Творения

Инок есть исполнитель всех заповедей Христовых, совершение христианства, бездна смирению, столп терпению, память незабытная смерти, источник неоскудный слезнаго течениа, сокровище чистоты, ругатель тленным, попратель всех красных и прелестных мира сего: самоволный мертвец, повседневный мученик, и нужник, богоприятная жертва, присно горящий светилник премудрости духовной, ум просвещеный, соглядатель всех видимых и невидимых, скорошественная молниа богомышлениа, сердце чисто, немолчная уста хвалы Божия, жилище Святыа Троица: позор аггелом и человеком и человеком. страшило бесом. Инок есть наречен; понеже имать иное житие не телесное: но духовное. иное деание, ин век ему, иная пища, иное одежды и работа: нарицаетжеся и черноризец от честной и плачевной одежды. нарицается и монахос албо уединеный, безпечалный, един с единым токмо Богом причастие должен есть имети. Сих законоположницы и учителе суть; Первый Мелхиседек священник Бога Вышнего живущий без жены, и без причта рода в пустыни. Второй Илиа чюдный, живший без жены в пустыни Хоривской. Третий Иоанн святый Креститель, живший в пустыне Иорданской без жены, кроме всякаго стяжаниа, не ядый мяса и вина не пив, одежду плачевную нося волосяницу. О законе и давности чину иноческаго; ясно покажем, яко самым Господом нашим Iсус Христом узаконен есть и утвержден. Сам убо Господь жив без жены житием чистым, в девстве убогим и бездомным нестяжателным. Такожде и апостоли его вся оставлши [Матф. 19] отца и матерь, жену и чада, и вслед Христов сами и шли, оставивши вся яже в мире. Сего ради иноцы последуют Христову учению и совету, и житию апостольскому ревнуют; вся убо красная и прелестная оставляют в мире, гордость житейскую, и похоть всех красных. оставляют женитву веселие и покой телесный, и богатство временное. Сами же идут вслед Христа, вземши крест свой; доброволное терпение, и убожество, и бездомство, сами скитающеся в пустынях и горах: и вместо светлых домов, живут в темных яскинях, в вертепах и в пропастех земных, вместо жены и детей, живут в пустынях со зверми земными, и птицами небесными, вместо светлых риз, и сладких брашен, и питий: волосяница худая риза, алкание, и в жажде мало воды. вместо смеха и веселиа: плачь и воздыхание, и слезам пролитие. ложе их земля, а покров небо: то их истый крест. терпение повседневнаго. Того ради иноцы погордели житейским суетием, и не обязуются житейскою куплею, женою детьми и домами. богатством не обтяжаются, даже удобнейше возмогут послужити, и угодити Богу. Темже лучше себе избирают безженство; всяк бо оженивыйся печалуется како угодити жене; такожде и жена мужеви: а не оженивыйся печалует како угодити Господеви своему, и тому верно послужит. Ктому уже и се да познают, яко еже жити с женою по естеству се есть, тако живут и зверове, и поганы: а еже жити без жены в девстве и чистоте: се чрез естество, ангельское убо се дело, и житие святых угодников Божиих, иже всегда работают Господеви, яко апостол глаголет [1 кор. 7], аще кто постится и молитву деет, таковый да отлучится жены на время. Но иноцы всегда пребывают в посте и молитве, даже до смерти: сего ради жен не имеют. но и в законе ветхом повелено [2 Моис. 14] да приступающии к Богу, жен отлучатся. Иноцы всегда Господеви предстоят в службе его, сего ради жен отлучишася даже до смерти. и тако в чистоте работают ему, яко присныи рабы его. Аще еретицы и злоречат иноков, аки бы они имели гнушатися пищи, и брака, приводят на них слово апостольское, идеже пишет [1 Тим. 4], яве Дух глагола, яко в посладняя времена отступят неции от веры, внемлющи духом лестным, и учениам бесовским, возбраняющи женитися, и удалятися от брашен, яже Бог сотвори. Сеже пророкова апостол о разных еретиках хотящих по нем быти. яко о манихиех, о марцианех, и свенетех, и евкратианех богомерских. тии бо манихеи мнеша двух богов быти разных, единаго бога в небе добраго; а другаго на земли злаго миродержителя [Епифан. на еретики глав. 26]; зле вменяя апостольское слово: и тако свою проклятую ерсь разсевали. гнушалися брашны сотвореными на земли, и проклинали их первее аки бы от злого бога сотвореными: а потом аки бы благословили их, и ели. По сих же настали лютыи и мерзскии еретицы адамитове, иже гнушалися браком честным, и обще имели жены вси, и блуды нечистоты в них полно всюду; таковыи еретицы держали бесовское учение лестное, понеже бесове их прелстиша. /Потребник иноческ. лис. 325 об./