Том 6 (XIV - середина XV века, литература времени национального подъема)

А оттоле идохом къ святому Димитрию, ту лежит тело святаго царя Ласкариасафа, тако бо бе имя его, и целовахомъ, грешнии, тело его. Той есть монастырь царевъ, стоить при мори, и ту есть близ монастыря того живет жидовъ много при мори, възле городную стену, и врата на море зовутся Жидовская. И ту было знамение: приходилъ Хозрой,[24] царь перскы, ратию къ Царюграду, и уже хотяше взяти град, и бысть въ Цариграде плачъ великъ. Тогда прояви Богъ старцу некоему и рече: «Вземше поясъ святыя Богородица, и омочите конець его в море». И сътвориша тако с пениемъ и плачем, и възмутися море и разби корабля их о градную стену. Тоже и ныне кости их белеются, аки снегь, при градной стене, близ Жидовскых вратъ.

Таже идохом ко святому Иоанну, въ Студискы монастырь, много бо суть ту видениа — не възможно писати — и целовахом тело святаго Савы повара: 40 лет варилъ на братию ясти. А другое — тело святыя Соломаниды. И ту стоит лотокъ, на нем же вообразися святая Богородица съ Христомъ: проскурникъ всыпа муку на доску и възлия воду, и въскрича отрочя в муце на доске. И проскурник, ужасеся, тече къ игумену и братии. И прииде игумен и братия и видеша на досце образ святыя Богородица съ младенцем съ Христомъ. Церковь же та велика велми и высока, полатою сведена, иконы в ней, аки солнце сиають, велми украшены златом, а дно церковное — много дивитися: аки женчюгом иссажена, и писцу тако не мощно исписати. Тако же и трапеза, идеже братия ядять. Велми чюдно, паче инех монастырей, стоит на краи, близ Златых вратъ. Ту жилъ Феодоръ Студискы[25] и в Русь послал многы книги: Устав, триоди и ины книгы.

И оттоле идохомъ в Перевлету, рекше, к Прекрасней Богородици в монастырь, и целовахом руку Иоанна Крестителя[26] и Симеона Богоприимца[27] и Григориа Богослова.[28] И оттоле идохом къ Аньдрею Критскому,[29] той есть монастырь женскы велми красенъ, и целовахом мощи святаго Андреа. И оттоле идохом къ святому патриарху Тарасию и целовахом мощи его, и оттоле идохом къ святей Еуфимии и целовахом мощи ея. Оттоле идохом къ святей Богородици в монастырь и целовахом святую Елисаветь. И оттоле идохом къ святому пророку Даниилу, пришед къ церкви поити ис под земли степеней 25, съ свещею ити; на правой руце — гробъ святаго пророка Данила, а на левой руце — святаго мученика Никиты. И целовах ихъ грешнии, и печять взяхом святаго пророка Данила.[30] И оттоле идохом къ святому Иоанну Милостивому[31] и къ святей Марии Клеопине и къ святей мученици Феодосии, юже заклаша рогамъ козиимъ за икону Христову. Ти святии лежать въ единой церкви высоко ити по лествице горе, тоже внити въ церковь, и целовахом, грешнии. И оттоле поити на гору къ Апостольстей церкви, и ту целовахом мощи святаго Спиридона и святаго Полиекта. И, пришед къ олтарю — на правой руце гробъ святаго Григориа Феолога в преграде олтарьней, ту же гробъ Иоанна Златоустаго, ту же близ икона в киоте святы Спасъ, в ню же ножем удари неверный и поиде от иконы кровь. Тоже и до ныне кровь та знати, и целовахом, грешнии. А от великых дверей по правой руце стаятъ два стлъпа: единъ, идеже бе привязанъ Господь нашь Исус Христос, а другы, на нем же Петръ плакася горко.[32] Привезены от Иерусолима. Единъ толъстъ, иже бе Исусовъ, от зелена камени, прочернь, а други, Петровъ, — тонокъ, аки бревенце, велми красен, прочернь и пробель, аки дятленъ. А олтарь ту среди церкви велик, и пошед от олтаря прямо на въстокъ по церкви — ту стоит гробъ царя Константина, велик, от камени багряна, аки аспиду подобна: инехъ же много гробовъ царьских, но не святи. Ту целовахом грешнии.

А оттоле идохом к Спасу великому монастырю, рекше Вседръжителю: внити въ врата пръвая, и есть над враты Спасъ мусеею утворенъ, великъ образом, а высоко. Тако же и въ другая врата внити, тоже в монастырь внити. Велми красенъ, а церковь мусеею удивлена изовну, аки сиаеть. Ту доска Господня лежить, ту же 3 главы лежать — Фрола, и Лавра, Якова Перьскаго, ту тело Михаила Черноризца без главы; ту же стоит въ олтари сосуд от бела камени, в нем же Исус от воды вино сътвори — велми чюдно.

И оттоле идохом къ святому Констянтину, в монастырь женски; ту лежит тело святаго Климента архиепископа, ту же тело и Феофаны царица. И оттоле идохом къ святому Ивану Дамаскыну[33] в монастырь женьскы. А оттоле идохом къ святому Ивану Предтечи, иже нарицается Продром, зовуть Ивана «Богомъ богаты». Та же церковь велми удивлена, и ту целовахом руку святаго Иоанна Ктитора, иже устрои церковь, окована златом и с драгим камениемъ и женчюгом; а не Предтечева рука — а Предтечева, иже впреди писахом, у Прекрасной Богородицы близ Студискаго монастыря: ту рука святаго Иоанна правая, а левая на Иердане.