Полный Тропарион. Том I

Во пло́ти я́ко а́нгел на земли́ яви́лся еси́,/ и поще́нием был еси́ я́ко дре́во насажде́нное,/ водо́ю воздержа́ния до́бре возрасти́вся,/ и тече́ньми твои́х слез скве́рну омы́в;/ сего́ ра́ди яви́лся еси́ прия́телище Боже́ственное, Авра́мие, Ду́ха.

Величание

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Аврамию затворнику (Хиданскому) глас 8

В тебе́, о́тче... (общий преподобному).

Кондак, глас 3

Во пло́ти, я́ко а́нгел, на земли́ яви́лся еси́,/ и поще́нием был еси́, я́ко дре́во насажде́нное,/ водо́ю воздержа́ния до́бре возрасти́вся,/ и тече́ньми твои́х слез скве́рну омы́в,/ сего́ ра́ди яви́лся еси́ прия́телище Боже́ственное, Авраа́мие, Ду́ха.

Величание

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Аврамию, архимандриту Ростовскому, глас 1

Просвети́вся Боже́ственною благода́тию,/ неве́рныя лю́ди наста́вил еси́ к све́ту Богоразу́мия,/ и по сме́рти сия́я све́тлостию жития́ твоего́,/ источа́вши исцеле́ния притека́ющим с ве́рою к тебе́,/ Авра́мие о́тче наш,/ Христа́ Бо́га моли́ дарова́ти нам ве́лию ми́лость.

Кондак, глас 2

И́го Христо́во прие́м, Авра́мие,/ и Того́ крест на ра́мо взем,/ после́довал еси́ Ему́,/ насажде́н быв в дому́ Госпо́дни,/ и процве́л еси́ я́ко фи́никс, и я́ко кедр, и́же в Лива́не,/ умно́жил еси́ ча́да твоя́, муж жела́ний духо́вных,/ от возлю́бленнаго же апо́стола Иоа́нна Богосло́ва благода́ть восприи́м,/ жезло́м сокруши́л еси́ и́дола,/ и рассы́пал еси́ его́ я́ко прах,/ и чудотво́рец у́бо ве́лий яви́лся еси́, преподо́бие./ Те́мже Христа́ Бо́га моли́/ непреста́нно о всех нас.

Величание

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Феодосию Сийскому, глас 8

По́двигом до́брым подвиза́вся от ю́ности твоея́, преподо́бие Феодо́сие,/ мирску́ю суе́ту отве́ргл еси́,/ де́вство же и целому́дрие возлюби́л еси́ Ца́рствия ра́ди Небе́снаго,/ вина́ и упоя́ющаго пития́ до кончи́ны не вкуси́вый,/ Еди́наго Бо́га взыску́я,/ пусты́ню пречу́днаго отца́ Анто́ния дости́гл еси́/ и в ней во смиренному́дрии и слеза́х все житие́ препроводи́л еси́,/ о́ного житию́ подо́бяся/ и во всем быв о́браз доброде́телей твои́м ученико́м./ И ны́не в Го́рния оби́тели пресели́вся,/ Святе́й Тро́ице предстои́ши,/ помина́й нас, чад твои́х, Пресвяте́й Тро́ице моля́ся,/ от вся́ких бед и скорбе́й изба́вити и спасти́ ду́ши на́ша.

Кондак, глас тойже

От ю́ности твоея́, преподо́бне, Го́сподеви возложи́в вся,/ плотска́я мудрова́ния воздержа́нием увя́дил еси́,/ в поста́х, моли́твах о́браз быв твои́м ученико́м,/ доброде́тели Богому́драго Анто́ния насле́довав,/ и того́ оби́тель измла́да дости́гл еси́,/ и в ней трудолю́бие свою́ жизнь препроводи́л еси́ в терпе́нии мно́зе,/ и ны́не со все́ми святы́ми Святе́й Тро́ице предстои́ши,/ помина́й нас, чту́щих всечестну́ю па́мять твою́,/ да вси велегла́сно вопие́м ти:/ ра́дуйся, досточу́дне Феодо́сие, наста́вниче духо́вный.

Величание

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/12 Священномученика Зиновия, епископа Егейского, и сестры его мученицы Зиновии (285). Святого Стефана Милютина, короля Сербского (1320), брата его Драгутина (1316) и матери их Елены (1306). Численской и Озерянской (XVI) икон Божией Матери.

Тропарь священномученику Зиновию и сестре его, мученице Зиновии, глас 4

Му́ченицы Твои́, Го́споди... (общий мученикам).

Кондак, глас 8

И́стины свиде́тели, и благоче́стия пропове́дники,/ дво́ицу досто́йно почти́м в Богодухнове́нных пе́снех,/ Зино́вия вку́пе с му́дрою Зинови́ею,/ ку́пно жи́вшия и отше́дшия,/ и муче́нием прии́мшия вене́ц нетле́нный.

Величание

Велича́ем вас,/ страстоте́рпцы святи́и Зино́вий и Зинови́я,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святому праведному Стефану Милютину, королю Сербскому, глас 3

Ты на земли́ вседу́шно Христа́ возлюби́в/ и Того́ за́поведи соблюда́я,/ я́ко река́, благоутро́бием изсо́хших нището́ю бога́тно напои́л еси́/ и лю́ди своя́ снабде́л* еси́,/ и ра́ка моще́й твои́х благоуха́ния цельбы́ всем подае́т./ Сего́ ра́ди, свя́те, мо́лим тя,/ изпроси́ душа́м на́шим ве́лию ми́лость.

Тропарь Драгутину, в иночестве Феоктисту, Сербскому, глас 4

Боже́ственнаго стра́ха огне́м ду́шу свою́ распали́л,/ очи́стився покая́нием и украси́вся кро́тостию и смире́нием,/ восте́кл еси́ к Невече́рнему Све́ту – Христу́, преподо́бие о́тче Феокти́сте,/ и ны́не, трисо́лнечным све́том озаря́емь, на Небеси́ лику́еши,/ моли́ о нас,/ ве́рою почита́ющих честну́ю па́мять твою́.

Кондак Стефану Милютину, королю Сербскому, глас 4