Том 12 (XVI век, литература «обобщающих предприятий»)

И понеже виде, яко познанъ бысть, темже оттуду отходит во ино место близъ рекы Сосница,[86] тако той именуемо, и тамо вселися, идеже и жесточайшее житие начат жити, в посте и в молитве упражняася. Но понеже «немощно бяше граду укрытися връху горы стоящу»,[87] уведено бысть некимь того житие, и начаша к тому приходити и скуднаа приносити. Таже помале и слухъ происхождаше о немь во всем Новеграде, даждь и до самого архиепископа Иоана,[88] иже тогда престолъ тоа церкви правящаго. Темже посылаеть к нему видети его: кто, и каковъ есть, и что житие его, яко искушаеть того некаа досадителнаа тому изрещи, яко, презревшаа архиерейскую честь и безъ обавлениа ту того живуща. Пришедшю же посланному от архиепископа и ако съ запрещениемь к нему, рече: «Како сде смелъ еси сести, на месте семь, безъ благословениа архиепископова?» Он же смирениемь отвеща, притьчю приемъ: «Некотораа девица седящи у оконца своего близъ некоего позорища, иже бестудно на вся зрящи; другаа же в той же храмине у иного оконца седящи, со благоговениемь о своемь девьстве и чистоте внимающи. Тогда иже тамо мимоходяще человеци о прьвой деве и о бестудии еа глаголюще: „Сиа во многоглаголании своем не сохранит свою чистоту". О друзий же глаголаху: „Яко сиа дева, иже со благоговениемъ тако седяще, сохранит свою чистоту бес порока". Нам же, государю, наипаче подобает внимати себе и сохранити на неже изыдохом, мы бо зде, в сей пустыни, живуще, ни тебе отбегающе, но мира удаляющеся, молитвъ же твоих и благословениа всегда требуемь, и да пребываеть с нами».

Возврати же ся посланый къ архиепископу и поведа ему вся о блаженномь Саве: и о житии его, и о посте, и о нищите. Архиепископъ, услыша сиа, желаниемь побежаа, и восхоте самъ видети его. И ако идяше архиепископъ к того обиталищю, срете его, еще далече сущю, блаженый Сава во простых ризах, якоже обычай бяше — всегда тому тако ходити. И ако виде архиепископа, пад пред нимь со всякимь смиреномудриемь, поклонися, якоже достоить святителю. Архиепископъ же, благословивъ того и не знааше, яко той есть Сава, но мняше странна некоего быти, повеле же ему и сести съ собою, и ити с [нимъ], идеже Сава жилище имеаше; и понеже аще тому и не хотящю седаниа с собою, сподобляеть того. И сему тако бывающу, и духовнаа словеса архиепископу с нимь глаголющю, и позна того не проста быти, но свершена некоего мужа, и сего ради паче возлюби его. И понеже близъ жилища бывше, востаетъ Сава скоро от места сего и смирениемь поклонися архиепископу, и исповеда ему о себе, яко «азъ есмь грешный Сава». Тогда архиепископъ подивися того смирению и того любовию благословивъ, прочее оба внидоша въ храмину Савину и ту многа беседовавше. И многу часу минувшю, архиепископъ, поучивъ того непредкновенно въ тръпении пребыти и тако укрепивъ его и учредивъ не токмо и духовною пищею, но и телесною, прочее во град возвратися, старца же великое житие по Бози похваляа. И оттоле архиепископъ великую веру стяжа ко блаженному Саве и ако велика некоего имяше, темже и всегда потребнаа тому присылааше.

О разбойници. Чюдо 1.

Начат же Сава и келии здати в покои братиамъ. Не стръпе лукавый врагъ, но позавиди тому, некыих от разбойникь навади еже прити к нему и пакость створити, мняще некоего богатьство у него быти. И ако приидоша, тому келию строящю, и лестию благоговейни ся мняще, благословение испросивше. Старець же, познавь техъ лукавьство, яко разбойницы суть, и сего ради яко с молениемь глаголеть темъ: «Чада, сотворите любовь, помозите ми воздвигнути древо на стену». Повелеваеть же темь за тончайший конець бревно взяти, сам же за тяжчайший конець приать[89] воздвизаше древо. Онем же всем немогущимъ своего конца на стену возложити, старець же Божию помощию, яко силенъ, единъ взем древо на стену возложи. Видевше же сиа разбойницы, другъ на друга взирающе со удивлениемь, темже срамом и страхомъ обиати бывша, прочее отбежаша паче боящеся, да нечто пакостно от старца постражуть.

Чюдо 2. О поставлении монастыря.

По сем же некоему времени минувшу, неции от инокъ монастыря, иже Лисичиа гора зовомаа,[90] не оставляху старца тамо житие имети, выше бо помянутого монастыря бяше место то. И сего ради блаженый Сава, яко услыша брань, бывающу о месте, посылает тогда во град некоего от ученикь своих, именем Ефрема,[91] въ Славный конець,[92] посадникомь и тысяцким, и прочим господинимь, христоименитымъ людемъ, испросити от них место над Вешерою рекою и тамо обитель составити.[93] Они же с радостию даша ему место, иже прошаше. И симъ тако бывающимъ, блаженый Сава вселися тамо и всячески, елико мощно, подвизашеся обитель составити, и келию бо водрузивъ, прочее и церковь помысливъ здвигнути во имя Господа Бога и Спаса нашего Исуса Христа, честнаго его Вознесениа, иже того самого Господа нашего Исуса Христа помощию и поспешениемь и церковь воскоре поставлена бысть.[94] Темже начаша к нему мноза приходити: овы ползы ради, овы же жити ту хотяще, той же радостию приимаше техъ.

Чюдо 3.