Полный православный молитвослов. На всякую потребу

Священномученику Антипе, епископу Пергамскому

Тропарь, глас 4-й:

И нравом причастник, и престолом наместник апостолом быв, деяние обрел еси, богодухновение, в видения восход: сего ради слово истины исправляя, веры ради пострадал еси даже до крове, священномучениче Антипо, моли Христа Бога спастися душам нашим.

Кондак, глас 4-й:

Апостолов сопрестольник и святителей украшение был еси, блаженне. Мученически прославився, возсиял еси. Якоже солнце, всех просвещая, Антипо священне, разрушил еси безбожия нощь глубокую. Сего ради тя почитаем, яко Божественнаго суща священномученика и целеб подателя.

Молитва:

О, преславный священномучениче Антипо и скорый помощниче христианом в болезнех! Верую от всея души и помышления, яко дадеся тебе от Господа дар болящия врачевати и разслабленныя укрепляти, сего ради к тебе, яко благодатному врачу болезней, аз немощный (или немощная) прибегаю и, твой досточтимый образ со благоговением лобызая (или лобызающи), молюся: твоим предстательством у Царя Небеснаго испроси мне болящему (или болящей) исцеление от удручающия мя зубныя болезни, аще бо и недостоин (или недостойна) есмь тебе благостнейшаго отца и приснаго заступника моего: но ты, быв подражатель человеколюбия Божия, сотвори мя достойна (или достойну) твоего заступления чрез мое обращение от злых дел к благому житию: уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако тихое и безмолвное житие пожив (или поживши) во всяком благочестии и чистоте, сподоблюся со всеми святыми славити Всесвятое имя Отца и Сына и Святаго Духа. Аминь.

Болезни сердца

Святителю Иоасафу, епископу Белгородскому

Тропарь, глас 3-й:

Святителю Христу Богу возлюбленне, правило веры и образ милосердия людем был еси, бдением же, постом и молитвою яко светильник пресветлый просиял еси, и прославлен от Бога явился еси: телом убо в нетлении почивая, духом же Престолу Божию предстоя, чудеса преславная источаеши. Моли Христа Бога, да утвердит Отечество наше в Православии и благочестии и спасет души наша.

Кондак, глас 8-й:

Многоразличныя подвиги жития твоего кто исповесть? Многообразныя милости Божия тобою явленныя кто исчислит? Дерзновение же твое у Пречистыя Богородицы и Всещедраго Бога добре ведуще, во умилении сердечнем зовем ти: не лиши и нас твоея помощи и заступления, святителю Христов и чудотворец Иоасафе.

Молитва:

О, угодниче Божий святителю Иоасафе! Из глубины сердца взываем к тебе раби Божии (имена), огради нас от соблазна, ересей и расколов, научи горняя мудрствовати, рассеянный ум наш просвети и на путь истины направи, охладевшее сердце согрей любовию ко ближнему и ревностию ко исполнению велений Божиих, грехом и нерадением ослабленную волю нашу оживотвори благодатию Духа Всесвятого. Да двоему пастырскому гласу последующе, сохраним в чистоте и правде души наша, и тако Богу помогающу, Небесного Царствия достигнем, идеже купно с тобою воспрославим пречестное и великолепное имя Отца и Сына и Святаго Духа во веки веков. Аминь.

Немота

Преподобному Иоанну Рыльскому

Тропарь, глас 1-й:

Покаяния основание, прописание умиления, образ утешения, духовнаго совершения, равноангельское житие твое бысть, преподобне. В молитвах убо и пощениих и в слезах пребывавый, отче Иоанне, моли Христа Бога о душах наших.

Кондак, глас 8-й:

Ангельскому житию поревновав, преподобне, вся земная оставив, ко Христу притекл еси, и Того заповедьми ограждаяся, явился еси столп непоколебим от вражиих нападений. Тем зовем ти: радуйся, отче Иоанне, светило пресветлое.

Молитва:

О, преподобне и богоносне отче наш Иоанне, зрителю неизреченныя славы в Небеснем Царствии и помощниче благодатный всем к тебе притекающим, не остави места сего, на немже труды и подвиги о Христе подъял еси и землю слезами твоими оросил еси! Да пребудет обитель твоя, в нейже благоволи Бог святым твоим мощем почивати, незыблема от ухищрений врагов видимых и невидимых. Укрепи в доброделании чада твоя, ихже во обитель твою собрал еси, яко да познают звание свое и последуют стопам твоим. Страну нашу в мире соблюди. Православным людем во бранех на сопротивныя споборствуй. Посети с высоты небесныя всех, верно к тебе притекающих и просящих твоего крепкаго заступления; в мори плавающих управи, житейскаго моря волнение утиши, церковныя раздоры укроти, мир всему миру у Господа испроси, болящих уврачуй спасительным посещением, скорбных утеши благодатию, всем буди вся, якоже был еси в земнем житии твоем.

Сотвори о нас к Богу молитву, дана бо ти есть благодать молитися за ны, яко да сподобимся твоим ходатайством улучити вечное блаженство купно с тобою и всеми святыми во Христе Иисусе, Господе нашем, Емуже подобает всякая слава, честь и поклонение со Отцем и Святым Духом во веки веков. Аминь.

Потеря слуха и болезни ушей