Новый Завет (на цсл., гражданский шрифт, с ударениями)

¹⁶ Та́ко бу́дут после́днии пе́рви, и пе́рвии после́дни, мно́зи бо суть зва́ни, ма́ло же избра́нных.

¹⁷ И восходя́ Иису́с во Иерусали́м, поя́т обана́десять ученика́ еди́ны [33] на пути́ и рече́ им:

¹⁸ Се восхо́дим во Иерусали́м, и Сын Челове́ческий пре́дан бу́дет архиере́ем и кни́жником, и осу́дят Его́ на смерть;

¹⁹ И предадя́т Его́ язы́ком на поруга́ние и бие́ние и пропя́тие, и в тре́тий день воскре́снет.

²⁰ Тогда́ приступи́ к Нему́ ма́ти сы́ну Зеведе́ову с сыно́ма свои́ма, кла́няющися и прося́щи не́что от Него́.

²¹ Он же рече́ ей: чесо́ хо́щеши? Глаго́ла Ему́: рцы, да ся́дета сия́ о́ба сы́на моя́, еди́н одесну́ю Тебе́, и еди́н ошу́юю Тебе́, во Ца́рствии Твое́м.

²² Отвеща́в же Иису́с рече́: не ве́стася, чесо́ про́сита. Мо́жета ли пи́ти ча́шу, ю́же Аз и́мам пи́ти, или́ креще́нием, и́мже Аз креща́юся, крести́тися? Глаго́ласта Ему́: мо́жева.

²³ И глаго́ла и́ма: ча́шу у́бо Мою́ испие́та, и креще́нием, и́мже Аз креща́юся, крести́тися, а е́же се́сти одесну́ю Мене́ и ошу́юю Мене́, несть Мое́ да́ти, но и́мже угото́вася от Отца́ Моего́.

²⁴ И слы́шавше де́сять, негодова́ша о обою́ бра́ту.

²⁵ Иису́с же призва́в их, рече́: ве́сте, я́ко кня́зи язы́к госпо́дствуют и́ми, и вели́цыи облада́ют и́ми.

²⁶ Не та́ко же бу́дет в вас, но и́же а́ще хо́щет в вас вя́щший бы́ти, да бу́дет вам слуга́.

²⁷ И и́же а́ще хо́щет в вас бы́ти пе́рвый, бу́ди вам раб.

²⁸ Я́коже Сын Челове́ческий не прии́де, да послу́жат Ему́, но послужи́ти и да́ти ду́шу Свою́ избавле́ние за мно́гих.

²⁹ И исходя́щу Ему́ от Иерихо́на, по Нем и́де наро́д мног.

³⁰ И се два слепца́ седя́ща при пути́, слы́шавша, я́ко Иису́с мимохо́дит, возопи́ста, глаго́люща: поми́луй ны, Го́споди, Сы́не Дави́дов.

³¹ Наро́д же запрети́ и́ма, да умолчи́та, о́на же па́че вопия́ста, глаго́люща: поми́луй ны, Го́споди, Сы́не Дави́дов.

³² И воста́в Иису́с возгласи́ я́ и рече́: что хо́щета, да сотворю́ ва́ма?

³³ Глаго́ласта Ему́: Го́споди, да отве́рзетеся о́чи на́ю.

³⁴ Милосе́рдовав же Иису́с прикосну́ся о́чию и́ма, и а́бие прозре́ста и́ма о́чи, и по Нем идо́ста.

Глава 21

¹ И егда́ прибли́жися Иису́с во Иерусали́м и приидо́ша в Вифсфаги́ю к горе́ Елео́нстей, тогда́ Иису́с посла́ два ученика́,

² Глаго́ля и́ма: иди́та в весь, я́же пря́мо ва́ма, и а́бие обря́щета осля́ привя́зано, и жребя́ с ним, отреши́вша приведи́та Ми.

³ И а́ще ва́ма кто рече́т что, рече́та, я́ко Госпо́дь ею́ тре́бует, а́бие же по́слет я́.

