Типикон

В начале 2–го часа знаменует в кампан, и собравшеся во храм, облачится иерей в фелонь, диакон же в стихарь: и поставляет параекклисиарх аналогий украшен, прямо царских врат и вжигает свещу на свещнице. иерей же исходит со евангелием во храм, или в трапезу, царскими враты, предходящу ему диакону с кадилом. И полагает иерей святое евангелие на аналоге. И став пред аналогом, творит начало по обычаю. И по начале чтец: Слава тебе, Боже наш, слава тебе. и царю небесный: и прочая. И по возгласе, кадит иерей святое евангелие на аналоге окрест, и прочия иконы, и храм весь, и настоятеля, и братию. чтец же чтет псалом 5: Глаголы моя внуши Господи: и 22, Господь пасет мя: и 27. Господь просвещение: Слава, и ныне, аллилуиа, трижды. Господи помилуй, трижды. Слава, тропарь предпразднства: Возвращашеся иногда иордан река: И ныне: Что тя наречем: Таже тропари сия поем по дважды, глас 8: Днесь вод освящается естество: И 2–й лик тойже тропарь без припева. И паки 1–й лик припев: Сего ради помянух тя от земли: Таже тропарь, яко человек: И 2–й лик 2–й припев: Видеша тя воды Боже: и поет тойже тропарь. И паки 1–й лик: Слава, Ко гласу вопиющаго: И ныне, тойже. Таже прокимен, глас 4: И возгреме с небесе господь: Стих: Возлюблю тя Господи, крепосте моя: пророчества исаиина: Тако глаголет господь: Таже, деяния святых апостол, зачало 33: Во дни оны, якоже скончаваше иоанн течение: евангелие матфеа, зачало 5: Прииде иоанн креститель: Таже, Стопы моя: И трисвятое. По Отче наш, кондак: Во струях днесь: Господи помилуй, 40. И молитва: Иже на всякое время: По честнейшую херувим: иерей: Боже ущедри ны: Таже, молитва: Христе свете: Сице поем 3–й час, и 6–й, и 9–й: в нихже диакон кадит евангелие, и настоятеля и лики. На 9–м же часе кадит всю церковь, яко на 1–м часе. Таже молитва: владыко Господи Иисусе Христе: И благослови душе моя Господа: Слава, Хвали душе моя Господа: И ныне: единородный сыне: И во царствии твоем: Слава, и ныне: Помяни нас Господи: ослаби, остави: По Отче наш, кондак: Во струях днесь: Господи помилуй 40. И молитва: Всесвятая Троице: Таже, Достойно есть: И отпуст. И бывает росход до часа вечерняго. Вечерня же бывает с литургиею василиа великаго во свое время. И прочее всего чина указа, зри декемвриа в 24–й день.

[Смотри] Ведомо же буди: Аще случится навечерие богоявления, в субботу, или неделю, пост не бывает и тропари царских часов со чтениями в субботу и неделю не поются: но поем часы царския прежде в пяток по обычаю, якоже указано на ряду. Глаголем же символ веры, и псалом 33: благословлю Господа: И отпуст. И в той день ядим сыр и яица. Аще будет навечерие в субботу: Прокимен, Аллилуиа, и причастен дне. Апостол же и евангелие прежде субботе пред богоявлением, и потом ряд. По Изрядно, поем Достойно: Аще ли в неделю навечерие богоявления: Прокимен, апостол, Аллилуиа, евангелие и причастен, прежде недели пред богоявлением, и потом ряд. По Изрядно же, поем, Достойно: По отпущении же литургии ядим укрухи, и пием по единой чаши вина. Совершенно же ядим по отпусте вечерни, со елеем. Сыра же и яиц и рыб никакоже дерзнем коснутися. Аще ли в пяток прежде навечерия богоявления, когда поются часы царския, зри указ, декемвриа в 24–й день.

6. (+) святое богоявление Господа бога и спаса нашего Иисуса Христа.