Полный Тропарион. Том II

В тебе́, Богому́драя Еле́но, изве́стен спасе́ния о́браз бысть в Ру́сстей стране́,/ я́ко, прии́мши ба́ню Свята́го Креще́ния, после́довала еси́ Христу́,/ творя́щи же и уча́щи, е́же оста́вити и́дольскую пре́лесть,/ восприя́ти же попече́ние о души́, ве́щи безсме́ртней,/ те́мже и со а́нгелы ра́дуется, равноапо́стольная, дух твой.

Ин тропарь, глас 4

Оста́вивши лесть и́дольскую,/ после́довала еси́ Христу́, Безсме́ртному Жениху́, Ольго Богому́драя,/ в Его́же черто́зе ра́дующися,/ непреста́нно моли́ся/ о чту́щих ве́рою и любо́вию святу́ю па́мять твою́.

Ин тропарь, глас 3

Свята́я равноапо́стольная избра́ннице Христо́ва, княги́не Ольго,/ наро́д твой слове́сным и чи́стым Христо́вым мле́ком напои́вшая,/ моли́ся ми́лостивому Бо́гу,/ да прегреше́ний оставле́ние/ пода́ст душа́м на́шим.

Кондак, глас 4

Воспое́м днесь Благоде́теля всех Бо́га,/ просла́вльшаго в Росси́и Ольгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Ин кондак, глас тойже

Яви́ся днесь благода́ть всех Бо́га,/ просла́вльши в Руси́ Ольгу Богому́друю,/ моли́твами ея́, Го́споди,/ лю́дем пода́ждь/ грехо́в оставле́ние.

Величание

Велича́ем тя,/ блаже́нная и равноапо́стольная княги́не Ольго,/ и чтим святу́ю па́мять твою́,/ и́долы попра́вшую/ и мно́гия лю́ди росси́йския Святы́м Креще́нием просвети́вшую.

Ино величание

Велича́ем тя,/ свята́я равноапо́стольная княги́не Ольго,/ я́ко зарю́ у́треннюю в земли́ на́шей возсия́вшую/ и свет ве́ры Правосла́вныя/ наро́ду своему́ предвозвести́вшую.

Тропарь преподобному Аркадию, Вяземскому и Новоторжскому, глас 4

От духо́внаго наста́вника, о́тца преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/ до́брым по́двигом ревнуя́й,/ от Христа́ Бо́га прия́л еси́ вене́ц сла́вы Небе́сныя;/ и ны́не вку́пе с преподо́бным отце́м Ефре́мом у Престо́ла Вы́шняго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

Кондак, глас 2

К глубина́м Боже́ственнаго Ра́зума впери́в ум свой,/ в Небе́сныя оби́тели воете́кл еси́,/ и равноа́нгельно житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.

Величание

Ублажа́ем тя,/ преподо́бне о́тче Арка́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Рудненская, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи:/ Тя бо и еди́ну наде́жду и́мамы.

Или сей тропарь, глас тойже

Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто же бы сохрани́л до ны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́вши при́сно от вся́ких лю́тых.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

12/25 Мучеников Прокла и Илария (ок. 98–117). Преподобного Михаила Малеина (962). Преподобного Арсения Новгородского (1570). Мучеников Феодора варяга и сына его Иоанна, в Киеве (983). Преподобного Симона Воломского (1641). Иконы Божией Матери, именуемой «Троеручица» (VIII) и «Самонаписавшаяся» (1863).

Тропарь мученикам Проклу и Иларию, глас 4

Му́ченицы Твои́, Го́споди... (общий мученикам).

Кондак, глас тойже

Я́ко денни́ца звезда́ возсия́/ му́чеников Про́кла и Ила́рия честно́е страда́ние,/ предозаря́ющи нас чуде́с све́тлостьми./ Те́мже пра́зднуем па́мять ва́шу,/ Христа́ Бога моли́те, да спасе́т ду́ши на́ша.

Величание

Велича́ем вас,/ страстоте́рпцы святи́и Про́кло и Ила́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Михаилу Малеину, глас 8

В тебе́, о́тче, изве́стно спасе́ся... (общий преподобному).

Ин тропарь, глас тойже

Крила́ми мы́сленными к Богове́дению возлете́в разу́мно,/ мяте́ж ми́ра оста́вил еси́, блаже́нне,/ презре́в пло́ти мудрова́ния,/ му́дрость Вы́шнюю взыска́л еси́, е́же жи́ти с Бо́гом,/ и всем о́браз дав собо́ю, глаго́ля:/ добро́ есть с Бо́гом жи́ти, Михаи́ле преподо́бне.

Кондак, глас 2