Скифская история

К тому быша тамо два вожда христианских воев, един имянем Гвидон, иже бысть царем иерусалимским, вторый имянем Раймунт, иже назывался повелителем иерусалимским. Сей воста противо Гвидона и проси помощи у султана вавилонскаго или египетскаго Салядина имянем.

От злыя зависти в каково безумие приводит началников христианских! Требова змииным ядом вред зависти целити, ибо тии нечестивии всеми силами о том тщахуся, дабы христиане между собою враждующе во изнеможение пришли, а они бы могли тогда всех их истребити, еже и улучи той нечестивый Салядин.

Ибо собрався со безчисленным воинством турков и срацын прииде к Иерусалиму, яко бы умирити хотя оных началников. Умирил же их сице. Пришед бо ят онаго Гвидона и прочих началников, потом ко Иерусалиму приступати повелел. Воинство же бывшее тамо без началных и видевше свое изнеможение поддашася Салядину с таковым договором, дабы свободил онаго Гвидона и прочих началников ятых.

И тако той султан совершенно умири оных враждующих началников, Гвидона и Раймунда, яко не бяше им чего ради друг на друга зависть имети. Ибо, яко речеся, сам облада градом Иерусалимом и всеми оными грады, их же во Святой земле по кровавых и многотрудных одолениах в содержании своем христиане имели; и все воинство христианское до конца из Святыя земли изгна.

Быша сия лета 6695-го. Бысть же Иерусалим под властию христианскою от взятия осмьдесят седмь лет, а от того времяни в срацынской державе пребысть до лет 7024-го, в нем же Селим султан турецкий пришед со многим воинством султана египетскаго с воинством победил и град Иерусалим во свою державу взял, о чем ниже описано будет.

Глава 6

О Отомане Первом султане турецком и о прочих наследниках его, и о прешествии турков из Асии в Европу, и о обладании от них многих христианских государств, паче же Константинополя и всего Греческаго царства

Во оных убо странах, идеже, речеся, пребываху турки, семо и овамо преходящи и прославляющися воинским мужеством, аще и имеяху властелей некогда, их же между себе избираху, обаче не влечашеся род их толико много и не толико славни быша, яко вождь их названный Отоман. О нем же изъявим нечто.

Бяше сей того же скифийскаго, то есть татарскаго народа, от простых, убогих и незнатных родителей рожден. Бяше же дерз и мужествен, иже некоея ради крамолы изгнан бысть от народа своего, не имущи же чим питатися, присовокупи к себе много своеволных мужей и с ними обще граблением и разбоем нуждную пищу себе приобреташе. И тако грабящи и побивающи не только христиан, но и своих единородных, облада некими странами во Асии.

Оныя же турки слышавши и видящи благополучие его, присташа к нему неции, ибо и сами между собою имяху многия вражды и несогласия, будущи под различными обладатели. Потом и вси советовавше купно со старейшинами своими избраша того Отомана старейшину над собою, султаном его нарекши. Бысть сие от Рождества Христова лет 1300-го [от Сотворения Света 6808-го].

Неции историки пишут, яко той Отоман прият вкупе со срацыны закон Махометов, но несть тако, яко явственнее от Барония и Ботера выше сего изъявися. Белской пишет, яко бы от онаго времяни егда воеваша Фракию, Греческую область, турками названи суть, но ни то истинна, ибо название турков за много сот лет пред сим явно было, о чем выше писася и ниже еще объявитися имать.

Паче же и сам той историк противится сему, приводящи на свидетельство инаго историка.

Егда же Отоман той бысть уже султаном у турков, простираше попремногу славу свою, творящи дела славныя и частыя победы над прилежащими окрестными народы и над цари их восприимаше. От чего наипаче желание несытное стяжа, дабы возмогл себе и народу своему славу вечную сотворити, обладательство разширити и царство утвердити.

Чего ради множае надзираше над Греческим царством, иже бяше тогда расторжено на многия части. Ибо Франциа, Испания, Германия еще в царьство Фоки Мучителя отторжеся Греческия власти. Рим со всею Италиею в царство Константина и Ирины такожде отпаде области греческих монархов, и вси особными учинишася царствы.

Сириа такожде во области агарян бяше. Прочия же многия области и страны имяху своих властителей, яко Болгарское, Сербское и Венгерское царство. И не оставаше греческим царем, точию Константинополь не со многими блискими странами и восточных стран нечто [идеже блиско оный турецкий народ житие имяше].

Но и в том малом обладании своем греческие цари междоусобныя брани строяху, един единаго от престола изгоняющи и к конечной погибели скиптр Греческаго царства наклоняющи.

Властели же и сигклит Греческаго царства уклоняшася к хищению, и неправдам, и к несытному желанию сребролюбия, подручныя народы грабяще и разоряюще, яко едва возможно кое тяжчае народом нарещи: турецкое ли пленение или своих насилие и грабление? К воинской же крепости и ко осмотрению целости государственной ни малаго прилежания имяху.