Житие Сергия Радонежского

41. О болярине князе Алексее Михайловиче Лвове, яко от болезни исцеление приемъ молитвами Святаго

Того же 160-го году июля в <…> день прииде в домъ Святыя Троицы помолитися, преподобнаго чюдотворца Сергия мощем поклонитися боляринъ князь Алексѣй Михайловичь Лвовъ, и по молебномъ пѣнии возвѣщаетъ архимариту и братии о чюдеси Сергия чюдотворца сице: Болѣзнующу ми, рече, предъ сими деньми не за много утробною немощию, яко и двигнутися ми не могущу, и во мнозе болѣзни воспомянувшу ми преподобнаго чюдотворца Сергия прежнюю к себѣ милость: таковым же болезнем двоекратное исцеление приемъ в прежнихлѣтех за много лѣтъ от сех мѣстъ, и властем тоя обители не возвѣстивъ. И о сем скорбящу ми и призывающу[946] ми святаго Сергия чюдотворца, прося помощи и облехчения болезнем, и егда; рече, от вас привезоша ми чюдотворца Сергия просвиру и меду чюдотворцова и воды новоявленного кладезя, и пѣвъ молебенъ чюдотворцу Сергию, причастился просвирѣ и меду и водою окропился, благодатию Божиею и молитвами святаго болѣзни моя облехчишась. И сего ради приидох во обитель святаго помолитись чюдотворцу Сергию и чюдотворнымъ его мощем поклонитись и о чюдесѣх его о прежних и о нынешнем возвѣстити, яко молитвами его трегубо исцеление болѣзнемъ своимъ приеми благодарю Бога и святаго Сергия, исцелевающаго мя.

42. О церковнике Иоакиме, иже от болезни исцелѣвъ молитвами Святаго

В лѣта 7160-го году бывшу ми ныне в Троицкомъ Киржатцком монастырѣ, иже под паствою того же болшого Сергиева монастыря, и повѣда мнѣ ту сущий строитель инокъ Нифонтъ, зовомый Кобылин, о чюдеси чюдотворца Сергия сице: Бысть, рече, у них церковникъ, именем Иоаким, одержим трясовицею, яко от весны до полулѣта протяжеся та болѣзнь в нынешнем лѣте, и среди монастыря поверзаяся и многое время лѣжав, едва аще кто помиловав отведетъ его до кѣлии. И тако болѣзновавше ему зелне, мнѣ же, рече, в то время желание наиде написати тропари храмом и мѣстным образом для приѣзжихъ богомольцов; обычай бо сия глаголати и поклонитися образом. Той же церковник Иоаким такому дѣлу искусенъ писецъ, но немощи его ради не глаголах ему о написании тропарей, мнѣвъ, яко оскорбится на мя болѣзни ради своея. И по мале времени идущу ми монастырем, ему же лежащу на земли, еле живу сущу, ах же рече ему от простоты сердечныя: вскую лежиши тако празден? иди, рече, и напиши тропари Богородицеи прочим храмом, иже во обители сей и мѣстным образом. И прирече ему от себѣ яко на глум, а не истинну: мнѣ, рече, явися инок боголѣпен и глагола ми: рцы ему, аще напишет тропари ты[и], будетъ здрав от болѣзни тоя. Он же, слышав от мене сия, вѣру ем и чудотворца Сергия нача призывати во устѣх своих, и надежду свою на него положив, с радостию начать писати. И молитвами святаго чюдотворца Сергия поможе ему Господь Богъ: написав на листы, и принесе в церковь и по чину к мѣстным свѣчам прилѣпив, яко да приходящии молитися сия тропари Господеви и Пречистой Богородице и святым Его угодником усты своими глаголютъ и милости просятъ. И в том часѣ молитвами преподобнаго чюдотворца Сергия болезнь ему та облехчись, и бысть здрав. Мы же, сияслышавше, благодарение воздахом Святей Троице и Пречистой Богородице и преподобному Сергию чюдотворцу, и в чюдесѣх Святаго и сия написахомъ.

43. О пожаре, иже молитвами Святаго угасе огнь

Нынѣшняго 161-го году по 7000-м лѣте писал ко мнѣ, келарю Симону, с Москвы князь Семен княжь Ивановъ сынъ Шаховской о чюдеси великаго чюдотворца Сергия сице: Случившуся на самый праздникъ его, сентября въ 25 день, в вотчине его пожару быти велику, и нѣцыи хоромы на его дворѣ огнемъ объятым бывшим, и вѣтръ велий потягаше на церковь Божию и на его хоромы. И огненныя пламы уже приближающеся, и во отчаянии всѣм бывшим и пособити множеством людей не возмогшим, той же князь Семен, воспомянувъ прежнее чюдо — не в долзе времени пред тем бывший пожар под стеною того самого обители Сергиевы на Воловом дворѣ, иже от образа его вѣтръ возвратися вспять и угасе огнь, и яко Богомъ наставляем, взем образ Сергия чюдотворца, иже у него, и ставъ противу огненнаго пламени и нача икосы говорити своего творения. И молитвами преподобнаго Сергия внезапу возвратися вѣтръ на горѣлое мѣсто и угасе огнь, и иже заста Сергиевым образом церковь и хоромы оставшая уцелѣвша от огня. Мы же, прочетше его рукописание, благодарение воздаша Святѣй Троице и Пречистой Богородице и преподобному Сергию, и повелѣхом написати сия, да незабвенна будут чюдеса преподобнаго чюдотворца.

44. О исцелении иерѣю праваго уха молитвами Святаго