Скифская история

О начале и селениах турецкаго народа, и о разпространении их, и о султанех некоторых, бывших до Отомана Перваго султана, прародителя султанов турецких

Произшествие и начало народа турецкаго хотящу ми описати, прилучися со многим трудом и прилежанием немало историй прочитати. Обаче не обретеся того турецкаго народа инаго начала и произшествия, точию по разумению и описанию древних искуснейших эографов и историков.

Той турецкий народ не откуду инуду изшед повествуется, токмо от оных же народов скифских, о них же в истории сей писася. Всяко же не во оныя времена, в них народ скифский татарове от стран Скифийских изыдоша, но зело давными леты пред теми о названии их и селении обретается в писаниих.

Древний эограф Плиниус описует турков селения своя имущих между народов, пребывающих во Асии Меншой, яже ныне Анатолиа имянуется, со ону страну моря Меотскаго [от нашея страны глаголюща].

Сие же писание подтверждается повестми во историях обретающимися. Яко пишет Вороний во истории церковной: лета от Рождества Христова 567-го [от Сотворения Света 6075-го] при греческом царе Иустиниане воевода его имянем Иустиниан охраняше стран Дунайских от аваров, народа таможе обитавшаго, иже изгнани суще от соседей своих турков искаху новых селений.

Сих же турков и газарами называли, яко той же Вороний пишет, яко царь греческий Ираклий воюющи противо персом примирил себе восточных турков, их же газарами называли.

Еще знаменитый историк Кромер пишет яко турки, народ татарский, жителие горы Кавказу, от худых и незнатных начатков в великое пространство за наступающими времена государство свое разпространили лета от Рождества Христова 1012-го [от Сотворения Света 6420-го].

И паки еще Вороний пишет, яко турки народ полунощный, около горы Кавы или Кавказу житие свое имели, а гора та Кавказ обретается блиско Скифии, яко о том выше изъявися.

Сему, яко мню, согласно и новейший эограф Иоанн Ботер описует страну, названную Туркомания, обретающуюся во Асии блиско Персиды, и глаголет, яко народ туркоманов пребывают во Армении Великой; имеет та страна от запада реку Ефрат, от востоку Медию, от полудня Месопотамию. Название же стране той поведает имети от народа туркоманов, пришедших тамо от татар.

Но аще то совершенное наследие турков или ни, искуснейшими да будет разсуждено. Изшествие обаче и начало народа турецкаго вышеписанными и иными многими свидетельствы утверждается быти от скифийскаго, то есть татаръскаго народа. Еже показует единако наречие, единакий обычай, единакий порядок военный. Аще в наречии и разнство имеют, то невеликое, яко московское от полскаго.

И тако о народе и селении турков описав, начнем простирати историю о умножении в воинских делех того турецкаго народа. Во оных убо странах, яко речеся, то есть блиско Персиды турки селения своя имущи, семо и овамо преходящи и крыющися мало знаеми быша даже до царства греческаго царя Анастасиа, иже царствовати начат по царе Зиноне лет от Рождества Христова 401-го, а от Сотворения Света 5999-го, егда турки начаша воевати прилежащия народы.

О чем первое в Хронографе российском, кроме всяких свидетелств, во описании царства Анастасиева сице начинается: Турком пленующим Восточную страну, и сотвори с ними Анастасий царь мир.

О сем в Воронин, идеже пишется о всяких делех бывших в царства царей греческих, не обретается. Токмо пишется, яко царь Анастасий велие свое воинство погубил в Персиде и от прочих диких народов златом откупался.

Еще в Хронографе тамо же пишет, яко началник турецкий имянем Аламундарь верова во Христа и крестися. О сем в Баронии не является, якобы той Аламундарь был турецкаго народа, но сице пишется, яко срацыни Аравию и Палестину воевали и многое зло монахом и христианом учинили. Тогда же и Сирию воевали, и блиско Дамаска во храме святаго мученика Феодора пребывание имели, и храм осквернили, и един от них образ святаго мученика Феодора устрелил стрелою, отнюду же кровь истекши даже до ног потече. Но сим чудом не приидоша погани в чувство и того ради изомроша вси бывшия в храме том.

А вождь или царь их Аламундарь, видев оное чудо действом Божиим, прият христианскую веру и крестися, и оттоле начат прославлятися турецкое имя, зело бо прилежаху к делам военным и служаху за наем окрестным монархом.

Яко лета 592-го [от Сотворения Света 6100-го] бяху в воинстве перскаго царя Хосроя противо греческаго царя Маврикия. Иже Маврикий победи чрез храбраго своего воеводу Нарсета. И тамо от греческаго воинства яти быша турков неколико мужей, у них же на челах их обретахуся кресты воображены. О чем вопрошаеми поведаша, яко во странах их бяше междо ими тлетворная язва; они же от христиан научени будущи ко избавлению от тоя язвы тако творили.

Потом царь греческий Ираклий, воюющи Перекую страну при царе их Хосрое, пришедше во страну Ласйкию примири себе и к воинству своему присовокупи турков, иже быша ему противо персов к великой помощи.