⁴ Сие́ же все бысть, да сбу́дется рече́нное проро́ком, глаго́лющим:

⁵ Рцы́те дще́ри Сио́нове, се Царь твой гряде́т тебе́ кро́ток, и всед на осля́ и жребя́, сы́на подъяре́мнича.

⁶ Ше́дша же ученика́ и сотво́рша, я́коже повеле́ и́ма Иису́с,

⁷ Приведо́ста осля́ и жребя́, и возложи́ша верху́ ею́ ри́зы своя́, и все́де верху́ их.

⁸ Мно́жайшии же наро́ди постила́ху ри́зы своя́ по пути́, друзи́и же ре́заху ве́тви от древ и постила́ху по пути́.

⁹ Наро́ди же предходя́щии [ему́] и всле́дствующии зва́ху, глаго́люще: оса́нна [34] Сы́ну Дави́дову, благослове́н Гряды́й во и́мя Госпо́дне, оса́нна в вы́шних.

¹⁰ И вше́дшу Ему́ во Иерусали́м, потрясе́ся весь град, глаго́ля: кто есть Сей?

¹¹ Наро́ди же глаго́лаху: Сей есть Иису́с Проро́к, и́же от Назаре́та Галиле́йска.

¹² И вни́де Иису́с в це́рковь Бо́жию и изгна́ вся продаю́щия и купу́ющия в це́ркви, и трапе́зы торжнико́м испрове́рже и седа́лища продаю́щих го́луби.

¹³ И глаго́ла им: пи́сано есть, храм Мой храм моли́твы нарече́тся, вы же сотвори́сте и верте́п разбо́йником.

¹⁴ И приступи́ша к Нему́ хро́мии и слепи́и в це́ркви, и исцели́ их.

¹⁵ Ви́девше же архиере́е и кни́жницы чудеса́, я́же сотвори́, и о́троки зову́щя в це́ркви и глаго́лющя: оса́нна Сы́ну Дави́дову, негодова́ша.

¹⁶ И ре́ша Ему́: слы́шиши ли, что си́и глаго́лют? Иису́с же рече́ им: ей, не́сте ли чли николи́же, я́ко изоу́ст младе́нец и ссу́щих соверши́л еси́ хвалу́?

¹⁷ И оста́вль их, изы́де вон из гра́да в Вифа́нию и водвори́ся ту.

¹⁸ У́тру же возвра́щься во град, взалка́.

¹⁹ И узре́в смоко́вницу еди́ну при пути́, прии́де к ней, и ничто́же обре́те на ней, то́кмо ли́ствие еди́но, и глаго́ла ей: да николи́же от тебе́ плода́ бу́дет во ве́ки. И а́бие и́зсше смоко́вница.

²⁰ И ви́девше ученицы́ диви́шася, глаго́люще: ка́ко а́бие и́зсше смоко́вница?

²¹ Отвеща́в же Иису́с рече́ им: ами́нь глаго́лю вам, а́ще и́мате ве́ру и не усумните́ся, не то́кмо смоко́вничное сотворите́, но а́ще и горе́ сей рече́те: дви́гнися и ве́рзися в мо́ре, бу́дет.

²² И вся, ели́ка а́ще воспро́сите в моли́тве ве́рующе, прии́мете.

²³ И прише́дшу Ему́ в це́рковь, приступи́ша к Нему́ уча́щу архиере́е и ста́рцы людсти́и, глаго́люще: ко́ею вла́стию сия́ твори́ши? И кто Ти даде́ власть сию́?

²⁴ Отвеща́в же Иису́с рече́ им: вопрошу́ вы и Аз сло́во еди́но, е́же а́ще рече́те Мне, и Аз вам реку́, ко́ею вла́стию сия́ творю́.

²⁵ Креще́ние Иоа́нново отку́ду бе? С небесе́ ли, или́ от челове́к? Они́ же помышля́ху в себе́, глаго́люще: а́ще рече́м, с небесе́, рече́т нам: почто́ у́бо не ве́ровасте ему́?

²⁶ А́ще ли рече́м, от челове́к, бои́мся наро́да, вси бо и́мут Иоа́нна я́ко проро́ка.