Скифская история

И тако Баозит един в Европе и Асии облада и распространяше крепостию и силою пределы обладательства своего, во Фракии около Константинополя воюющи. Потом на Греческия страны воинство обрати и облада Македониею, и Селунскою страною, и Афинами.

Потом посылает в Сербскую страну к деспоту Стефану сыну Лазареву, покорения и дани прося, к тому и сестры его имянем Оливеры в жену себе, обещаяся в сына место имети его и области Сербския не воевати, но соблюдати. Мати же деспота Стефана, советовав о том со всеми своими, даде дщерь свою Баозиту, дабы тем могла соблюстися страна их невоеванна.

На царственный же Константинополь отягчаше бранию, и пришед пленяше около града, поля, винограды, вертограды и предградия пожигающи, яко бысть во граде презелный глад и народ затворенный во граде тако от него погибаху, яко нецыи убозии мужие, не стерпевше таковыя бедственныя нужды, нощию из града избегаху и в полки турецкия прихождаху. И тако Баозит осмь лет ратова град, яко мнози уже поддатися хотяху ему.

Царь же Мануил, видев таковое бедство, принудися сам ити из Константинополя во Италию, в Рим к папе, и во Францыю, просящи помощи ко избавлению Константинополя. Но ничтоже от них обрете помощи.

Такожде царь Мануил и патриарх послаша в Россию послов к великому князю Василию Димитриевичу, объявляющи таковое свое бедство и просящи помощи. Великий же князь, и митрополит московский Киприан, и мнози князи уделныя, и чин духовный послаша многу казну в Константинополь с монахом Иродионом Ослебятем.

Баозит же ратова Константинополь яко речеся, и конечно бы тогда взял Константинополь, аще бы не имел опасения от немец и Ве́нгерскаго кралевства: оттуду же посылаше воинство в Болгарскую и Боссенскую страны, иже прилежаху к Венгерскому кралевству. И мстящися смерти отца своего непрестанно войнами пустошаше их, и князя некоего болгарского убил, и иных под власть свою приведе, и в покое оставляющи дани возложи. Такожде помышляше ити войною на Венгерское кралевство.

Еже слышав краль Жигмунт [иже бысть потом цесарь римский], хотящи забежати таковому его начинанию и избавити Болгарию от турков, собрав многое воинство венгров и прочих народов, изыде на султана Баозита.

Баозит же, слышав сия, с яростию устремися на венгров, оставль Константинополь. И сошедшимъся воинством под градом Никополем, бысть между ими презелная брань. И первое убо воспящают венгры турков.

Баозит же обтекающи вся воя своя, утверждает их молением и прещением. «Аще, – рече, – нас победят, то и чада наша во острии меча будут. Уне есть нам единою зде умрети или победивши великая благая приобрести!»

Они же сими глаголы утвердившися, дерзости исполнишася, паче же попущением Божиим одоление приемлют и все воинство краля Жигимунта зелно побеждают: овии избиени быша, а иные в Дунае истопоша, яко едва сам краль незнатно бегством спасеся к реке Дунаю, идеже седши в малую ладиицу побежа Дунаем на Чорное море и оттуду в Константинополь прииде; а из Константинополя к острову Родосу, а оттуду в Далматию. И тако скитающися по многим странам полн страха избегством здравия едва прииде в Венгерскую землю на престол свой.

Бысть сия брань лета 6904-го. Баозит же по толикой христиан победе паки возвратися к Константинополю, и обляже, и с надеждею скорейшаго взятия, и облежаше последи брани оныя чрез два лета. И конечно бы тогда обладал им, аще не бы господь Бог благоволил греком дати еще мало времяни ко исправлению. Ибо Темирь-Аксак, царь татарский, приела к Баозиту, дани и покорения прося.

Баозит же уповающи силе своей на брань противо ему уготовася. И тако оставль Константинополь, всеми силами иде противу его. Некий же избранный советник советова Баозиту, да пошлет дары Темирь-Аксаку, глаголя: «Аще даси ему нечто, то он оставив тя инуде уклонится».

Баозит же ожесточися, яко фараон, не послуша совета онаго, но отвеща советнику тому: «Лучши ми есть победив его вся приобрести, или в мужестве умрети».

Советник же глагола ему: «Егда како господине мой во обоем погрешиши?» Баозит же, не послушав его, изыде против Темирь-Аксака. И сошедшися им на пред ел ех Галатийских и Вифининских. И устроиша воинства, составиша презелную сечу, идеже побеждает Темирь-Аксак турецкое воинство и самого Баозита жива емлет. Воинства же Баозитова до дву сот тысящ избиено бысть.

Баозита же повеле Темирь-Аксак оковати златыми веригами, и в железной клетке на знамение победы по всей Асии вожаше с собою, и на конь с клетки оныя саждашеся. Пришед же советник Баозитов, советовавый дары послати, в таковом заключении ему сущу, глагола Баозиту: «Се, господине, не збышалися глаголы моя?» – И плакася таковаго непослушания.

И тако во пленении том умре Баозит. Неции историки пишут, яко отпущен бысть и от печали многия безчестно умре. Бысть сия брань лета 6906-го. По умертвии своем Баозит остави царство сыном своим, им же имяна Калапин или Мусолман, Моисей или Месиа и Махомет.

Калапин или Мусолман, 5 султан турецкий