Полный Тропарион. Том I

Я́ко сокро́вище многоце́нное Влады́ка/ и исто́чник, источа́ющ то́ки исцеле́ний,/ су́щим на земли́ подаде́ мо́щи ва́ша,/ неду́ги у́бо отъе́млющия страсте́й разли́чныя,/ благода́ть же даю́щия душа́м непреста́нно./ Те́мже согла́сно любо́вию/ ва́ше, му́ченицы Боже́ственнии, соверша́ем торжество́.

Ин кондак, глас 4

Венчено́сцы я́вльшеся днесь в ми́ре,/ прему́дрии с Ка́рпом Папи́ле,/ просвеща́ете всех,/ и́же ве́рою и весе́лием чту́щих па́мять ва́шу.

Величание

Велича́ем вас,/ страстоте́рпцы святи́и Ка́рпо, Папи́ло, Агафодо́ре и Агафони́ко,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Вениамину Печерскому, в Дальних пещерах почивающему, глас 2

Добр купе́ц бысть, Богому́дре Вениами́не,/ бога́тство бо свое́ тле́нно разда́в,/ купи́л еси́ о́ным нетле́нное в Ца́рствии Небе́снем,/ в не́мже ны́не та́мошних благ наслажда́лся бога́тне,/ проси́ нам ми́ра и ве́лия ми́лости.

Кондак, глас 8

Ку́плю жите́йскую, я́ко тще́тную, оста́вль/ и шед, купи́л еси́ себе́ многоце́нный би́сер, Христа́,/ Ему́же во и́ночестем о́бразе/ труды́ и по́двиги, безме́нством* же и послуша́нием, преподо́бие Вениами́не, благоугожда́я,/ прия́л от Него́ ве́лию и бога́тую ми́лость.

Величание

Ублажа́ем тя,/ преподо́бие о́тче Вениами́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Гавриилу, архиепископу Рязанскому и Зарайскому, глас 5

Ве́рою и пра́вдою Бо́гу служа́,/ сниска́л еси́ любо́вь па́ствы ряза́нския,/ Гаврии́ле святи́телю,/ до́брый па́стырю слове́сных ове́ц./ В годи́ну испыта́ний а́лчущих пита́л еси́,/ ико́ну Богома́тери Зна́мения, имену́емую Корче́мною,/ я́ко исто́чник неоску́дный утеше́ния па́стве свое́й указа́л еси́./ И ны́не моли́ся о нас приле́жно,/ чту́щих святу́ю па́мять твою́.

Кондак, глас 3

Христа́ из мла́да возлюби́л еси́/ и Тому́ любо́вию после́довал еси́,/ му́дростию святи́теля Филаре́та ду́шу свою́ пита́я,/ са́на святи́тельскаго удосто́ен был еси́,/ па́ству ряза́нскую, от Бо́га ти да́нную,/ усе́рдно окормля́л еси́,/ Гаврии́ле святи́телю,/ не преста́й моля́ся о ча́дех твои́х,/ да вси честну́ю па́мять твою́/ ра́достно почита́ем.

Величание

Велича́ем тя,/ святи́телю о́тче Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

14/27 Мучеников Назария, Гервасия, Протасия и Келсия (54–68). Преподобной Параскевы Сербской (XI). Преподобного Николы Святоши, князя Черниговского, Печерского чудотворца, в Ближних пещерах почивающего (1143). Преподобного Космы, Яхромского чудотворца (1492). Яхромской иконы Божией Матери (XV).

Тропарь мученикам Назарию, Гервасию, Протасию и Келсию, глас 4

Му́ченицы Твои́, Го́споди... (общий мученикам).

Кондак, глас 8

Свети́льницы све́тлии я́вльшеся,/ Боже́ственнии му́ченицы,/ тварь све́том чуде́с озаря́ете,/ неду́гов разреша́юще глубо́кую нощь всегда́,/ и Христу́ Еди́ному Бо́гу моля́щеся/ непреста́нно о всех нас.

Величание

Велича́ем вас,/ страстоте́рпцы святи́и Наза́рие, Герва́сие, Прота́сие и Келси́е,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобной Параскеве Сербской, глас 4

Пусты́нное и безмо́лвное житие́ возлюби́вши/ и во след Христа́ Жениха́ твоего́ усе́рдно поте́кши,/ и Того́ благо́е и́го во ю́ности твое́й взе́мши,/ кре́стным зна́мением к мы́сленным враго́м му́жески вооружи́вшися,/ по́стническими по́двиги, посто́м и моли́твами, и сле́зными ка́плями/ у́глие страсте́й угаси́ла еси́, достосла́вная Параске́во;/ и ны́не в Небе́снем черто́зе с му́дрыми де́вами19 предстоя́щи Христу́/ моли́ о нас, почита́ющих честну́ю па́мять твою́.

Кондак, глас 6

Святу́ю вси засту́пницу су́щим в беда́х,/ благоче́стно воспои́м Параске́ву всечестну́ю:/ та бо житие́ оста́вльши тле́нное,/ и нетле́емое прия́т во ве́ки./ Сего́ ра́ди сла́ву обре́те,/ чуде́с благода́ть, Бо́жиим веле́нием.

Величание

Ублажа́ем тя,/ преподо́бная ма́ти Параске́во,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Николе Святоше, князю Черниговскому, Печерскому, в Ближних пещерах почивающему, глас 2

Оте́чество и сла́ву княже́ния твоего́ оста́вил еси́,/ Кня́зю смире́ния, Христо́ви усе́рдно после́довал еси́,/ преподо́бне о́тче наш Нико́ло;/ тем прия́л еси́ от Него́ ве́чное ца́рство и сла́ву на Небеси́,/ иде́же лику́я, помина́й нас, чту́щих па́мять твою́ ве́рно.

Кондак, глас 8

Вся кра́сная ми́ра сего́/ и тле́нное бога́тство нивочто́же вмени́в,/ обога́тился еси́ мно́гими чудесы́ и зна́мении от Христа́ Бо́га,/ Ему́же в весе́лии предстоя́,/ помина́й нас, чту́щих любо́вию па́мять твою́, да зове́м ти:/ ра́дуйся, Нико́ло пречу́дне.

Величание

Ублажа́ем тя,/ преподо́бне о́тче Нико́ло,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.