САҤА КЭС ТЫ

^1-2 Бииргэ сулууспалыыр күндү доҕорбутугар Филимоҥҥа, таптыыр[486] балтыбытыгар Апфияҕа, биир кэккэҕэ туруулаһар бырааппытыгар Архипка уонна эн дьиэҕэр түмсэр церковка бука барыгытыгар – Иисус Христос хаайыылааҕа[487] Павелтан уонна бырааккытыттан Тимофейтан.

³ Эһиэхэ Аҕа Таҥарабытыттан уонна Айыы Тойон Иисус Христостан бары илгэлээх үтүөнү кытта эйэ-ил тосхойо туруохтун!

Филимон таптала уонна итэҕэлэ

^4-5 Быраатым Филимон, эн Айыы Тойон Иисуска итэҕэлгин, бары сибэтиэйдэргэ[488] тапталгын истэммин, өрүү эйигин өйдөөн-санаан туран үҥэрбэр, Таҥарабар махтанабын; ⁶ эһиги Христос Иисуһу итэҕэйэн тиксэр бары үтүөҕүтүн дириҥник өйдүүргүтүгэр биһигинниин биир итэҕэлиҥ көмөлөөх буоллун диэн, эн тускар үҥэбин. ⁷ Бырааппыт, эн амарах тапталыҥ сибэтиэйдэр сүрэхтэрин көнньүөрдүбүтүн көрөн, биһиги муҥура суох үөрдүбүт, санаабыт көтөҕүлүннэ.

Онисим туһугар көрдөһүү

⁸ Дьэ онон, Христоска биир итэҕэллээх быраатым буоларыҥ быһыытынан, миэхэ маннык иэстээххин-күүстээххин диэн харса суох соруйуохпун сөп этэ гынан баран, ⁹ эйигин таптыыр буоламмын, көрдөһөрбүн ордоробун. Ким да буолбатах, мин, Павел кырдьаҕас, оттон билигин Иисус Христос хаайыылааҕа, ¹⁰ бу түрмэҕэ сытар кэммэр миэхэ уолум буолбут Онисим[489] туһугар эйигиттэн көрдөһөбүн: ¹¹ хаһааҥҥыта эрэ кини эйиэхэ туһата суох этэ, оттон билигин хайабытыгар да туһалаах киһи буолла. Кинини эйиэхэ төттөрү ыытан эрэбин, ¹² онон бырааккын, мин эйиэхэ сүрэхпин ыыппытым курдук санаан, көрүс. ¹³ Евангелие иһин хаайыллан сытар кэммэр манна бэйэҥ оннугар туһалатаары, илдьэ хаалыахпын баҕарбытым гынан баран, ¹⁴ ону эн сөбүлэҥэ суох быһаарыахпын баҕарбаппын. Үтүөнү оҥорууҥ күһэлэҥ буолбакка, баҕа өттүгүнэн буоллун. ^15-16 Баҕар, кэлин кулутуҥ курдук буолбакка, кулуттааҕар үрдэтэн, таптыыр быраатыҥ курдук букатыннаахтык ылынарыҥ туһугар, быстах кэмҥэ кини эйигиттэн тэйитиллэ сылдьыбыта буолуо. Миэхэ кини күндү киһим буолла, оттон эйиэхэ – киһи да быһыытынан, Айыы Тойоҥҥо биир итэҕэллээх быраатыҥ да быһыытынан – өссө ордук күндү буолуохтаах.

¹⁷ Онон, миигин Айыы Тойоҥҥо бииргэ сулууспалыыр доҕорум дии саныыр буоллаххына, кинини, миигин бэйэбин көрсөрүҥ курдук, көрүс. ¹⁸ Эйигин тугунан эмэ хомоппуттаах биитэр туох эмэ иэстээх буоллаҕына, ону барытын мин иэһим курдук санаа. ¹⁹ Бу бэйэм илиибинэн суруйабын: мин, Павел, төлүөҕүм. Эн миэхэ итэҕэл иэстээххин этэ да барбаппын. ²⁰ Онон, быраатым, эйигиттэн Айыы Тойон туһугар, үтүөнү эрэйэрбин көҥүллээ; Айыы Тойон иннигэр сүрэхпин уоскут.

