Том 14 (Конец XVI - начало XVII века, подступы к решительным переменам)

По сем же царьское тело, опрятовше, вложиша во гроб. Благоверная же царица и великая княгиня Ирина Федоровна скорбию велию снедашеся и утробою разпалашеся, яко от великого ея сердечнаго захлипания и непрестанно в перси бьение кровию уста ея обагришеся, мало же ей в велицей той жалости и самой живота не гонзнути. Святейший же Иев патриархъ благочестивую царицу моляще и утешаше на мнозе, но не успе ничтоже; бе же тогда и сам патриархъ зело в велицей скорби пребываше.

И егда же приспе время, тогда святейший патриархъ и весь освященный соборъ, приемше честные и животворящие кресты, идоша по тело благочестиваго царя и, вземъ честныя мощи, понесоша от царьских его полат со псалми и песнми и кандилы благовонными, яко убо и воздуху наполнитися ото многого фимьяма благоухания. Боляре же и весь царьский синклит и всенародное множество, ови убо предидуще, ови же последствующе, друг друга утесняюще, и вси велегласно кричаще и слезами землю поливающе: «О великий государь нашь царь и великий князь Федор Иванович всеа Русии, похвала и красота руская! Камо отходиши, солнце светозарное, нас же, раб своих, сирых оставляеши? И свой царьский скифетръ и превеликий престолъ самодержавного твоего царьствия по себе кому вручаеши?» И ина многа глаголюще, плачющеся неутешно.

Егда же принесоша благочестиваго царя честное тело в соборную церковь архистратиха Михаила, патриархъ же и весь освященный собор, певше надгробное пение, благочестиваго царя тело поставиша в церкви архистратиха Михаила, генваря 7 день, в день суботный. Весь же день той и нощь надъ телом благочестиваго царя и великого князя Федора Ивановича всеа Русии псаломское песнословие непрестанно совершашеся. Назаутрия жь, в день неделный, абие приходит патриархъ и весь освященный собор в церковь архистратиха Михаила. По сем же и благочестивую царицу тамо приносят, занеже от великого скорбнаго сетования и непрестанного плача и самой быти ей исполусмертной. Таже боляре и всенародное множество на погребение благочестиваго царя собираются и глаголы жалостныя испущают и паки воплемъ многим воздух исполняют и слезы яко реки изливают. И гробу уже ископанну бывшу в пределе, архистратиха Михаила в церкве, преподобнаго отца Иванна, списателя Лествицы, идеже гроб приснопамятного отца его, благовернаго христолюбиваго царя и великого князя Ивана Васильевича всеа Русии, и брата его, царевича князя Ивана Ивановича всеа Русии.

Патриарх же и весь освященный собор облекшися во вся священная одежда и наченше погребалное божественное пение. Бе же тогда поистинне видети позор умилен и зело жалости достоин: вси убо архиереи и сановницы и весь освященный собор неумолчно плачющи и с велицем захлипанием непрестанно рыдающе, яко нижё божественного пения от слез по достоинству изправити могуще. Благочестивая же царица от великия печали и сама близ смерти пребывающе, изрядный же правитель прежереченный Борис Федорович сугубу печаль в сердце своемь имущи, ово о отшествии к Богу благочестиваго царя сетуя, ово же и о безмерной скорби благородныя сестры своея благоверныя царицы рыдая, ово же и земнаго правителства тишину и мир со опасением устрояя. Боляре же и всенародное множество вси о преставлении царьском неутешно плачющеся, не яко убо царя ко гробу провожающе, но яко чадолюбиваго отца с нужею разлучающеся; и погребше честно царьское тело со псалмы и пенми и песнми духовными, и плакастася намнозе, якоже целомудренный Иосифъ и братия его[99] надъ Израилем, отцем их.

По сем же патриархъ и всенародное множество христоименитого звания, руце на небо воздевше с воплем многим и со слезами к Богу молящуся, сице глаголюще: «О Владыко Человеколюбче Господи Исусе Христе, сыне Бога живаго, что ради лишил еси нас такова благочестиваго царя, и праведна и свята? Почто убо нас, незлобивый Владыко, оставил еси сиры и смиренны? На кого убо ныне упование возложим? Кто ли ныне толикий народ в мире упасет? Зриши ли, Владыко Человеколюбче, яко бехом днесь во мнозе скорби сетования нашего? Отъял еси от нас царя, но не отъими от нас милости своея и призри, Господи, на град и люди сия, яко пусти бехом, яко осиротехом и бехомъ, яко овца, не имуща пастыря; да не отрынеши ны, Владыко, от твоего человеколюбия. Сокрушил еси — исцели, росточил еси — паки собери, наказав — паки милуй!»

Благочестивая же царица и великая княгиня Ирина Федоровна всеа Русии повеле патриарху и всему освященному собору давати милостыню доволну. Такоже и нищих безчисленно множество собрав, насытив доволна и милостыню пространну подав. Вся же темница и узилища тогда отверзе и сущих в них повинных смерти всех на живот свобожая и в скудости потребных имъ всячески помогая. Сия же вся блаженная царица совершая, царьскую святую его душу ублажая и венец добродетели его тамо украшая.