САҤА КЭС ТЫ

¹⁰ Бас бэриммэт хадаар майгылаах, хойгур тыллаах-өстөөх, албын-көлдьүн киһи бэрт элбэх. Ордук итэҕэйбит иудейдар ортолоругар. ¹¹ Оннуктар сааттаах иҥсэҕэ-обокко ылларан үөрэтиэ суохтаахтарыгар үөрэтэннэр, ыалы ыалынан сутуйаллар. Кинилэри айахтарын хам бүөлүөххэ наада. ¹² «Крит олохтоохторо өрүү сымыйаччылар, адьырҕа кыыллар, сүрэҕэ суохтар» диэн хаһан эрэ бэйэлэрин биллиилээх киһилэрэ[483] этэн турар. ¹³ Ити чахчыны туоһулуур. ¹⁴ Дьэ ол иһин, итэҕэллэрэ чэгиэн буоларын, иудей үһүйээннэрин, кырдьыктан түҥнэри хайыспыт дьон ыйыытын-кэрдиитин истибэт буолалларын туһугар, кинилэри кытаанахтык саралаа. ¹⁵ Ыраас дьон санаатыгар туох барыта ыраас, оттон буорту буолбут, итэҕэлэ суох дьоҥҥо, өйдөрө-суобастара кирдээх буолан, ыраас диэн туох да суох. ¹⁶ Таҥараны билэбит диэн тыллаахтар эрээри, дьайыыларынан – сидьиҥ быһыыларынан-майгыларынан, бас бэриммэттэринэн, туох да үтүөнү оҥорор кыахтара суоҕунан – Кинини утараллар эрэ.

2

Чэгиэн үөрэххэ үөрэтии

¹ Оттон эн чэгиэн үөрэх ирдэбилигэр үөрэт. ² Сааһырбыт дьон сэргэх, үтүө өйдөөх-санаалаах, дьоһун майгылаах буолуох тустаахтар; итэҕэллэрэ, тапталлара, тулуурдара барыта чөл буолуохтаах. ³ Сааһырбыт дьахталлар сибэтиэйдэр[484] сиэрдэринэн олордуннар, хобу-сиби таспатыннар, арыгыга ылларбатыннар, үтүөҕэ эрэ үөрэттиннэр: ⁴ эдэрдэри эрдэрин, оҕолорун таптыырга такайдыннар, ⁵ чөлү харанарга, олохтоох өйдөөх-санаалаах, дьиэҕэ-уокка кыһамньылаах, үтүө майгылаах буоларга, эрдэрин тылын истэргэ үөрэттиннэр; оччоҕо ким да Таҥара тылын баһааҕырдыа суоҕа. ⁶ Эдэр дьону эмиэ кыатана туттарга үөрэт. ⁷ Туохха барытыгар үтүөнү оҥоруу холобурун бэйэҕинэн көрдөр, үөрэтэргэр истиҥ-иһирэх, дуоспуруннаах буол; ⁸ этэр тылыҥ ыйааһыннаах, лоп бааччы үтүө тыл буоллун, оччоҕо утарсааччылар биһиги туспутунан туох да дьиэктээҕи кэпсиир кыахтара суох буолан, бэйэлэрэ саатыахтара.

⁹ Кулуттары туохха барытыгар тойотторугар бас бэринэллэригэр, улгум буолалларыгар, утары эппэттэригэр үөрэт; ¹⁰ уорбатыннар, хата, ол оннугар Быыһааччы Таҥарабыт үөрэҕин өссө ордук кэрэһилиир туһугар, эргиччи эрэбил үтүөкэн дьон буоллуннар.

¹¹ Таҥара илгэлээх үтүөтэ киһи аймахха барытыгар абыраллаах сырдык буолан сыдьаайда. ¹² Кини биһигини аньыылаах-харалаах олохтон, аан дойду имэҥнээх идэмэриттэн аккаастанарга, бу билиҥҥи үйэҕэ өйдөөхтүк, кырдьыгы тутуһан, Таҥараҕа бас бэринэн олорорго, ¹³ эрэлбит туолар абыраллаах Күнүн – улуу Таҥарабыт, Быыһааччыбыт Иисус Христос килбиэннээх кэлиитин – кэтэһэргэ үөрэтэр. ¹⁴ Христос биһигини хара дьайга кулуттааһынтан толуйан ылаары, үтүөнү оҥорорго ис дууһатыттан дьулуһар ураты норуот гына Бэйэтигэр ыраастаан ылаары, олоҕун толук уурбута.

