Том 5 (XIII век, литература трагического века)

Азъ есмь Иоаннъ, царь и попъ, над цари царь, имею под собою 3000 царей и 300. Азъ есмь поборникъ по православнои вере Христове. Царство мое таково: итти на едину страну 10 месяць, а на другую немощно доитти, занеже тамо соткнуся небо з землею. Есть у мене в единой стране люди немы, а в ыной земли люди рогаты, а в ыной стране люди трепяцдци, а иныя люди 9-ти саженъ, иже суть волотове, а иныя люди четвероручны, а иныя люди о шти рукъ. А иныя у мене земля, в нейже люди пол пса да пол человека, а иные у мене люди в персех очи и рот, а во иной земли у мене люди верху рты великы, а иные у мене люди скотьи ноги имеюще. Есть у мене люди пол птици, а пол человека, а иныя у мене люди глава песья; а родятся у мене во царствии моемъ зверие у мене: слонови, дремедары, и коркодилы и велбуди керно. Коркодилъ зверь лютъ есть, на что ся разгневает, а помочится на древо или на ино что, в той час ся огнем сгорит. Есть в моей земли петухы, на нихже люди яздят. Есть у меня птица ногой, вьет себе гнездо на 15 дубовъ. Есть в моемъ царствии птица финиксъ, свивает себе гнездо на новъ месяць и приносить от огня небеснаго и сама зажагаеть гнездо свое, а сама ту тоже сгараеть; и в том же попеле заражается червь, и опернатееть, и потом та же птица бываеть едина, боле того плода нетъ той птици, 500 бо лет живеть. А посреди моего царства идеть река Едемъ из рая, в той реце емлют драгий камень акинф и самфиръ, и памфиръ, и измарагдъ, сардикъ и аспидъ, тверд же и аки угль горящь. Есть камень кармакаулъ, той же камень господинъ всем камениемъ драгим, в нощи же светит, аки огнь горить. Есть у мене земля, в ней же трава, еяже всякъ зверь бегаеть. А нетъ в моей земли ни татя, ни разбойника, ни завидлива человека, занеже моя земля полна всякого богатьства. А нетъ в моей земли ни ужа, ни жабы, ни змеи, а хотя и воидеть, ту и умреть. Есть у меня земля, в ней же ражается перець, вси людие по то ходять. Опроче всех есть у нас море, песочное езеро, да николиже не стоить на едином месте, отколе ветр потянеть, ино поидеть валъ и восходять те валы на брег за 300 верстъ. Того же моря не преходить никаков человек ни кораблем, ни которым промыслом. И за тем морем не ведает никаковъ человек, есть ли тамо люди, нет ли, и с того моря в нашю землю текут рекы многи, в нихже рыбы сладкы; и посторонь того моря за 3 дни суть горы высокы, от них же течеть река каменна; валится камение великое и малое по себе 3 дни. Идет же то камение в нашю землю в то море песочное, и покрывают валове моря того и. Близ тоя рекы едино днище есть горы пусты высокы, ихже верха человеку не мощно дозрети, и с тех горъ течеть река под землею невелика; но во едино время разступается земля над рекою тою, и кто узревъ да борзо воскочит в реку ту, того ради да бы ся о немъ земля не соступи, а что похватить и вынесеть борзо, оже камень, той драгий камень видится, а яже песок похватить, то великы женчюгъ возмется. Та же река течеть в великую реку, люди же тоя земли ходят на устье рекы, а емлють драгый камень четьи и женчюгъ, а кормят свои дети сырыми рыбами; и понирають в реку ту иныя на 3 месяци, а иныя на 4-ре месяци, ищуть камения драгаго. За тою рекою едино днище есть горы высокы и толсты, нелзе на них человеку зрети. И с техъ горъ пылаеть огнь по многым местом, и в том огни живут черви, а безо огня не могуть жити, аки рыбы без воды, и те черви точать ис себе нити, аки шиду, и в тех нитех наши жены делагот намъ порты, и те порты коля ся изрудят, водою их не мьют, вергут ихъ в огонь, и како разгорятся, ини чисти будут. Есть у мене во иной стране звезда именем Лувияарь.

А егда поидем на рать, кому хощем болшей работе предати, идут пред мною и несут ту 20 крестовъ и 20 стяговъ. Те же кресты и стязи велици злати с драгими каменми и с великыми женчюги зделани, в нощ же светят аки в день. Те же кресты и стязи идут на 20-ти колесницах и 6-ти, а у которыя же колесница служат по 100 тысящ конник, а по 100 тысящ, пешие рати, опричь тех, которыя на нас брашно везут. А коли поидем к нарочиту месту на бой, ини несут пред мною единъ крестъ древянъ, на немже изображено Господне распятие, того ради да быхом поминали Господню страсть и распятие. Сторонь того креста несут блюдо злато велико, на немже едина земля: на землю зряще, поминает, яко от земля есми создани и паки в землю поити имамы. А се с другую страну блюдо несут другое злато, на немже драгий камень и четей женчюг, на ньже зряще величается наше господьство. Идут же пред мною 3 проповедници, возглашают велиимъ гласомъ. Единъ вопиеть: «Се есть Царь царемъ, Господь господемъ», а другий вопиеть: «Силою крестною а Божиею благодатью и помощию». А третий вопиеть умилным гласомъ, яко: «От земли есмы сътворени и в землю паки поити имамы». И пакы же престанемъ глаголати. О силе же не глаголю, якоже бо рекох.