Новый Завет (на цсл., гражданский шрифт, с ударениями)

³⁷ Иерусали́ме, Иерусали́ме, изби́вый проро́ки и ка́мением побива́яй по́сланныя к тебе́, колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте?

³⁸ Се, оставля́ется вам дом ваш пуст.

³⁹ Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во и́мя Госпо́дне.

Глава 24

¹ И изше́д Иису́с идя́ше от це́ркве, и приступи́ша ко Иису́су ученицы́ Его́ показа́ти Ему́ зда́ния церко́вная.

² Иису́с же рече́ им: не ви́дите ли вся сия́? Ами́нь глаго́лю вам, не и́мать оста́ти зде ка́мень на ка́мени, и́же не разори́тся.

³ Седя́щу же Ему́ на го́ре Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут? И что есть зна́мение Твоего́ прише́ствия и кончи́на ве́ка?

⁴ И отвеща́в Иису́с рече́ им: блюди́те, да никто́же вас прельсти́т.

⁵ Мно́зи бо прии́дут во и́мя Мое́, глаго́люще: Аз есмь Христо́с, и мно́ги прельстя́т.

⁶ Услы́шати же и́мате бра́ни и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на.

⁷ Воста́нет бо язы́к на язы́к, и ца́рство на ца́рство, и бу́дут гла́ди и па́губы и тру́си по ме́стом,

⁸ Вся же сия́ нача́ло боле́знем.

⁹ Тогда́ предадя́т вы в ско́рби и убию́т вы, и бу́дете ненави́дими все́ми язы́ки и́мене Моего́ ра́ди.

¹⁰ И тогда́ соблазня́тся мно́зи, и друг дру́га предадя́т, и возненави́дят друг дру́га,

¹¹ И мно́зи лжепроро́цы воста́нут и прельстя́т мно́гия,

¹² И за умноже́ние беззако́ния, изся́кнет любы́ мно́гих.

¹³ Претерпе́вый же до конца́, той спасе́тся.

¹⁴ И пропове́стся сие́ Ева́нгелие Ца́рствия по всей вселе́нней, во свиде́тельство всем язы́ком, и тогда́ прии́дет кончи́на.

¹⁵ Егда́ у́бо у́зрите ме́рзость запусте́ния, рече́нную Дании́лом проро́ком, стоя́щу на ме́сте свя́те, и́же чтет, да разуме́ет,

¹⁶ Тогда́ су́щии во Иуде́и да бежа́т на го́ры.

¹⁷ И и́же на кро́ве, да не схо́дит взя́ти я́же в дому́ его́,

¹⁸ И и́же на селе́, да не возврати́тся вспять взя́ти риз свои́х.

¹⁹ Го́ре же непра́здным и доя́щим в ты́я дни.

²⁰ Моли́теся же, да не бу́дет бе́гство ва́ше в зиме́, ни в суббо́ту.

²¹ Бу́дет бо тогда́ скорбь ве́лия, якова́ же несть была́ от нача́ла міра досе́ле, ниже́ и́мать бы́ти.

²² И а́ще не бы́ша прекрати́лися дни́е о́ны, не бы у́бо спасла́ся вся́ка плоть, избра́нных же ра́ди прекратя́тся дни́е о́ны.

²³ Тогда́ а́ще кто рече́т вам: се зде Христо́с, или́ о́нде, не ими́те ве́ры.

²⁴ Воста́нут бо лжехри́сти и лжепроро́цы и дадя́т зна́мения ве́лия и чудеса́, я́коже прельсти́ти, а́ще возмо́жно, и избра́нныя.

²⁵ Се, пре́жде рех вам.

²⁶ А́ще у́бо реку́т вам: се в пусты́ни есть, не изыди́те, се в сокро́вищих, не ими́те ве́ры.

²⁷ Я́коже бо мо́лния исхо́дит от восто́к и явля́ется до за́пад, та́ко бу́дет прише́ствие Сы́на Челове́ческаго;

²⁸ Иде́же бо а́ще бу́дет труп, та́мо соберу́тся орли́.

²⁹ А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спа́днут с небесе́, и си́лы небе́сныя подви́гнутся;

³⁰ И тогда́ яви́тся зна́мение Сы́на Челове́ческаго на небеси́, и тогда́ воспла́чутся вся коле́на земна́я и у́зрят Сы́на Челове́ческаго гряду́ща на о́блацех небе́сных с си́лою и сла́вою мно́гою;

³¹ И по́слет А́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их.

³² От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва.

³³ Та́ко и вы, егда́ ви́дите сия́ вся, ве́дите, я́ко близ есть, при две́рех.

³⁴ Ами́нь глаго́лю вам, не мимои́дет род сей, до́ндеже вся сия́ бу́дут.

³⁵ Не́бо и земля́ мимои́дет, словеса́ же Моя́ не мимои́дут.

³⁶ О дни же том и часе́ никто́же весть, ни А́нгели небе́снии, то́кмо Оте́ц Мой еди́н.

³⁷ Я́коже бо бысть во дни Но́евы, та́ко бу́дет и прише́ствие Сы́на Челове́ческаго.

³⁸ Я́коже бо бе́ху во дни пре́жде пото́па яду́ще и пию́ще, женя́щеся и посяга́юще, до него́же дне вни́де Но́е в ковче́г,

³⁹ И не уве́деша, до́ндеже прии́де вода́ и взят вся, та́ко бу́дет и прише́ствие Сы́на Челове́ческаго.

⁴⁰ Тогда́ два бу́дета на селе́, еди́н пое́млется, а други́й оставля́ется.

⁴¹ Две ме́люще в же́рновех, еди́на пое́млется, и еди́на оставля́ется.

⁴² Бди́те у́бо, я́ко не ве́сте, в кий час Госпо́дь ваш прии́дет.

⁴³ Сие́ же ве́дите, я́ко а́ще бы ве́дал до́му влады́ка, в ку́ю стра́жу тать прии́дет, бдел у́бо бы и не бы дал подкопа́ти хра́ма своего́.

⁴⁴ Сего́ ра́ди и вы бу́дите гото́ви, я́ко, во́ньже час не мните́, Сын Челове́ческий прии́дет.

⁴⁵ Кто у́бо есть ве́рный раб и му́дрый, его́же поста́вит господи́н его́ над до́мом свои́м, е́же дая́ти им пи́щу во вре́мя их?

⁴⁶ Блаже́н раб той, его́же, прише́д господи́н его́, обря́щет та́ко творя́ща.

⁴⁷ Ами́нь глаго́лю вам, я́ко над всем име́нием свои́м поста́вит его́.

⁴⁸ А́ще ли же рече́т злый раб той в се́рдцы свое́м: косни́т господи́н мой приити́,

⁴⁹ И на́чнет би́ти клевре́ты своя́, я́сти же и пи́ти с пия́ницами,

⁵⁰ Прии́дет господи́н раба́ того́ в день, во́ньже не ча́ет, и в час, во́ньже не весть.