Том 5 (XIII век, литература трагического века)

Дворъ у мене имею таковъ: 5 ден ити около двора моего, в немже суть полаты многы златыя и сребреныя и древяни изнутри украшены, аки небо звездаи, а покровены златом. И в той полате огнь не горить; аще ли внесут, в той часъ огнь погаснет. Есть у мене иная полата злата на осмидесят столповъ от чистаго злата, а всякий столп по 3 сажени в толстоту, а 80 саженей в высоту. В тойже полате 50 столпов чистаго злата, на всех же столпех по драгому камени. Камень самфир имат свет бел, камень тонпазъ аки огнь горить. В той же полате есть столпа два: на едином столпе камень, имя ему тропъ, а на другом столпе камень, имя ему кармакаулъ, в нощи же светить камень той драгый, аки день, а в день, аки злато, а оба велики, аки корчаги. В той же у мене полате огнь не горить: аще внесут, то борзо погаснет: разве бо той огнь горит, идеже идеть из древа негнеющаго, имя древу тому шлема. Того мира вливают в паникадила и зажигают, ино той огнь горить и темъ миром в которую верству помажется человек, старъ или молод, боле того не стареется, а очи его не болят. Та же полата выше всех полат. Верху тех полат учинена два яблока златы, в нихже вковано по великому каменю самфиру, того ради, дабы хоробрость наша не оскудела. Суть бо 4 камени на столпех того ради, дабы потворници не могли чаровъ творити над нами. Есть у мене иная полата злата велика, какъ очима видети, на столпех златых; два велики камени кармакаулъ в нощи светять в той же полате у мене.

А обедають со мною на трапезе по вся дни 12 патриархов, 10 царей, 12 митрополитов, 45 протопоповъ, 300 поповъ, 100 диаконов, 50 певцевъ, 900 крилосников, 365 игуменов, 300 князей; а во зборной моей церкви служать 300 игуменовъ да 65, да 50 попов, да 30 диаконов, и обедают со мною; а столничают у мене и чаши подають 14 царей да 40 королей, да 300 боляръ; а поварню мою ведают два царя да два короля опроче боляръ и слугъ. Те же цари и короли бывъ, да прочь едут, а иныя приежчают.

А еще у мене лежить апостолъ Фома.

Есть у мене земля, в нейже суть люди, очи у них в челах. Есть у мене полата злата, в неиже есть зарцало праведное, стоить на 4-рех столпех златых. Кто зрит в зерцало, той видить своя грехи, яже сътворил от юности своея. Близ того и другое зерцало цкляно. аще мыслить зло на своего господаря, ино в зерцале том зримо лице его бледо, аки не живо. А кто мыслить добро о осподаре своем, ино лице его в зерцале зримое, аки солнце. А во дворе моем церквей 150, ины сътворены Богомъ, а ины руками человеческыми.

ПЕРЕВОД