Полный Тропарион. Том I

Госпо́дним жела́нием распали́вся,/ стра́сти плотски́я воздержа́нием оттря́с,/ Боже́ственнаго све́та незаходи́мое свети́ло яви́лся еси́,/ чуде́с луча́ми всех просвеща́еши,/ притека́ющих к ра́це моще́й твои́х,/ Са́вво, преподо́бне о́тче наш.

Величание

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Марку Евгенику, митрополиту Ефесскому, Исповеднику, глас 8

Правосла́вия наста́вниче, но́вшеств противобо́рниче,/ степе́нь ве́ры, Це́ркве свети́льниче,/ учи́телей Богодухнове́нная печа́те, Ма́рко всему́дре,/ писа́нии твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 4

Прему́дрыми слове́с твои́х исплете́нии, всеблаже́нне,/ вся́кая уста́ ху́льная загради́л еси́/ и ве́рныя Боговеща́нии просвети́л еси́ чести́ Тро́ицу в то́ждестве естества́.

Ин кондак, глас 8

Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе.

Величание

Велича́ем тя,/ святи́телю о́тче Ма́рко,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Макарию Римлянину, Новгородскому, глас 4

Рим, оте́чество твое́, оста́вив,/ в пусты́ню всели́лся еси́,/ и та́мо, в пу́сте ме́сте, обре́т жили́ще себе́,/ отбе́гл еси́ суеты́ ми́ра сего́,/ и в безмо́лвием приста́нищи до́бре направля́л еси́ себе́ ко Го́споду./ Сего́ ра́ди и мы, чту́щии тя,/ притека́юще, мо́лим тя, о́тче Мака́рие:/ моли́ о нас Го́спода,/ да поми́лует нас в день су́дный.

Ин тропарь, глас тойже

Оте́чество твое́, ве́тхий Рим, оста́вив,/ во страну́ Росси́йскую прише́л еси́, преподо́бне,/ и в пусты́ни бла́тней* всели́вся,/ та́мо приста́нище ти́хое ко спасе́нию обре́л еси́/ и безмо́лвное житие́ благоуго́дно провожда́л еси́,/ направля́я себя́ ко Го́споду моли́твами непреста́нными./ Сего́ ра́ди Христо́с тя возлюби́/ и чудесы́ просла́ви, о́тче Мака́рие,/ яви́в тя па́стыря до́бра слове́снаго ста́да Своего́./ Те́мже и мы, притека́юще к тебе́, уми́льно глаго́лем:/ моли́ Просла́вльшаго тя спасти́ся душа́м на́шим.

Кондак, глас 7

От Ри́ма возсия́л еси́, я́коже звезда́ пресве́тлая,/ преподо́бне о́тче наш Мака́рие,/ и, в пусты́ни всели́вся,/ просвети́л еси́ чи́стым житие́м твои́м/ ве́рно притека́ющия к тебе́./ Те́мже и мы, прославля́юще све́тлую па́мять твою́, вопие́м ти:/ ра́дуйся, преподо́бне о́тче Мака́рие.

Ин кондак, глас 8

Я́коже пресве́тлая звезда́, от Ри́ма возсия́л еси́, преподо́бне,/ и, Бо́гом наставля́емь, Росси́йскую страну́ све́том чуде́с твои́х озари́л еси́ духо́вно,/ созыва́я ве́рныя к моще́м твои́м,/ от ни́хже исцеле́ния неду́жным подае́ши./ Те́мже мо́лимся тебе́:/ научи́ нас, о́тче, твоему́ Богоразу́мию/ и уврачу́й неду́ги на́ша душе́вныя и теле́сныя,/ да зове́м ти:/ ра́дуйся, преподо́бне о́тче Мака́рие.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Макарию, постнику Печерскому, в Ближних пещерах почивающему, глас 4

Бы́вший нестяжа́телем Христа́ ра́ди/ и Того́ за мно́гия твоя́ доброде́тели/ в се́рдце твое́ всели́вый,/ блаже́нне Мака́рие,/ моли́ся о нас, пою́щих тя.

Кондак, глас 2

Вы́шних ища́, ни́жних не стяжа́л еси́,/ и нестяжа́ние, я́ко колесни́цу о́гненну к Небеси́ себе́ угото́вав,/ со а́нгелы жи́ти сподо́бился еси,/ Мака́рие сла́вне,/ с ни́миже Христа́ Бо́га моли́ о всех нас.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Макарию, диакону Печерскому, в Дальних пещерах почивающему, глас 7

От ю́ности Христа́ усе́рдие возлюби́в,/ вда́лся еси́ Тому́ весь, я́ко непоро́чна же́ртва,/ и, и́го Его́ благо́е на себе́ взем,/ рабо́тал в нем, всече́стне Мака́рие, спе́шне;/ те́мже у́бо мо́лим тя: моли́ся о душа́х на́ших.

Кондак, глас 4

Вда́вшагося Христу́ Бо́гу на служе́ние от младе́нства/ и Тому́ во и́ночестве и диа́констве послужи́вша священноле́пно,/ восхваля́ем тя любо́вию, Мака́рие свяще́нне, и мо́лим:/ я́ко и́мый дерзнове́ние,/ моли́ Христа́ Бо́га о нас, пою́щих тя.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Феодору, Христа ради юродивому, Новгородскому, глас 4

Правосла́вно пропове́дав, изъясни́л еси́ догма́ты,/ Бо́га ми́лостива сотвори́,/ и сего́ ра́ди во юро́дство претвори́ся,/ и шиба́ние* ве́лие сотвори́л еси́,/ и снег, и зной прии́м на свое́м телеси́,/ по преставле́нии же свое́м дае́ши мно́га исцеле́ния/ с ве́рою приходя́щим к ра́це моще́й твои́х./ Сего́ ра́ди вопие́м ти, Фео́доре блаже́нне,/ моли́ Христа́ Бо́га непреста́нно о всех нас.

Ин тропарь, глас 8