²¹ Тылбын истэргэр бүк эрэнэн суруйабын; көрдөспүппүн куоһара толороргун билэбин. ²² Итиэннэ тиийэн түһэрбэр бука эрэ хосто бэлэмнээр. Таҥара эһиги үҥэргитин истэн, миигин эһиэхэ төнүннэриэ диэн эрэнэ саныыбын.

Түмүк эҕэрдэ

²³ Христос Иисус туһугар миигинниин бииргэ хаайыллан олорор бырааппыт Епафрас эйиэхэ эҕэрдэтин ыытар; ²⁴ бииргэ сулууспалыыр бырааттарым Марк, Аристарх, Димас, Лука эмиэ эҕэрдэлэрин ыыталлар.

²⁵ Айыы Тойоммут Иисус Христос илгэлээх үтүөтэ эһигинниин эҥээрдэһиэхтин. Аминь[490].

СИБЭТИЭЙ ПАВЕЛ АПОСТОЛ [491] ЕВРЕЙДЭРГЭ ИЛДЬИТ СУРУГА

1

¹ Былыр Таҥара бэрт элбэҕи биһиги өбүгэлэрбитигэр ымпыгар-чымпыгар тиийэ сиһилии, араас быһыылаахтык пророктарынан этиппитэ, ² оттон бу тиһэх кэмҥэ Кини биһиэхэ Уолунан этиттэ. Таҥара туох баары барытын Уолун бас билиитигэр биэрбитэ, Кининэн үйэлэри айбыта. ³ Уола, Аҕатын кэрэмэн килбиэнин сыдьаайа, ис дьиҥин уобараһа, сири-халлааны барытын этэр тылын күүһүнэн салайар. Кини биһиги аньыыбытын-харабытын Бэйэтинэн[492] ыраастаан баран, үөһэ баар улуу бүрүстүөл уҥа өттүгэр олорбута.

Таҥара Уола Аанньаллардааҕар үрдүк

⁴ Онон Киниэхэ Аҕатыттан тиксибит аат Аанньаллар ааттарынааҕар төһөнөн үрдүгүй да, соччонон Кини, эмиэ уруккутун курдук, кинилэрдээҕэр улуу буолбута. ⁵ Аанньалларга биирдэстэригэр эмэ хаһан эмит Таҥара: «Эн Мин Уолум буолаҕын, Мин бүгүн Эйигин төрөттүм», – уонна: «Киниэхэ Мин Аҕата буолуом, Кини Миэхэ Уолум буолуо», – диэн эппиттээҕэ дуо? ⁶ Оттон Бастакы Уолун аан дойдуга киллэрэригэр эмиэ[493]: «Таҥара Аанньаллара бары Киниэхэ сүгүрүйүөхтүннэр», – диир. ⁷ Аанньалларын туһунан: «Эн Аанньалларгын тыын[494], оттон чаҕардаргын төлөннөөх уот гынаҕын», – диир буоллаҕына, ⁸ Уолун туһунан маннык этэр: «Таҥара, Эн бүрүстүөлүҥ үйэттэн үйэҕэ баар; Эн ыраахтааҕылыыр торуоскаҥ – кырдьыгы өрө тутуу. ⁹ Таҥара, Эн дьиҥ кырдьыгы таптыырыҥ, токур-туора суоллары тумнарыҥ иһин, Таҥараҥ Эйигин атыттардааҕар өрө таһааран, үрдүк үөрүүнү тосхойор елей арыытынан аҕаата». ¹⁰ Итиэннэ өссө этэр: «Айыы Тойон, маҥнай Эн сири олохтообутуҥ, халлаан эмиэ Эн уран тарбаҕыҥ оҥоһуга; ¹¹ сир-халлаан симэлийэ сүтүөҕэ, оттон Эн куруук баар буолуоҥ; туох барыта сон курдук элээмэтэ эрэ хаала эргэриэҕэ; ¹² сири-халлааны таҥас курдук суулуу туттаххына, олоччу барыта уларыйыаҕа[495]. Арай Эн мэлдьи бииргин, уларыйбаккын, – Эн үллэр үйэҥ муҥурдаммат».