Doktoro Jivago (Libro 1)

La reli iris de la treno til al staciono Rasvilye. Ol jacis en la avan-urbo Rasvilye sur altajo. De la reli duktis ruda ligna eskalero al staciono.

Hike trovesis granda tombeyo por lokomotivi. Olda lokomotivi sen tendri, kun kameni en la formo di taso o gambalo, stacis en la mezo di ruptita vagoni. Ica tombeyo hike e la tombeyo en la urbo, la olda fero sur la reli e la rustoza tekti e shildi montris imajo de vakuo e neglijegeso sub la blanka cielo, qua forbrulis per la suno.

JIVAGO konocis la sennombra shildi en Moskva e la fasadi. La skribo sur la hikala shildi montris tale granda literi, ke on povis lektar oli de la treno. La nebulo desaparis. Nur ankore poka restaji kovris la sinistra latero dil cielo en la esto. Ma nun oli separis su kam kurteno en teatro.

Sur monto, qua esis plu alta kam la avan-urbo, montreskis granda urbo, probable la centro dil distrikto. La disto facis la konturi simpla. Ol aspektis kam la monto Athos od oaziso en la dezerto, domo super domo e strado super strado.

Yuryatin! pensis JIVAGO. Ana Ivanovna e flegistino Antipova parolis ofte pri Yuryatin. Nun me vidas la urbo la unesma foyo. En ica momento la oficiri vidis subite omna ek la fenestro, e la mediko facis lo sama. On arestis plura personi sur la eskalero al staciono, inter li gimnaziano kun kapo-lezo. Sub la bandajo on vidis sango. La gimnaziano inter la amba soldati posedis bela vizajo ed esis ankore tre yuna. Lua kasqueto preske falis de la kapo. La amba soldati impedis to.

251

JIVAGO volis intervenar e parolar kun la yunulo o diskutar pri extera aspekti e vera formi. Il vidis latere. En la mezo dil vagono stacis Strelnikov, qua enirabis subite la loko per rapida ed energiala pazi. JIVAGO astonesis pri tala impozanta personaleso. Pro quo la vivo ne lasis rekontrar li plu frue? JIVAGO komprenis senfriste, ke ica viro esis la perfekta volpovo. Omno semblis existar en kompleta formo, la bela kapo, la longa gambi en la alta boti, la rapida pazo e la uniformo ek griza tuko. La gesti dil viro semblis naturala e sen posturo. Il esis viro, qua povis vivar en singla situeso sur la tero. Ica viro devis posedar la talento pri imitado. En ica tempo singlu imitis irga personaleso, heroi, generali, estri ek la populo o mem la propra kamaradi. Strelnikov ne montris, ke la prezenteso di JIVAGO konfuzigis lu. Kontree, il turnis su ad omni kun mieno, quale se JIVAGO esus membro en ica kompanio. Il dicis: „Ni povis forpulsar li. Li esas rusi kam ni, ma kun fola idei en kapo. E ni devas kuracar li. Lia chefo esis mea amiko, il venis ek proletariala familio. Il facis multa kozi por me e me esas en lua debo. Tamen me esas gaya, ke me povis forpulsar lu dop la rivero. Guryan, me bezonas komuniko. Me ne povas sendar mesajero. Kad esas varmega hike, kad ne? Oh yes..." Il turnis su al mediko ed examenis lu de la kapo til la pedi. La aresto repozis sur irga idiotajo. Kad il? pensis Strelnikov. No, nula simileso. Il ridis e dicis a doktoro JIVAGO: „Pardonez, kompano. Hike esas konfundeso. Mea soldati eroris. On prenis vu por altra persono. Vu esas libera. Ube esas la dokumenti dal kompano? Ah, hike.

252

Vu permisos poka regardo en la dokumenti... JIVAGO, doktoro JIVAGO... Memorigas pri Moskva... Me pregas vu, ka vu povas akompanar me por kurta momento? Mea vagono stacas apud ica vagono. Esos nur kurta por kurta tempo."

30

Quala homo esis ica viro? Quale il povis okupar tala poziciono kom ne-membro dil partiso? Nulu konocis lu. Pos la studio en Moskva, il esabis instruktisto en la provinco. Dum la milito on pensis il esus mortinta. La progresema fervoyisto Tiversin, Strelnikov vivis kom puerulo en ilua familio, garantiis por lu. La politikala estri fidis a Tiversin. En la tempo dal senmezura patoso e la maxim extrema opinioni, la revolucionala kredo da Strelnikov, sua fanatikeso, qua esis autentika e sincera, ne restis celita. Strelnikov pruvis en omna situesi sua politikala koncio. Lua agi esis fixita en servo-libro. Il agis kontre la rurani, qui rezistis la furnisado da nutrivi, il punisis la banditi, qui spoliis treno kun viktualii, il kombatis anke kontre la Rasin-soldati, qui provokis tumulto en la urbo Turkatui e kombatis lore en la Blanka Armeo. Omnaloke il venis kam nivo-tempesto, examenis, kondamnis e mortigis rapida, harda e sen kompato. Lua treno en la regiono finis la deserto en la trupi. La rekrutado experiencis nova organizado, ed omno divenis altre. Nova soldati venis en la Reda Armeo, on laboris kam en febro.

Kande la Blanka Armeo aparis ek la nordo, Strelnikov recevis nova operacala taski. Lua aktivesi esis sucesoza.

253