Том 4 (XII век, литература эпохи «Слова о полку Игореве»)

11. Аще ли челядинъ[1081] съкрыется любо у варяга, любо у кольбяга,[1082] а его за три дни не выведуть, а познають и въ третий день, то изымати ему свои челядинъ, а 3 гривне за обиду.

12. Аще кто поедеть на чюжемъ коне, не прошавъ его, то положити 3 гривне.

13. Аще поиметь кто чюжь конь, любо оружие, любо портъ, а познаеть въ своемь миру,[1083] то взяти ему свое, а 3 гривне за обиду.

14. Аще познаеть кто, не емлеть его, то не рци ему: «Мое», нъ рци ему тако:[1084] «Поиди на сводъ,[1085] где еси взялъ»; или не поидеть, то поручника за пять днии.

15. Аже где възыщеть на друзе проче, а он ся запирати почнеть, то ити ему на изводъ[1086] пред 12 человека; да аще будеть обидя не вдалъ будеть, достоино ему свои скотъ, а за обиду 3 гривне.

16. Аще кто челядинъ пояти хощеть, познавъ свои, то къ оному вести, у кого то будеть купилъ, а тои ся ведеть ко другому, даже доидеть до третьего, то рци третьему: вдаи ты мне свои челядинъ, а ты своего скота ищи при видоце.

17. Или холопъ ударить свободна мужа, а бежить въ хоромъ, а господинъ начнеть не дати его, то холопа пояти, да платить господинъ за нь 12 гривне;[1087] а за тымъ, где его налезуть удареныи тои мужь, да бьють его.

18. А иже изломить копье, любо щитъ, любо портъ, а начнеть хотети его деръжати у себе, то приати скота у него; а иже есть изломилъ, аще ли начнеть приметати, то скотомъ ему заплатити, колько далъ будеть на немъ.[1088]

Правда уставлена руськои земли,[1089] егда ся съвокупилъ Изяславъ,[1090] Всеволодъ,[1091] Святославъ,[1092] Коснячко,[1093] Перенегь,[1094] Микыфоръ Кыянинъ,[1095] Чюдинъ,[1096] Микула.[1097]

19. Аще убьють огнищанина[1098] въ обиду, то платити за нь 80 гривенъ убиици, а людемъ не надобе; а въ подъездъномъ[1099] княжи 80 гривенъ.

20. А иже убьють огнищанина в разбои, или убиица не ищуть, то вирное платити, в неиже вири[1100] голова начнеть лежати.

21. Аже убиють огнищанина у клети,[1101] или у коня, или у говяда, или у коровье татьбы, то убити въ пса место.[1102] А то же поконъ и тивуницу.

22. А въ княжи тивуне 80 гривенъ.

23. А конюхъ старыи у стада 80 гривенъ, яко уставилъ Изяславъ[1103] въ своем конюсе, егоже убиле дорогобудьци.[1104]

24. А въ сельскомъ старосте княжи и в ратаинемъ 12 гривне.

25. А в рядовници[1105] княже 5 гривенъ.

26. А въ смерде[1106] и въ холопе[1107] 5 гривенъ.

27. Аще роба[1108] кормилица любо кормиличицъ,[1109] 12.

28. А за княжь конь, иже тои с пятномъ, 3 гривне, а за смердеи 2 гривне, за кобылу 60 резанъ, а за волъ гривну, а за корову 40 резань, а третьякь 15 кунъ, а за лоньщину полъ гривне, а за теля 5 резанъ, за яря ногата, за боранъ ногата.

29. А оже уведеть чюжь холопъ любо робу, платити ему за обиду 12 гривне.

30. Аще же приидеть кровавъ мужь любо синь, то не искати ему послуха.

31. А иже крадеть любо конь, любо волы, или клеть, да аще будеть единъ кралъ, то гривну и тридесятъ резанъ платити ему; или ихъ будеть 18,[1110] то по три гривне и по 30 резанъ платити мужеви.

32. А въ княже борти[1111] 3 гривне, любо пожгуть, любо изудруть.

33. Или смердъ умучать, а безъ княжа слова, за обиду 3 гривны; а въ огнищанине, и в тивунице, и въ мечници 12 гривъне.

34. А иже межу переореть любо перетесъ, то за обиду 12 гривне.

35. А оже лодью украдеть, то за лодью платити 30 резанъ, а продажи 60 резанъ.

36. А въ голубе и въ куряти 9 кунъ, а въ утке, и въ гусе, и въ жераве, и въ лебеди 30 резанъ; а продажи 60 резанъ.

37. А оже украдуть чюжь песъ, любо ястребъ, любо соколъ, то за обиду 3 гривны.

38. Аще убьють татя на своемъ дворе, любо у клети, или у хлева, то тои убитъ; аще ли до света держать, то вести его на княжь дворъ; а оже ли убьють, а люди будуть видели связанъ, то платити в немь.

39. Оже сено крадуть, то 9 кунъ; а въ дровехъ 9 кунъ.

40. Аже украдуть овъцу, или козу, или свинью, а ихъ будеть 10 одину овьцу украле, да положать по 60 резанъ продажи; а хто изималъ, тому 10 резанъ.

41. А от гривне мечнику куна, а в десятину 15 кунъ, а князю 3 гривны, а от 12 гривну емъцю[1112] 70 кунъ, а в десятину 2 гривне, а князю 10 гривенъ.

42. А се поконъ вирныи: вирнику взяти 7 ведоръ солоду на неделю, тъже овенъ любо полоть, или две ногате; а въ среду резану въже сыры, в пятницу тако же; а хлеба по кольку могуть ясти, и пшена; а куръ по двое на день; коне 4 поставити и сути имъ на ротъ, колько могуть зобати; а вирнику 60 гривенъ[1113] и 10 резанъ и 12 веверици, а переде гривна; или ся пригоди в говение рыбами, то взяти за рыбы 7 резанъ; тъ всехъ кунъ 15 кунъ на неделю; а борошна колько могуть изъясти; до недели же виру сберуть вирници. То ти урокъ Ярославль.

43. А се урокъ мостьниковъ:[1114] аще помостивше мостъ, взяти от дела ногата, а от городници[1115] ногата; аще же будеть ветхаго моста потвердити неколико доскъ, или 3, или 4, или 5, то тое же.

ПЕРЕВОД

РУССКАЯ ПРАВДА