Сказание о странствии и путешествии по России, Молдавии, Турции и Святой Земле. Том первый.

От Сиона изыде закон, и слово Господне от Иерусалима. Благодатию и помощию всесильнаго и прещедраго Господа Бога, в Троице Единаго, восхотех основание твердое сей убогой беседе нашей предложити, к Божественному Писанию, яко к наставнику всея правды, вдаюся, и того руководством душеспасительным наставляем, преднаписанная пророческая словеса, на пользу и утвержение православным, свидетельства ради правды Церкви Сионстей вкратце истинне предлагаю. Библия или Ветхий Закон весь свидетельствует о сем, яко Бог Отец от начала самаго в Сионе познавшеся преданием закона и созидания Церкве Святая Святых, и чрез пророки действовал. Посем Бог Слово, Иисус Христос, Сын Божий, единосущный Отцу, родися плотию во Иеросалиме, и обрезася, по четыредесяти днех в церковь принесеся, и воспитан бысть, и крестися, преобразися, распятся и погребен бысть, и воскрес, и четыредесять дней пребыв вознесеся на небеса, и седе одесную Бога Отца, якоже о сем священное Евангелие известнейше свидетельствует. Потом же третие в Божестве Лице, Дух Пресвятый, во Иеросалиме на апостолы сниде, Иже от Единаго Отца исходит, со Отцем же и с Сыном споклоняем есть и сславим. Сей Дух Святый Господь и Бог есть. Сей Дух Святый закон благодати во Иеросалиме подаде. Сей научив апостолов из Иеросалима на вселенную учение истины испустити. Сей и ныне в Церкви Сионстей Иеросалимский Господем есть, по свидетельству святаго пророка и царя Давида: благословен Господь от Сиона, живый во Иерусалиме (Пс. 134:21). И по Господню обещанию: се Аз с вами есмь во вся дни до скончания века (Мф. 28:20). Отонудуже едина есть Святая Кафолическая, Соборная и Апостольская Церковь Духом Святым начата, и основана апостолы бе, и есть и будет. По сему свидетельству Божественнаго Писания. Иеросалимская Церковь мати есть по всей вселенней православных Церквей. Понеже от Иеросалима Евангелие, апостолы и проповедь, крещение и вера изыде. Оттуда и христианство насадися и возрасте. О сем велегласный пророк (Ис. 1:26) провозвести, глаголя: «и по сих прозовешися град праведный, мати градовом, верный Сион» иже есть во Иеросалиме. Сиону Иеросалиму сия слава и имя подаровано. Речет ли противный, яко сие к небесному Сиону пристоит? Мы же от Божественнаго Писания покажем, яко и к земному. Егда бо во Иеросалиме возрасте от Духа Святаго вера, и распространися везде в правоверных, возрасте, а не прейде. О сем книга Деяний Апостольских свидетельствует, яко сами апостоли прияша Святаго Духа и от Иеросалима изшедше, учаху языки, и паки от востока, полудня и от запада, возвращахуся во Иеросалим, и тамо прибежище им бе. Во Иеросалиме и Пречистыя Богородицы Девы Марии житие и успение бе, и гроб Ея чудотворный на месте, нарицаемем Гефсимания, пребывает (О нем же Никифор, в книзе 3-й в главе 23-й, пишет). Во Иеросалиме и Иаков Брат Господень по плоти от Самого Господа Иисуса Христа рукоположен. (Златоуст в Деянии, лист 304, и в Беседах Апостольских, лист 1488; Исихий Иеросалимский у Фотия, 833). И всегда на месте его пребывает истинный Пастырь, Патриарх православный, при чудотворном Гробе Господни. О сем будет ниже писано. Тамо же и святых преподобных отцев, мучеников и исповедников православия множество обретается, иноков и инокинь собрания. Сия же вся Святый Дух действует: понеже тамо есть и пребывает всегда в Церкви Сионстей и Иеросалимстей, иже есть мати всех Церквей. Дело самое всяко с вышеприведенных словес Исаии пророка познати может, яко Церковь Иеросалимская мати всех Церквей есть. Еже послушествует и Богоотец Давид сицевыми словесы: Мати Сион речет человек, и человек родися в нем (Пс. 86:5). Сие слово сказуя, святой Феодорит и Афанасий пишут: «именуяй бо Сиона Матерь, исповедует и рожденнаго в нем Христа». И пророк Захария рече: обращуся и вселюся посредь Иерусалима на Сиона (Зах. 8:3). Святый же Иоанн Дамаскин явственнейше паче всех пишет, и Церковь воспевает сими словесы: «Радуйся, Сионе Святый, Мати Церквам, Божие жилище: ты бо прият преже оставление грехов воскресения ради» (Стих. Глас. 