Полный Тропарион. Том I

Приспе́ день све́тлаго торжества́,/ лю́дии Волы́нстии ра́дуются,/ и с ни́ми вся Росси́йская Це́рковь ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ святы́х и Богому́жных уго́дников и чудотво́рцев Волы́нских:/ святи́теля Стефа́на чу́днаго,/ иера́рхом Волы́нским первопресто́льника,/ и свята́го благове́рнаго Яропо́лка,/ блаже́ннаго страда́льца Богому́жнаго,/ и с ни́ми Амфило́хия, святи́теля Волы́нскаго,/ и победоно́снаго Фео́дора, Остро́жскаго кня́зя Богодарова́ннаго,/ и преподо́бнаго И́ова, Поча́евскаго присноблаже́ннаго,/ и́хже моли́твами, Го́споди,/ зе́млю оте́ческую на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пресвяту́ю Ма́терь Свою́ Богоро́дицу,/ благода́тне сия́ющую в цельбоно́сней стопе́ Свое́й/ и чудотво́рней ико́не на горе́ Поча́евстей/ и заступле́ньми про́чих уго́дников Волы́нския па́ствы,/ Иулиани́и, блаже́нныя де́вы Ольша́нския,/ и свята́го преподобному́ченика Мака́рия, архимандри́та Овру́чскаго.

Ин тропарь, глас тойже

Приспе́ день све́тлаго торжества́, оби́тель Пече́рская ра́дуется,/ и с не́ю благослове́нная Поча́евская Ла́вра ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять преподо́бных и Богоно́сных оте́ц Пече́рских,/ от ни́хже во́лею Бо́жиею изы́доша/ первонача́льницы и́ноческаго жития́ на горе́ Поча́евстей,/ и́хже моли́твами, Го́споди,/ зе́млю оте́чественную на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пречи́стую Ма́терь Свою́ Богоро́дицу,/ от лет дре́вних благода́тне сия́ющую в цельбоно́сней стопе́ Свое́й/ и чудотво́рней Свое́й ико́не во оби́тели Поча́евстей/ в просвеще́ние и спасе́ние душ на́ших.

Кондак, глас 8

Избра́нным чудотво́рцам и изря́дным уго́дником Волы́нския земли́/ похва́льная воспису́ем вам, святи́и:/ Яропо́лче святы́й, Стефа́не, Амфило́хие, Фео́доре,/ Иулиани́е, И́ове и Мака́рие, присноблаже́ннии!/ Тем, я́ко иму́щий благода́ть и ми́лость у Христа́ Бо́га на́шего,/ от вся́ких нас бед свободи́те,/ да вы́ну ва́шею по́мощию избавля́емии, вопие́м вам благода́рне:/ ра́дуйтеся, пресла́внии уго́дницы Бо́жии и земли́ Волы́нския украше́ние.

Ин кондак, глас тойже

Избра́ннии от родо́в уго́дницы Бо́жии,/ преподо́бнии Пече́рстии:/ Мерку́рие и Симео́не, Акинди́не же, Лукиа́не, Па́мво и Полика́рпе,/ Авраа́мие, Алекси́е, Евста́фие, Елла́дие, Ефре́ме, Иерони́ме,/Луко́, Мела́дие, Они́симе, Пе́рсие, Па́вле, Се́ргие,/ Сисо́е и Фео́филе, Анато́лие же, Афана́сие, Исидо́ре, Кассиа́не,/ Лавре́нтие, Пафну́тие, Пио́ре, Сисо́е вторы́й и Софро́ние,/ от ни́хже изыдо́ша первонача́льницы/ и́ноческаго жития́ на горе́ Поча́евстей,/ вас не потаи́ла есть земля́,/ Не́бо же и ра́йския селе́ния отверзо́шася вам./ Те́мже мы похва́льная пе́сни Бо́гу, просла́влыиему вас в па́мяти ва́шей, принося́ще,/ и честны́й Собо́р ваш вселюбе́зно почита́юще,/ из глубины́ душе́вныя вопие́м вам:/ от всех бед ва́шими моли́твами заступа́йте нас, зову́щих:/ ра́дуйтеся, Пече́рстии чудотво́рцы/ и оби́тели Поча́евския сла́ва и утвержде́ние.

Величание

Велича́ем вас,/ вси святи́и в земли́ Волы́нстей, просия́вший/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

11/24 Апостола Филиппа, единого от семи диаконов (I). Преподобного Феофана исповедника, творца канонов, епископа Никейского (ок. 850). Собор преподобных отцев и старцев, в Оптиной Пустыни просиявших. Память святых отцев Седьмого Вселенского Собора 18 . Иконы Божией Матери «Вододательница».

Тропарь апостолу Филиппу, глас 3

Апо́столе святы́й Фили́ппе,/ моли́ Ми́лостиваго Бо́га, да прегреше́ний оставле́ние/ пода́ст душа́м на́шим.

Кондак, глас 4

Язы́ков лове́ц пречу́дный, и ученико́в Христо́вых собесе́дник,/ апо́столов предизбра́нный,/ Фили́пп днесь ми́ру исцеле́ний подае́т бога́тство,/ покрыва́ет от обстоя́ний того́ хва́лящия./ Тем согла́сно зове́м ему́:/ спаса́й вся моли́твами твои́ми, апо́столе.

Величание

Велича́ем тя,/ апо́столе Христо́в Фили́ппе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Феофану исповеднику, творцу канонов, епископу Никейскому, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче, архиере́ев Богодухнове́нное удобре́ние,/ Феофа́не прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 2

Возгреме́в Христо́во Боже́ственное воплоще́ние,/ безпло́тныя враги́ до конца́ обличи́л еси́,/ чу́дне Феофа́не;/ сего́ ра́ди вси ве́рно и благоче́стно вопие́м ти:/ моли́ непреста́нно о всех нас.

Величание