Полный Тропарион. Том I

Боже́ственною благода́тию просвети́вся,/ и по сме́рти да́руеши исцеле́ния притека́ющим к ра́це моще́й твои́х, прему́дре Афана́сие./ Те́мже и мы ны́не чтим честны́х моще́й твои́х явле́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Вы́шния красоты́ жела́я... (общий).

Величание

Ублажа́ем тя,/ святы́й пра́ведный Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Максиму Новому, бывшему деспоту* Сербскому, архиепископу Влахозапланинскому, глас 3

Стра́нное рожде́ние и воспита́ние был еси́, о́тче, но па́ки водвори́ся во вла́сти у своего́ наро́да,/ Небе́снаго Ца́рствия жела́я,/ земно́е ца́рствие оста́вил еси́/ и смире́нием Вы́шнее сокро́вище получи́л еси́,/ преблаже́нне Макси́ме,/ моли́, мо́лимся, о душа́х на́ших.

Кондак, глас 2

Крест взем, мно́гия ско́рби и изгна́ния подъя́л еси́,/ святи́телю Макси́ме всеосвяще́нне,/ оте́чества твоего́ и Бо́гом вруче́ннаго ста́да лиша́емь,/ вся бо до́блественне терпе́л еси́,/ душе́внаго ра́ди твоего́ просвеще́ния.

Величание

Велича́ем тя,/ святи́телю о́тче Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

19/1 Преподобного Макария Великого, Египетского (390–391). Святителя Марка Евгеника, архиепископа Ефесского (1457). Обретение мощей преподобного Саввы Сторожевского, Звенигородского (1652). Преподобного Макария Римлянина, Новгородского (XVI-XVII). Преподобного Макария, постника Печерского, в Ближних пещерах почивающего (XII). Преподобного Макария, диакона Печерского, в Дальних пещерах почивающего (XIII-XIV). Блаженного Феодора, Христа ради юродивого, Новгородского (1392).

Тропарь преподобному Макарию Великому, Египетскому, глас 1

Пусты́нный жи́тель, и во пло́ти а́нгел,/ и чудотво́рец яви́лся еси́, Богоно́се о́тче наш Мака́рие,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 4

В дому́ Госпо́дь воздержа́ния вои́стину тя положи́,/ я́коже звезду́ непреле́стную, световодя́щу концы́,/ о́тче отце́в, Мака́рие преподо́бне.

Ин кондак, глас 1

Блаже́нную жизнь сконча́в в житии́ с му́ченическими ли́ки,/ в земли́ кро́тких досто́йно водворя́ешися, Богоно́сне Мака́рие,/ и пусты́ню, я́коже град, насели́в, благода́ть прия́л еси́ от Бо́га чуде́с,/ те́мже тя почита́ем.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Савве Сторожевскому, Звенигородскому, глас 8

От ю́ности Боже́ственною распаля́емь ре́вностию,/ возлюби́л еси́ чи́стое житие́,/ презре́в ми́ра сего́ кра́сная и су́етная,/ после́довал еси́ твоему́ Богому́дрому учи́телю, преблаже́нному Се́ргию,/ в труде́ и бде́нии, в посте́ и по́двизе:/ на Сторо́жи я́влься безмо́лвия ра́ди и стра́жи духо́вныя/ недре́мленным на Боже́ственней стра́жи пред стоя́нием/ стяжа́л еси́ ум, зряй к Бо́гу,/ и де́монския ко́зни и обстоя́ния прозира́яй,/ озаре́ние Пресвята́го Ду́ха в себе́ восприе́м,/ я́ко звезда́ пресве́тлая еси́ ве́рным./ Те́мже и прему́др и светоза́рен предстоя́тель/ и па́стырь ста́ду твоему́ яви́лся еси́,/ све́том твои́м просвеща́й и всех,/ приходя́щих к тебе́ ве́рою, о́тче наш Са́вво,/ и моли́ Христа́ Бо́га, да спасе́т ду́ши на́ша.

Ин тропарь, глас тойже

Пусты́ни яви́лся еси́ до́брое прозябе́ние,/ преподо́бне: от ю́ности бо изво́лил еси́ чи́стое житие́, духо́вному твоему́ учи́телю после́дуя,/ и того́ уче́нием ум к Небе́сным впери́в,/ и ста́ду твоему́ прему́др наста́вник показа́лся еси́;/ тем и Христо́с, я́ко пресве́тла тя свети́льника, чудесы́ обогати́,/ Са́вво о́тче наш,/ моли́ спасти́ся душа́м на́шим.

Кондак, глас тойже

Безмо́лвия ра́ди и пло́ти распина́ния всели́выйся на горе́ Сторо́жи,/ яви́лся еси́, преподо́бне Са́вво, столп ве́ры непоколеби́мый,/ от Пресвята́го Ду́ха осия́нный,/ оби́тель пречестна́я Тро́ицы,/ и непреста́нными моли́твами,/ сле́зными воздыха́нии и по́двигами/ благода́ти Боже́ственныя соприча́стник;/те́мже и Христо́с в нетле́нии моще́й твои́х просла́ви тя,/ и да́ром чуде́с украси́ тя./ Мы же ра́достно ти вопие́м:/ ра́дуйся, Са́вво, вели́кий чудотво́рче.

Ин кондак, глас 2