8). И мнозии Святии, якоже Василий Великий ко святителю Афанасию в послании 48-м пишет, и святитель Иоанн Златоустый на многих местех воспоминает, ихже ради кратости зде оставляются. Единакоже и историков церковных свидетельства к сему подобающая воспомянем: Феодорит в книзе 5-й в главе 9-й пишет: «Матери всех Церквей, Церкви Иеросалимстей, честнаго и возлюбленнаго Кирилла архиепископа; Богом поставленнаго, вам быть назнаменуем». Никифор, такоже историк церковный, в книзе 16, в главе 34: «якоже древле, тако и ныне Церковь Иеросалимская источник есть учению христианскому и мати всех Церквей». И иная о сем свидетельства, невмещения ради малыя книжницы сея, оставляю, зане в предгрядущих словесах потребнейшее речется. А ныне святителя Афанасия, иже на вопросы Антиоха князя: «которая между так великим множеством разных вер и ересей истинною Церковию нарещися может?» на сий вопрос ответ творит: «вся чести достойныя страданий Христовых места Соборней и православней нашей вере и Церкви от Бога даровашася и вверены суть: глаголю же Назарет, идеже воспитан бысть Господь Бог наш, Иисус Христос; Вифлеем, идеже родися; Сион, идеже спасение мiру содела; Иордан, идеже Адама обнови; Фавор, идеже Небесное Царство прообразова; Елеонскую гopy, от нея же ко Отцу Господь на небеса от нас вознесеся. И вся сия честная и чести достойная места не вотще, не всуе, Соборней Церкви ввери; но яко благочестивейшей, яве и честнейшей от всех, иже в христианех именуемых Церквей. И якоже царь честныя палаты его ложницы и сокровища вернейшим своим слугам вверяет; сице и Христос от начала пришествия Своего Соборней Церкви честная та места ввери». Дозде святителя Афанасия словеса: «Аще ли речет сопротивляйся, яко тако бяше от начала, и ныне одержащу вся та святыя места поганину, и вся уже попрана Быша; на сия словеса с пророком Исаиею ответ творю: за гнев бо Мой поразих тя, и милости ради возлюбих тя. И мало пониже: С кипарисом и певгом и кедром вкупе прославити место святое Мое, и место ног Моих прославлю. И наречешися град Сион Святаго Царя нашего (60:10, 13, 14). Той-же: И приставлю судии твоя, яко и прежде, и советники твоя, яко исперва: разумей духовных. И посих прозовешися град праведный (1:26). Но сим словесем противных, по Вознесении Господни даже до Великаго Константина, чрез триста лет, истинныя Церкве во Иеросалиме и ниже в Риме не бе, одержания ради мучителей царей. Но сие есть всему святому Писанию противно. Погибели бо ради мiрския власти, Церковь и святыя места не погибоша, по псалмопевцу Давиду: Избра Господь, рече, Сиона, и изволи его в жилище Себе. Се покой Мой в век века, зде вселюся, яко изволих и (Пс. 131:13–14)». Сия словеса, или пророчество, святой Феодорит и святитель Афанасий сице сказуют: «Исперва, рече, о Владыко, сий град паче иных градов изволил еси, и Свое жилище сотворил еси. В том бо Господь тайну апостолом предаде: разумей же Церковь, и нарече ю в жилище Себе до века. Сия вся рекл еси, о Владыко, и обеща почивати в Сионе: и сие же сбыстся. Аще бо и древняя Церковь пуста бысть за неистовство жидов; но ту паки распятия ради, воскресения и вознесения, места благодати Божия сподобишася. И от всея земли и моря приходит вси, и благословение кипящее оттуду взимают: в том бо почивает Дух Святый». И на ином месте, на псалом 101, пишет: «Трилюбезен бо есть нам Сион, аще и зело пуст бысть. Любимо же и камение разореное, и персть раскованая ратными. Память бо сих любезна есть нам, ради содеянных в нем великих Таин и благодатей, ихже Господь Бог утвержая, и ныне чудеса преславныя и различныя благодати во Иеросалиме, утвержения ради православных, показует. Аще первее и разорися, по гласу Господню, Иеросалим, но потом, при благополучном владетельстве благочестиваго царя Константина Великаго, мати его Великая царица Елена, во Иеросалиме, в трехсотное лето, по обретении честнаго Креста Господня, множество церквей святых воздвиже, и святая места и Гроб Господень очисти, и церковь Воскресения Христова пречудне украси, в нейже и ныне Гроб цел, и стоны Господа нашего Иисуса Христа изображены зрятся тамо».