Том 5 (XIII век, литература трагического века)

Подготовка текста, перевод и комментарии О. А. Белобровой

ОРИГИНАЛ

Фисилогъ и о лве. Три естества имат левъ. Егда бо раждает лвица мьртво и слепо раждает, седит же и блюдет до третьего дьни. По трех же днех приидет левъ и дунет в ноздри ему и оживет. Тако и о верных языцехъ. Прежде бо крещениа мьртви суть, по крещении же просвещаються от Святаго Духа.

Второе естество лвово. Егда спит, а очи его бдита. Тако и Господь наш рече ко июдеом, якоже: «Азъ сплю, а очи мои божественыа и сердце бдита»[898].

А третье естество лвово: егда отбегает лвица, хвостом своим покрывает стопы своя. Да не может ловець осочити следа его.

Тако и ты, человече. Егда твориши милостыню, да не чюет леваа рука, что творит десница твоя. Да не возбранит дьяволъ дело помысла твоего.

О утропе. Утропъ имать два рога. Живет же близъ рекы акиана на крайны земли. Да егда ся вожедает, пьет от нея и упиваеться и бореться со землею и чешет роги своими. И есть же тамо древо нарицаемо танисъ, подобно зело винней лозе добрами ветми и густо прутиемъ и чеша прутиемъ соплетаеться в них и обретаеть его ловець и удолееть ему.

Тако и человекъ. В рогъ место далъ ему есть Бог оба Завета, Ветхаго и Новаго. Рогы противныа сили, якоже рече пророкъ Давидъ: «О тобе врагы наша избодем рогы».[899] Река акианьска есть богатъство. Танис же — сласть житейскаа. Да въплетаяся человекъ не брежет о вере, но обретъ и дьяволъ и удолеет ему.

О слоне. Слонъ живетъ на горах. Слоница обрящет былие, нарицаемое мандрагураи[900] и взимает от нея. Тако же и слонъ и гиниться с нею. И егда раждаеть, взаиит в реку до вымене и раждаеть в воде. Спить же при древе. Да егда падется от него, вопиеть и приидет слонъ великъ и не может возвести его и пакы друзии 12. Да ни ти. Да тогда же возопиете оба на десяте. И приидет инъ малъ и подложитъ ротъ свой и возметь и.

Сиречь первый слонъ Евга, вторый Адамъ. Былие древо преслушаниа. А еже вкуси, яко преступи. А еже «увы мне», яко съгреши. И что озеро? Рожеству рай. И что приклоннаа древеса? Оплота райскаа. И кто сикырою изпадаа? Дьяволъ. И кто сикира? Языкъ змиевъ. И еже паде, яко изгнан бысть. И кто великий слонъ? Моиси. И кто 12 слона не могше извести его[901] и кто изведе его? Христос. То бо возведе того Адама от ада[902].

О елени. Елень живеть 50 лет. И по сем ходит по странах и во дрязгах горьских пухает змии, да идеже налезет ю, облинавшюю трижды, обухает ю и пометаетъ ю. И шедъ пьеть воду. Аще ли не пьеть, то умирает. Аще испьеть, да живет другую 50 лет. Да сего деля рече пророкъ, якоже желает елень на источьники водныя.[903]

Тако и ты, человече, три обновлениа имаши в собе: крещение, покоание и неистление. Да егда согрешиши, теци ко церкви и ко источнику живу книжну и на сказание пророческое и пий воды живы, сиречь святое комкание.

О орле. Орелъ живет лет сто. И ростеть конець носа его. И ослепнете очи его. Да не видит и не может ловити. Да возлетит на высоту, свержет себе на камень и уломиться конецъ носа его и куплеться во злате езере. И сядет прямо солнцю. Да егда ся согреет, спадут чешюи с него и пакы птенець будет.

Тако и ты, человече, егда много согрешиши, взыди на высоту, сиречь в веру и плачися предложение греха и измыйся слезами своими. Согрейся въ церкви и сверзи с себе грехи.

О финиксе. Финиксъ красна птаха есть паче всех и павы красней. Пава бо ни златом, ни сребром образъ имета, а финиксъ уакинфовъ[904] и камениа многоценна. Венець носит на главе и сапогы на ногу, якоже царь. Есть же близъ Индея, близъ Солнечна града.[905] Лежить же лет 500 на кедрех ливаньских безъ брашна. Питаеть же ся от Святаго Духа. И по пяти сотъ лет исполняеть крыле свои от добрых вонь. И клепает ереи Солнечнаго града и идет птаха та ко иерееви и входит во церковь. И сядет на степени олтарном[906] иерей со птахою. И будет все попелъ. И заутра прииде ерей и обрящет птицю птенець младъ бывшь. И по двою дньма обрящеть ю совершену, якоже и преже была. И целует ю иерей и пакы отиде на свое место.

Да како неразумнии жидове не яша веры тридневному воскресению Господа нашего Иисус Христа. Яко сию птицу самъ оживляеть, да какъ самъ себе не востави. Сего деля пророкъ Давидъ глаголеть: «Праведникъ яко финиксъ процвететь, яко кедръ ливаньский умножится, насаждение в дому Господни».[907]

О иряби. Ирябь много яець пологает на гнезде своем. Любива же и чадом своим. Да идет на чюжда гнезда и крадет яйца ихъ. Да ся умножать чада ея.

Тако и ты, человече, елико богатьство сбираеши не имаши сыти, но еси на все несытъ.

О горлици. Горлица мужелюбица птах есть. Да аще бо погибнет единъ ею, отходит другаа в пустыню и сядет на усохле древе, плачющись подруга своего. И к тому не спряжеться сь имъ николиже.

Тако и ты, человече, отлучился еси жены своея к тому не приле-пися к ней.