Полный Тропарион. Том I

Я́ко Богосло́в Бо́жий Боже́ственнейший/ и моли́твенник наш ве́лий ко Го́споду,/ при́сно, Симео́не, моли́ дарова́ти нам грехо́в проще́ние/ и живота́ исправле́ние, преподо́бие.

Величание

Ублажа́ем тя,/ преподо́бие о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Косме, епископу Маиумскому, творцу канонов, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Космо́ прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас тойже

Укра́шен доброде́тельми, Космо́ Богодухнове́нне,/ Це́ркве Христо́вы украше́ние был еси́:/ пе́сньми бо украси́л еси́ сию́, блаже́нне,/ но моли́ся ко Го́споду изба́витися нам от вся́ких ко́зней ра́тника*,/ тебе́ зову́щим:/ ра́дуйся, о́тче пребога́те.

Величание

Ублажа́ем тя,/ преподо́бие о́тче Космо́,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобным Дионисию и Амфилохию Глушицким, чудотворцам, глас 8

Свети́льницы све́тлии, я́вльшеся/ добро́ту земну́ю му́дренно оста́вльше/ и идо́ша во вну́треннюю пусты́ню, ку́пно с Диони́сием Амфило́хие,/ смире́ние и всю доброде́тель извыко́ша и обрето́ша безсме́ртие,/ посто́м и бде́нием, и про́чим воздержа́нием себе́ принося́ Христу́,/ и ны́не на Небесе́х Престо́лу Христо́ву предстоя́,/ моли́теся, отцы́ Богому́дрии Диони́сие и Амфило́хие,/ умири́ти мир и спасти́ся душа́м пою́щих вас,/ согреше́нием оставле́ние дарова́ти,/ чту́щим всечестну́ю па́мять ва́шу.

Кондак, глас тойже

Я́ко свети́ла незаходи́мая мы́сленнаго Со́лнца, просвети́сте вселе́нную,/ ве́рным ду́ши и телеса́ луча́ми чуде́с ва́ших озаря́юще,/ незави́стно* подава́ете от неду́г исцеле́ние,/ те́мже, соше́дшеся ве́рою, вас в пе́снех восхва́лим,/ я́ко на́ши прему́дрыя наста́вники и к Бо́гу хода́таи,/ и непреста́нно вопие́м:/ ра́дуйтеся, отцы́ Богому́дрии Диони́сие и Амфило́хие.

Величание

Ублажа́ем вас,/ преподо́бнии отцы́ Диони́сие и Амфило́хие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь священномученику Иувеналию, архиепископу Рязанскому и Шацкому, глас 5

Люби́миче па́ствы ряза́нския,/ ю́же от нече́стия и безве́рия огражда́я,/ пострада́л еси́ да́же до кро́ве,/ священному́чениче Иувена́лие,/ моли́ся о нас Влады́це Христу́;/да сохрани́т держа́ву Россе́йскую в ми́ре и благоде́нствии/ и спасе́т ду́ши на́ша.

Кондак, глас 2

Роди́лся еси́ во гра́де Ли́вны,/ обуче́ние восприя́л еси́ во гра́де Каза́ни,/ епи́скопствовал еси́ в Ка́шине, Ту́ле и Ряза́ни,/ сконча́лся еси́ му́ченически в То́мске./ Ны́не жи́тельствуеши во гра́де Небе́снем./ Моли́ся за ны, святи́телю Иувена́лие,/ да спасе́т Госпо́дь ду́ши на́ша.

Величание

Велича́ем тя,/ священному́чениче Иувена́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Предтече, глас 2

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струях крести́ти сподо́бился еси́ Пропове́даннаго./ Те́мже, за и́стину пострада́в, ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра/ и подаю́щаго нам ве́лию ми́лость.

Ин тропарь, глас 4

От за́пада возсия́вши Предте́чева рука́,/ лучи́ испуща́ет нетле́ния ве́рным исцеле́ний,/ свы́ше собира́ет мно́жество а́нгел,/ до́ле же созыва́ет челове́ческий род,/ единогла́сно возсыла́ти сла́ву Христу́ Бо́гу.

Кондак, глас 6

У́мнаго Со́лнца свети́льник Боже́ственный Предте́ча,/ показа́вый в конце́х светоно́сную свою́ десни́цу,/ ны́не на се́вере озаря́ет е́ю блаже́нное Оте́чество на́ше,/ просвеща́я и освяща́я ве́рно покланя́ющихся, и Христу́ вопию́щих:/ спаси́ нас моли́твами проро́ка Твоего́, Царю́ Вы́шний.

Величание

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ руки́ пренесе́ние.

Припев Иоанну Предтече

Святы́й вели́кий Иоа́нне Предте́че Госпо́день,/ моли́ Бо́га о нас.

Тропарь Божией Матери ради иконы Ее «Иерусалимская», глас 4

Богора́дованная Влады́чице,/ препросла́вленная Ма́ти щедро́т и человеколю́бия,/ всеми́лостивая о всем ми́ре Хода́таице!/ Приле́жно раби́ Твои́ ко Твоему́ предста́тельству прибега́ем/ и, ко пречу́дному о́бразу Твоему́ со умиле́нием припа́дающе, мо́лимся:/ моли́тву те́плую Сы́ну Твоему́ и Бо́гу на́шему сотвори́,/ о Всепе́тая Цари́це Богоро́дице,/ да от вся́ких боле́зней и печа́лей нас Тебе́ ра́ди изба́вит,/ и от грехо́в вся́ких свободи́в,/ Ца́рствия Своего́ Небе́снаго насле́дники ны пока́жет;/ ве́лие бо и неизрече́нное я́ко Ма́ти к Нему́ дерзнове́ние и́маши/ и вся от Него́ испроси́ти мо́жеши,/ Еди́на во ве́ки Преблагослове́нная.

Ин тропарь, глас 3