

²³ Порожде́ни не от се́мене истле́нна, но неистле́нна, слово́м жива́го Бо́га и пребыва́юща во ве́ки.

²⁴ Зане́ вся́ка пло́ть я́ко трава́, и вся́ка сла́ва челове́ча я́ко цвет тра́вный: и́зсше трава́, и цвет ея́ отпаде́:

²⁵ Глаго́л же Госпо́днь пребыва́ет во ве́ки. Се же есть глаго́л благовествова́нный в вас.

Глава 2