Житие Сергия Радонежского

От царя и великого князя Михаила Федоровича всеа Русии Живоначалные Троицы в Сергиев монастырь богомолцу нашему архимариту Дионисию да келарю старцу Аврамью Палицыну з братьею. В нынешнемъ во 125-м году, октября в 5 день, писал к намъ из Стародуба столник нащъ и воевода Олександро Нагово да Иван Кологривов, что сентября в 20 день пришел под Стародуб Лисовской с Литовскими людми и стояли под городом полтора дни и отошли от Стародуба десять верстъ. И сентября же де в 26 день приѣхали на наше царское имяв Стародуб Литовских людей пять человѣкъ, а в роспросе сказали, что Лисовской с воинскими людми пошол из Стародубскаго уѣзду в Комарицкую волость, и как будет от Стародуба дватцать восмь верстъ, и Лисовскому учинилася смерть вскоре: спал с коня и издох при них сентября в 25 день, на чюдотворцову Сергиеву память. Да октября же в 14 день писали к нам изо Брянска князь Иванъ Дашков да Василей Протопоповъ, что привели к нимъ в языцех Литвина Лисовского же полку, и тотъ Литвин в роспросе сказал, что Лисовской умер скорою же смертию, поразила ево невидимая сила Божия и богомерзскую свою душу злѣ извергъ. И вы б, слыша такое милосердие Божие и Пречистые Богородицы и великого чюдотворца Сергия к нам и ко всему християнскому родуявное помогание, что пресвѣтлою его памятью и невидимым предстательством таковаго злаго врага и губителя Богъ сокрушил, воздали хвалу всесилному в Троице славимому Богу нашему о Ево премногих на нас щедротах и Пречистой Ево Богоматери, заступнице нашей, и Их великим угодникомъ чюдотворцу Сергию и Никону, и учинили бы естя о томъ предивному нашему и всему християнскому помогателю великому чюдотворцу Сергию празнество нарочно полное со всѣмъ торжеством и молили в Троице славимаго Бога и Пречистую Ево Богоматерь и великих чюдотворцовъ Сергия и Никона, чтоб милостивый в Троицы славимый Богъ нашъ подал намъ побѣду и одоление на вся видимыяи невидимыя враги наша, и царство б наше учинилъ тихо и мирно и безмятежно, и покорил бы Г осподь Богъ под ноги наша вся языки, хотящих бранемъ, и братью бы есте ве[лѣ]ли накормить доволно. Писан на Москвѣ, лѣта 7125-го октября в 16 день.

14. О женѣ исцелившей молитвами Святаго

После Литовского разорения вскоре, егда свободи Господь монастырь святого чюдотворца Сергия от осады, бысть в слободѣ слуга именем Яков Дементьевъ з женою своею Наталиею. Живяста во благочестии, игры женикакие и глумления отнюдь ненавидяста, пребывающе во смирении, ходяще в заповедех Господних и к церкви Господни прихожаста выну. По случаю же нѣкоему случися имъ нѣгдѣ бѣседовати в той своей слободѣ, и приидоша скомороси, начаша играти во всякие свои игры и глумитися всякими глумы, яко же их диявол научилъ на прелесть малоумным человѣком. И приступиша глумотворцы тии к Наталии, просяще мзды своего глумления. Она же отврати от них лице свое благоумное и отрече имъ: глумления вашего зрѣти не хощу и игры бѣсовския не слушаю и денегъ не дамъ. Они же окаяннии, наполнившеся бѣсовскаго духа и разпыхавшеся на нея, отъидоша, похвалившесяи нѣкиимъ дияволскимъ ухищрением изпортивше ея, наведоша на нея болѣзнь люту, яко и лице ея обратися в тыл. Она же, видѣвъ на себя таковую злую напасть, не пожелав от них окоянных ползы, яко же есть в мирѣ мнози творятъ, от кудесников помощи ищут, но возверзе все свое упование на Бога и на самого преподобнаго Сергия чюдотворца, яко могущаго упросити у Спаса и подати ей исцеление. И прииде в монастырь, припаде к преподобнымъ мощемъ его со слезами, да исцелит ея от напрасныя тоя бѣды. Скорый же к помощи по молебномъ пѣнии вскорѣ исцеление дарует ей: бысть здрава попрежнему, яко б николи же болѣв, отъиде в дом свой, радуяся, благодаря чюдотворца Сергия, давшаго ей здравие. По умертвии же мужа своего, по нѣколицех лѣтех, в Пятницкомъ дѣвичье Долнемъ монастырѣ восприя на ся иноческий чин, прилѣжа Божии церкве, в постѣ и в молитве и в нищелюбии мнозе живот свой препроводивъ.

15. О нѣкоемъ велможи, давшаго отчину свою в монастырь, и о гнѣве Божии, иже не исполниша обещания его