Православный молитвослов

Господи, молю Тебя о всех, которых я грешный опечалил, обидел или соблазнил словом, делом, помышлением, ведением и неведением. Господи Боже! Отпусти нам наши взаимныя оскорбления; изжени, Господи, из сердец наших всякое негодование, подозрение, гнев, памятозлобие, ссоры и все то, что может препятствовать любви и уменьшать братолюбие.

Помилуй, Господи, тех, которыя поручили мне, грешному, недостойному, молитися о них! Помилуй, Господи, всякаго просящаго Твоей помощи. Господи! Сотвори сей день днем милосердия Твоего, подай каждому по прошению его; буди пастырем заблуждших, вождем и светом неведущих, наставником немудрых, отцем сирых, помощником угнетенных, врачем больных, утешителем умирающих, и приведи нас всех к желанному концу – к Тебе, Пристанищу нашему и блаженному Упокоению. Аминь.

Молитва Оптинских старцев о даровании молитвы Иисусовой

Господи Иисусе Христе, Сыне Божий! Имени Твоему покланяются Ангели и человецы, Твоего имени трепещут адския силы, Твое имя – верное оружие на прогнание супостата, Твое имя попаляет грехи и страсти, Твое имя подает силу в подвигах, собирает воедино разсеянный ум, и во исполнении заповедей Твоих обогащает добродетелями, Твое имя творит чудеса и соединяет нас с Тобою, дарует мир и радость о Духе Святом, а в жизни будущей – Царство Небесное. Сего ради я, недостойный раб Твой, молюся Тебе: прожени от нас неведение духовное, просвети познанием Божественной истины и научи нас незаблудно во смирении, внимательно, с чувством покаяннаго сокрушения, устами, умом и сердцем творити непрестанно молитву сию: Господи Иисусе Христе, Сыне Божий, помилуй мя грешнаго. Ты бо рекл еси, Господи, пречистыми устами Твоими: аще чего просите во имя Мое, Аз сотворю. Се молитвами Пречистыя Матере Твоея, святителя Иоасафа Белгородскаго, святителя Николая Мирликийскаго, преподобнаго Серафима Саровскаго и всех преподобных отец наших о имени Твоем, прошу молитвы пресвятаго и всемогущаго имени Твоего. Услыши мя, обещавый услышати всех призывающих Тя во истине. Твое бо есть еже миловати и спасати и даровати молящемуся во славу Твою со Отцем и Святым Духом. Аминь.

Молитва пред иконою Пресвятой Богородицы «Прибавление ума»

Богородице Пречистая, доме, егоже созда Себе Премудрость Божия, даров духовных Подательнице, от мира к премирным ум наш возводящая и всех к познанию разума приводящая! Приими молебное пение от нас, недостойных раб Твоих, с верою и умилением покланяющихся пред пречистым образом Твоим. Умоли Сына Твоего и Бога нашего, да дарует властем нашим мудрость и силу, судиям правду и нелицеприятие, пастырем мудрость духовную, ревность и бдение о душах наших, наставником смиренномудрие, чадом послушание, всем же нам дух разума и благочестия, дух смирения и кротости, дух чистоты и правды. И ныне, всепетая, вселюбимая наша Мати, подай нам ума прибавление, умири, соедини во вражде и разделении сущия и положи им соуз любве неразрешимый, всех заблуждших от неразумия к свету истины Христовы обрати, страху Божию, воздержанию и трудолюбию научи, слово премудрости и душеполезное знание просящим даруй, осени нас вечною радостию, Херувимов светлейши и Серафимов честнейши сущая. Мы же, славная дела и многоразумную премудрость Божию в мире и жизни нашей видяще, устранимся земныя суеты и излишних житейских попечений, и ум и сердце наше на Небеса возведем, яко да Твоим заступлением и помощию славу, хвалу, благодарение и поклонение в Троице славимому Богу и всех Создателю возсылаем, ныне и присно, и во веки веков. Аминь.

Молитвы перед началом всякого доброго дела

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Или:

Господи Иисусе Христе, Сыне Единородный Безначальнаго Твоего Отца, Ты рекл еси пречистыми усты Твоими: яко без Мене не можете творити ничесоже. Господи мой, Господи, верою объемь в души моей и сердцы Тобою реченная, припадаю Твоей благости: помози ми, грешному, сие дело, мною начинаемо, о Тебе Самем совершити, во имя Отца, и Сына, и Святаго Духа. Аминь.

Или:

Господи, благослови.

Молитвы по окончании всякого дела

Исполнение всех благих Ты еси, Христе мой, исполни радости и веселия душу мою и спаси мя, яко един Многомилостив.

Или:

Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Молитва перед выходом из дома

Отрицаюся тебе, сатано, гордыни твоей и служению тебе, и сочетаюся Тебе, Христе, во имя Отца, и Сына, и Святаго Духа. Аминь.

(И оградить себя крестным знамением.)

Молитва идущего в храм