Истина Бытия Божия

Се же есть живот вечный, да знают Тебе единаго истиннаго Бога, и Егоже послал еси Иисус Христа (Ин. 17, 3).

Яко глаголы, ихже дал еси Мне: дах им: и тии прияша и разумеша воистинну, яко от Тебе изыдох, и вероваша яко Ты Мя послал еси (Ин. 17, 8).

Не молю, да возмеши их от мира, но да соблюдеши их от неприязни: От мира не суть, якоже (и) Аз от мира несмь: Святии их во истину Твою: слово Твое истина есть. Якоже Мене послал еси в мир, и Аз послах их в мир.

И за них Аз свящу Себе, да и тии будут священи во истину (Ин. 17, 15–19).

Рече же Ему Пилат: убо Царь ли еси Ты? Отвеща Иисус: ты глаголеши, яко Царь есмь Аз: Аз на сие родихся, и на сие приидох в мир, да свидетельствую истину: (и) всяк, иже есть от истины, послушает гласа Моего.

Глагола Ему Пилат: что есть истина? И сия рек, паки изыде ко иудеом и глагола им: аз ни единыя вины обретаю в Нем (Ин. 18, 37–38).

И видевый свидетельствова, и истинно свидетельство его, и той весть, яко истину глаголет, да вы веру имете:

Быша бо сия, да сбудется Писание: кость не сокрушится от Него (Ин. 19, 35–36).

Сей есть ученик свидетельствуй о сих, иже и написа сия: и вем, яко истинно есть свидетельство его (Ин. 21, 24).

Он же: не беснуюся, рече, державный Фи сте, но истины и целомудрия глаголы вещаю (Деян. 26, 25).

Восхотев бо породи нас словом истины, во еже быти нам начаток некий созданием Его (Иак. 1, 18).

Аще же зависть горьку имате и рвение в сердцах ваших, не хвалитеся, ни лжите на истину (Иак. 3, 14).

Братие, аще кто в вас заблудит от пути истины, и обратит кто его (Иак. 5, 19).

Души ваша очистивше в послушании истины духом, в братолюбие нелицемерно, от чиста сердца друг друга любите прилежно (1 Пет. 1, 22).

Сего ради не обленюся воспоминати присно вам о сих, аще и ведите и утверждени есте в настоящей истине (2 Пет. 1, 12).

И мнози последствуют их нечистотам, ихже ради путь истинный похулится (2 Пет. 2, 2).

Аще речем, яко общение имамы с ним, и во тьме ходим, лжем и не творим истины (1 Ин. 1, 6).

Аще речем, яко греха не имамы, себе прельщаем, и истины несть в нас (1 Ин. 1, 8).

Глаголяй, яко познах его, и заповеди его не соблюдает, ложь есть, и в сем истины несть (1 Ин. 2, 4).

Не писах вам, яко не весте истины, но яко весте ю и яко всяка лжа от истины несть (1 Ин. 2, 21).

Чадца моя, не любим словом ниже языком, но делом и истиною (1 Ин. 3, 18).

И о сем разумеем, яко от истины есмы, и пред ним смиряем сердца наша (1 Ин. 3, 19).

Мы от Бога есмы: иже знает Бога, послушает нас, и иже несть от Бога, не послушает нас. О сем познаваем духа истины и духа лестча (1 Ин. 4, 6).

Сей есть пришедый водою и кровию и Духом, Иисус Христос, не водою точию, но водою и кровию: и Дух есть свидетельствуяй, яко Дух есть истины (1 Ин. 5, 6).

Открывается бо гнев Божий с небесе на всякое нечестие и неправду человеков, содержащих истину в неправде (Рим. 1, 18).

Иже премениша истину Божию во лжу и почтоша и послужиша твари паче Творца, иже есть благословен во веки, аминь (Рим. 1, 25).

А иже по рвению противляются убо истине, повинуются же неправде, ярость и гнев (Рим. 2, 8).

Наказателя безумным, учителя младенцем, имуща образ разума и истины в законе (Рим. 2, 20).

Истину глаголю о Христе, не лгу, послушествующей ми совести моей Духом Святым (Рим. 9, 1).

Глаголю же Христа Иисуса служителя бывша обрезания по истине Божией, во еже утвердити обетования отцев (Рим. 15, 8).

Темже да празднуем не в квасе ветсе, ни в квасе злобы и лукавства, но в безквасиих чистоты и истины (1 Кор. 5, 8).

Не радуется о неправде, радуется же о истине (1 Кор. 13, 6).

Но отрекохомся тайных срама, не в лукавствии ходяще, ни льстяще словесе Божия, но явлением истины представляюще себе ко всяцей совести человечестей пред Богом (2 Кор. 4, 2).

Да служение безпорочно будет:

Но во всем представляюще себе якоже Божия слуги, в терпении мнозе, в скорбех, в бедах, в теснотах В ранах, в темницах, в нестроениих, в трудех, во бдениих, в пощениих.

Во очищении, в разуме, в долготерпении, в благости, в Духе святе, в любви нелицемерне,

В словеси истины, в силе Божией, оружии правды десными и шуими (2 Кор. 6, 3–7).

Ничтоже бо можем на истину, но по истине (2 Кор. 13, 8).

Имже ни к часу повинухомся в покорение, да истина благовестия пребудет в вас (Гал. 2, 5).

О, несмысленнии галате, кто вы прельстил есть не покоритися истине, имже пред очима Иисус Христос преднаписана бысть в вас распят (Гал. 3, 1).