Житие Сергия Радонежского

В лѣта 7148-го году во обители Святыя Троицы и преподобнаго чюдотворца Сергия бысть слуга именем Богдан зовомый Дементьев. Сей отпустив сына своего именем Петра, юна суща, во град нарицаемый Тверь ко архиепископу ту сущему в службу. И нѣколико лѣт пребывшу ему тамо в службѣ у пресвященнаго архиепископа, и нападе на него болѣзнь тяжка и ума зелно изступив, яко же и людей в лице не познаваше, и ни отца, ни матере можаше возпомянути. И в таковѣй болѣзни пребысть не мало время, и до пяти седмицъ молитвы[921] изо устъ глаголати не возмогоша его принудити. Послѣди же приведен бысть от града Твери под Троицкий Сергиев монастырь в слободу, идѣ же родися и воспитан бысть, к отцу своему и матери и к сродником своим, и ни тѣх можаше познавати, такова болѣзнь одержаше его. Родителие же его, видевше его, зжалишасяо нем, ведоша его в монастырь в церковь Святыя Троицы к мощем преподобнаго чюдотворца Сергия. Сему же изрывающесь от рук водящих его и не хотящу внити, но едва привлекоша его многою мощию ведомых его и держаша его крѣпко, донде же молѣбное пѣние исполниша о нем, и по молебномъ пѣнии нача болѣзнь его тишети. И помале бысть здрав от болезни, отъиде, благодаря Бога и Пречистую Богородицу и преподобнаго чюдотворца Сергия.

19. О отрокѣ Иванне, спасшемуся от разбойник молитвами Святаго

Бѣ нѣкий отрокъ именем Иван зовомый Махов, отца имѣя у себе в Рыбномъ ряду торгующа. И понужаем бысть отцемъ своим законному браку сочтатися, ему же не хотящу сего, но моляше родителей своих, да не понудятъ его. И просився у родителей своих праздновати празникъ преподобному чюдотворцу Сергию, иже празднуется июля в 5 день на обрѣтение честных мощей его, и не пождавъ спутников своих, иде един, вѣрою влеком ко святому. И на пути ят бысть от разбойникъ, и совлекоша с него одѣяние и устремишася на убиение его. Дастъ же ему Господь Богъ благий помыслъ призвати преподобнаго[922] Сергия чюдотворца на избавление напасти тоя, нашедшия на него. И внегда в мысли своей толико помянувъ Святаго, они же немилосердии яко изумлени сташа и оружия своя изпустиша. Отведоша же его в чащу лѣса и привязаша его нага к древу, отъидоша. И надолзе паукомъ и комаром и мшицам ядуще его, и мало смерти не прием, отчаявся живота своего, и паки воспомянувъ преподобнаго чюдотворца Сергия и нача призывати, да избавитъ его от горкия тоя смерти. И видит грядущак себѣ старца, свѣтолѣпна образом, нося с собою в руках одѣяния. И свободивъ его от связания и давъ ему одѣяние и рече ему: иди в дом Святыя Живоначалные Троицы в Сергиевъ монастырь, и желание свое получиши. И се рек, невидим бысть. И разумѣвъ отрок той святого старца быти самого преподобнаго чюдотворца Сергия, избавльшаго его от лютыя смерти, и прииде во обитель его и, ни мало помедливъ, восприемлетъ на ся иноческий чинъ и пребысть до своего живота, благодаря Бога и святаго Сергия.

20. О нѣкоемъ человеке, иже от разбойник спасенъ бысть молитвами Святаго

В лѣта 7149-го году обители сея святыя слуга нѣкий, имянемъ Димитрий зовомый Послужилцевъ, быв на монастырской службе, и на пути близ Нижняго Новагорода ятъ бысть от разбойникъ и веденъ бысть и с конемъ в чащу лѣса. Обнаживше же его, устремившась на убиение его, оружие свое наго держаше над главою его. Той же отчаявся своего живота, но[923] положив все свое упование на Всемогущаго десницу и воспомянув скорого помощника преподобнаго Сергия чюдотворца, глаголя всѣмъ во услышание: О великий Христовъ угодниче Сергие! помози и избави мя от горкия сея смерти! вѣм бо: аще хощеши, можеши мя избавити молитвами своими от напасти сея. И в мысли своей обѣщався ангельский образъ возложити на ся. Они же сташа яко изумлени, и оружия их испустися из рукъ их. Внезапу же, яко нѣцыи от Бога посланнии, явишася боголюбивии людие и, видѣвше я, устремившеся и крикнуша на них. Они же оставиша его и коня его, бѣжаща в чащу лѣса и по дебремъ пометаша вся, яже взяша. Той же спасенъ бысть заступлениемъ преподобнаго Сергия чюдотворца, спасъшаго его от лютыя смерти, и пришед во обитель его, повѣда настоятелю[924] сия, и восприемлетъ на ся по своему обѣщанию аггельскии образ. Наречен бысть Дионисий и пребысть до смерти живота своего, благодаря Святую Троицу и Пречистую Богородицу и преподобных чюдотворцев Сергия и Никона.

21. О падении полатъ