Том 5 (XIII век, литература трагического века)

О неясыти. Неясытъ чадолюбива птах есть. Проклеваеть бо жена ребра птенцем своимъ. А онъ приходит от кормли своей. Проклюет ребра своя, да исходящи кровь оживляет птенца.

Тако и Господь наш, от жидовъ копием ребра его прободоша. Изыиде кровь и вода. И оживи вселеную, сиречь умершаа.

Сего деля и рече пророкъ яко уподобихся неясыти пустынней.[908]

О ластовици. Ластовица в пустыни гнездо имат на распутии. Егда же ослепнет едино от птенець ея, идет в пустыню и принесет былие и положит на очию его. И прозрит.

Тако и ты.человече, егда съгрешиши, иди к молитве и приими покоание и единосущныя ради Троица избавишися греха того.

О вдоде. Овдод творит гнездо свое и воспитает птенца своя. И посемъ облинают сами и будут нази. Да исходит единъ от птенець их и приносит пищу родителемъ своим, дондеже опернатеють и возлетита оба.

Тако и ты, человече. Егда ся состарееши, не отчай себе, но шед к церкви помолися и обрящеши милость.

О дятле. Дятелъ пестра птица есть, живет же в горах и ходит на кедры и клюет носом своим. Да где налезеть мякко древо, ту творит гнездо свое.

Тако и дьяволъ бореться со человекы. Да в нем же налезет слабость и небрежение молитвы, внидет в онь и вогнездяться. В нем же ли обрящет бодрость; бежит от него.

О лисици. Лисица егда будет голодна, идеть на место солнечно и ляжет на присолньи и держит душю свою надметься. Видевше же ее птици, мняще мьртву, приидут да едят. Да егда ся приближат к ней воскочивши и имет от них и есть. И тако ся кормит[909].

О жене и о мужи. Есть жена на западе, а мужь на востоце. Да совокупляетася оба. И изьес мужа своего жена главу и зачнет и родит двое. Да яко же родит, ту изьедят своя чада. И абие умрет. И отидет мужь на востокъ, а жена на западъ.

Тако и ты, человече, егда ти найдет житейскаа напасть, теци въ церковь и прослезися и возопи. И отступить от тебе неприазнъ.

О Горгони. Въргони[910] обличие имат жены красны и блудница. Владь же главы своеа суть змиа. А видение ея смерть. Играет же и смееться во время свое. Живет же в горах западных. Да егда приидут днье ея, да ся гонит. Станеть и начнет звать. Наченши от лва и прочаа звери, от человека до скотины и птиць и змиа, глаголющи: «Идете ко мне». Да елико их услышат глас ее, идуть к ней. И видевше ю, измирают.

Тако бо разумеет всякъ языкъ всем зверем, которым же образомъ уловляеть ю волхвъ, разумеет хитростию своею от звездъ день, в ня же ся гонит. И поидеть на место ея, волхвуя отдалеча. Она же начнет звати, наченши от лва и прочая звери.

Егда же доидет языка волхвова, отзовется ей, глаголя: «Ископай яму на месте и вложи в ню главу свою, да ее не вижу и умру. И прииду и лягу с тобою». И сотворит тако.

Тогда шедше волховъ посечеть ю за ся зря и не видить главы ея, да не умреть. И вложит ю во сосудину. Да егда узрит змиа или человекъ или зверь, кажеть имъ главу Горгонину и абие оцепенеють и Александръ[911] бо имяше ю и одоляше языком всем. И ты, человече, имей смыслъ ко Господу и удобь одолееши противным силамъ.

О змии. Змиа егда поидет пити води, ядъ свой въ гнезде своем оставляет. Да не последи пьющиа уморит.

И ты, человече, егда идеши во церковъ святую, всяку злобу остави домаси.

И пакы, егда состареет змиа и не видит, шедши влезеть в камену расселину узку и поститься днии 40 и смирит себе и излинет и пакы млада будет.

И ты, человече, постился еси 40 день, да совлачися от льсти дьяволя и облечися в новый, обновляющийся во Христа.

И пакы, егда узрит человека змиа, бежить от него. Аще ли не узрит его совлечена, пришедши бореться с ним. Аще ли есть оболоченъ верою, бежит от него.

Сего ради Господь рече: «Бывайте умни, яко змиа и цели яко голуби».[912]

О голуби. Голубъ славно есть во птицах. Разумей же о белей и о черней голубици, како ходят белыи и пестрыа и черныа и чермьныя и кормят птенци свои во сыне голубичи. Да не могут о собе возлетати, дондеже обыйдет чермнаа голубица и подаст имъ пищу не возлетять.

Тако и Спасово пришествие реша пророци, Моиси и Аронъ, Самуилъ, Данилъ, Малахиа, Исайя, Иеремиа и прочии пророци о Иисусе. И не могоша уреснити своего слова, дондеже прииде черьмнаа голубица, Иоан Креститель, то бо крести Иисуса, глаголя: «Се агнець Божий, воземляй грехы всего мира»[913]. И ты, человече, не вдаляй себе от церкви; да не вуслышиши: «Не веде васъ».

О ехидне. Ехидна есть, от полу и выше имать образъ человечь. А полъ ея и ниже имат образ коркодилъ. Ходита же и мужь и жена оба накупь, Да егда ся разгорит жена и хощется гонити, идеть к мужеви, изьесть лоно его. И зачнет и абие умрет муж ея. Да егда приближать родит жена, изьедят чрева ея чада своя. И умрет и та. И потом изыидут отцюубийци и материубийци, якоже и жидове отцуубийци и материубийци.

Убиша отца, сиречь Христа, убиша матерь, сиречь церковь. Сего ради Иоан поноси ими, глаголя: «Чада ехиднова, кто показа вам бежати от грядущаго гнева?»[914]