¹⁵ Маннык үөрэтэргэр, эйигин ким да сэнээбэтин курдук, бэйэҥ кыаххын толору туһанан туран өйдөтөр, аньыыларын саралыыр буол.

3

Үрдүкү салалтаҕа сыһыан

¹ Салалтаҕа, былааска бас бэриниҥ, тугу этэллэрин истиҥ, туох үтүөнү барытын оҥорорго бэлэм буолуҥ диэн кинилэри өйдөтө сырыт; ² кими да куһаҕаннык саҥарбатыннар, этиһиини-иирээни иилээбэтиннэр, чуумпутук сырыттыннар, дьоҥҥо-сэргэҕэ барытыгар өрүү үтүө, сымнаҕас сыһыаннаах буоллуннар.

³ Хаһааҥҥыта эрэ биһиги эмиэ им балай, өһөс, муна-тэнэ сылдьар дьон этибит, араас аньыылаах баҕа санаа, бары кыдьык кулуттара буоларбыт, хара санааҕа, ымсыыга быһа сиэтэн олорбуппут; биһигини абааһы көрөллөрө, биһиги эмиэ бэйэ-бэйэбитин абааһы көрсөрбүт. ⁴ Онтон Быыһааччы Таҥарабыт илгэлээх үтүө санаата, киһи аймахха таптала көстөн, ⁵ биһигини туох эрэ өҥөбүт иһин буолбатах, аҥаардас Бэйэтин амарах санаатынан ууга сууннаран[485] иккистээн төрөппүтэ, Сибэтиэй Тыынынан саҥа олоҕу биэрэн өрүһүйэн ылбыта; ^6-7 Кини илгэлээх үтүөтүнэн буруйтан быыһанан, эрэммиппит хоту бараммат олоххо тиксэрбит туһугар, Быыһааччыбытынан – Иисус Христоһунан Сибэтиэй Тыыны биһиэхэ өлгөмнүк биэрбитэ. ⁸ Бу дьиҥ кырдьыктаах тыл.

Эн бу чахчылары өрүү өйдөтө-бигэргэтэ сылдьаргар баҕарыам этэ. Таҥараны итэҕэйбит дьон үтүөнү оҥорорго дьулуурдаах буоллуннар: бу киһиэхэ эрэ барытыгар көмөлөөх, туһалаах суол. ⁹ Ол-бу акаары мөккүөртэн, ким уруута-хаана ордугун быһаарсыыттан, атааннаһыыттан, Сокуон туһуттан иирсииттэн тэйэ тутун; ити туохха да турбат күн көдьүүһэ суох сүпсүк эрэ. ¹⁰ Оттон хайдыһыыны таһаарар киһини иккитэ-хаста өйдөтөн көрөн баран, сыһыаҥҥын быс; ¹¹ оннук киһи өйө-санаата сатарыйан, бэйэтигэр бириигэбэр таһаарынан, аньыыны оҥосторун билэҕин.

¹² Эйиэхэ Артеманы дуу, Тихиги дуу ыыттахпына, Никопольга миэхэ кэлэ сатаар – мин онно тиийэн кыстыырга быһаарынным. ¹³ Зинас адвокаты уонна Аполлоһу, туох да кыһалҕаҕа ыллартарбат курдук, тэрийэн ыытаар.

¹⁴ Биһиги дьоммут, туһата суох сылдьыбаттарын туһугар, эмиэ өрүү үтүөнү оҥоро, атыттарга көмөлөһө үөрэнниннэр.

¹⁵ Манна миигин кытта баар дьоммут бары эйиэхэ эҕэрдэлэрин ыыталлар. Биһигини таптыыр биир итэҕэллээхтэрбитигэр эҕэрдэтэ тириэрт.

Таҥара илгэлээх үтүөтэ эһигинниин эҥээрдэстин. Аминь.

СИБЭТИЭЙ ПАВЕЛ АПОСТОЛ ФИЛИМОҤҤА ИЛДЬИТ СУРУГА

1