Скифская история

По сем турки или газары, разрушивши врата при мори Каспийском [суть то врата– прошествие тесное между гор моря того], с вождем своим Зевилом в Перейду впадоша и наездами своими различно ю пустошили.

Сей Зевил бяше по хагане вторый обладатель у турков, к ним же от страны Ласикйи прииде царь Ираклий, его же видевше тии поклонишася ему и с вождем своим Зевилом. И на уверение помощи своея той Зевил даде царю Ираклию в помощь сына своего старейшаго с четыредесятию тысящей крепких воинов, сам же во страну свою возвратися.

Во второе лето по том царь Ираклий оных же турков купно с воинством своим имеющи, в Перейду вшедши, Хосроя боящагося и бегающа искаше, но ту<р>ки обаче не могущи подъяти воинственныя нужды отъидоша во страну свою.

Потом паки от времяни до времяни в воинское мужество умножающися, паче же егда прияша закон прелестника Махомета, яко Вороний описует лета от Рождества Христова 632-го или мало последи, егда по Махомете бысть царь у аравов Эувувезе́р имянем. И тогда [глаголет] прелесть закона Махометскаго наипаче распространяшеся, егда приложишася к нему многия агарянские народы, паче же турки.

Потом, яко речеся, возмогающи турки в воинственной крепости начаша соединятися с народом агарянским, иже живяху во Африке, и много наипаче, паче же агаряны оныя умножаху пленение и пустошение странам Греческаго царствия, сущим в Сирии, идеже и святый град Иеросалим взяша лет от Рождества Христова 636-го [от Сотворения Света 6144-го].

А турки тому ревнующи, хотящи прославитися и крепость свою показати, лет от Сотворения Света 6271-го, в царство греческаго царя Константина Копронйма, паки прошедши сквозе Каспийские врата восточныя страны воеваша, и на Армению нападоша, и зело повоеваша ю. Потом и во второе лето то же сотвориша.

И тако сей нечестивый народ турецкий от онаго времяни, егда прияша прелесть Махометову, даже доныне, уже чрез тысящу лет и вящши, непрестанное пленение и пустошение творят государьствам христианским. Богу на сие в казнь нашу попустившу им грехов ради и скверных дел народов христианских. И яко от оных лет мечь той извлечен есть на христиан верных, еще и доныне несть сохранен в место свое.

Паки лета 6556-го оный же народ турецкий, яко речеся, за найм монархом окрестным служащи, призвани быша от перскаго царя срацынина противо супостатом его. И егда мало нача давати им мзды уреченныя и нелюбезно с ними пребываше, вместо помощи, еже бы могли ему подати, оружие, еже противо супостатом царя того уготовиша, на него обратиша и все государство Персидское повоеваша.

Егда же тако благополучно в Персиде им поведеся, дерзновеннее нападаху потом и на Римское греческое царьство [яко и по сие время на сие зрим, егда Восточное греческое царство тии нечестивии повоеваша и обладаша несогласия ради и междоусобных нестроений царей греческих, паче же всего того государства жителей].

По смерти же греческаго царя Константина Дуки тии турки много земель христианских повоевали. И даже до Каппадокии приидоша пленящи, идеже во граде Кесарии гроб святаго Василиа Великаго усиловаша обругати, но не могоша, ибо крепко утвержден бе, паче Бог прославляющи угодника своего не попусти тому быти; точию двери златом, и сребром, и бисером драгим украшенныя ободрали, и церковь осквернили, и людей множество погубили.

Потом в царьство греческаго царя Романа Диогена паки воеваша на Греческое царство, им же мужественно противляшеся царь Роман. Лета же 6579-го бяше у турков царь Асан имянем. Сей требоваше мир содержати с царем Романом. Роман же возгорде им и с воинством на него изыде.

И сошедшеся воинства сташа ополчающеся, средство между себе недалече имеющи. Даже во един вечер царь Роман отлучися от своего воинства и возвращающися во обоз свой даде по себе остатним ротом некоторое знамение, яко бы от страха бегству вдадеся.

Воинство же его мневши истинну быти, вскоре обратившися бегати начаша. Царь же турецкий, видев время благополучно себе, приспе со своими на греческое воинство, и победил их до конца, и самаго царя Романа жива ят.

Но обаче и в плене имущи велми почиташе й и во время ядения купно питаше его, за един стол саждающи с собою. И единою вопроси турецкий царь греческаго царя, что бы над ним имел учинити, егда бы ему в руце его власти приключилося?

Царь же греческий просто, не похлебствуя рече: «Раны многия возложивши на тело твое уморил бых тебя». Царь турецкий рече ему: «Аз злобы твоея и мучительства не имам наследовати и не сотворю тако, яко ты мне сотворити умыслил си, слышащи, яко Христос ваш повеле вам мир хранити и зла за зло не воздавати, и яко той гордым противится, а смиренных возносит».

И сотвори тако дикий той царь, ибо с ним и наследниками его мир утверди и обещание учини, глаголя, яко никогда турки Греческаго царства воевати имут. И отпусти во своя его с честию многою, любезно объемлющи его, и пленников греков всех дарова ему.