Православная энциклопедия

Молитвы святому Николаю Чудотворцу

О святителю Божий и чудотворце Николае! Призри на смиренное моление нас грешных и умоли Владыку нашего и Господа низпослати на ны и на храм, в честь твою, отче Николае, воздвигнутый, великия и богатыя милости, и да исполнит его верных богомольцев своих, и да сподобятся они благодати Божией, и познают страх блаженных Христвых заповедей, и да отверзет им Господь очи мысленныя к разумению Христова Евангелия, воеже в духовном житии преуспеете, сподобитися им милостей Божиих молитвами Пречистыя Владычицы нашея Богородицы и Приснодевы Марии, святаго славнаго и всехвальнаго апостола и евангелиста Иоанна Богослова, честнаго пророка Божия Илии, преподобных отец наших Нила Столобенскаго, Сергия Радонежского и Серафима Саровского, Саввы и Варсонофия Тверских, Макария Колязинскаго и Савватия Оршинскаго чудотворцев, благоверных князей Михаила Тверского и Михаила Микулинскаго, блаженных княгинь-инокинь Ксении и Анны, священномученика Фаддея и преподобного Сергия-исповедника и всех святых в земле тверстей просиявших. Внемли же убо молению нашему, отче Николае, да и мы окаянныя достигнем деснаго предстояния у Христа Бога нашего, Егоже честь, слава и милосердие неоскудевающее со Безначальным Его Отцем и Всесвятым и Благим и Животворящим Его Духом, ныне и присно и во веки веков. Аминь.

О добрый наш пастырю и Богомудрый наставнице, святителю Христов Николае! Услыши нас грешных, молящихся тебе и призывающих в помощь скорое предстательство твое: виждъ нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховнем плену быти, да не будем в радость врагом нашым и не умрем в лукавых деяниих наших: моли о нас, недостойных, Содетеля нашего и Владыку, Емуже ты со безплотными лики предстоиши: милостива к нам сотвори Бога нашего в нынешнем житий и в будущем веце, да не воздаст нам по делом нашым и по нечистоте сердец наших, но по Своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем, и ко пресвятому образу твоему припадающе, помощи просим: избави нас, угодниче Христов, от зол находящих на нас, и укроти волны страстей и бед возстающих на нас, да ради святых твоих молитв не обымет нас напасть и не погрязнем в пучине греховней и в тине страстей наших: моли, святителю Христов Николае, Христа Бога нашего, да подаст нам мирное житие и оставление грехов, душам же нашым спасение и велию милость, ныне и присно и во веки веков.

О, всесвятый Николае, угодниче преизрядный Господень, теплый наш заступниче и везде в скорбех скорый помощниче! Помози мне, грешному и унылому, в настоящем сем житии, умоли Господа Бога даровати ми оставление всех моих грехов, елико согреших от юности моея во всем житии моем, делом, словом, помышлением и всеми моими чувствы; и во исходе души моея помози ми, окаянному; умоли Господа Бога, всея твари Содетеля, избавити мя воздушных мытарств и вечнаго мучения; да всегда прославляю Отца, и Сына, и Святаго Духа, и твое милостивое предстательство, ныне и присно и во веки веков. Аминь.