Изборник. Памятники литературы Древней Руси

Бывши же ей шести летъ, и умре мати ея, и поятъ ю к себе в пределы Муромския бабка, матери ея мати, вдова Настасия, Никифорова дочь Дубенскаго, и воспитающе во всякомъ благоверии и чистоте 6 же летъ. И умре баба ея, и по заповеди ея поят ю к себе тетка ея Наталия, Путилова жена Арапова. Сия блаженная Ульяния, от младыхъ ногтей бога возлюбив и пречистую его матерь, помногу чтяше тетку свою и дщери ея, и имея во всем послушание и смирение, и молитве и посту прилежаше. И того ради от тетки много сварима бе,[1487] и от дщерей ея посмехаема. И глаголаху ей: «О, безумная! что в толицей младости плоть свою изнуряеши, и красоту девьственую погубишь». И нуждаху ю рано ясти и пити; она же не вдаяшеся воли ихъ, но все со благодарением приимаше и с молчаниемъ отхождаше: послушание имея ко всякому человеку. Бе бо измлада кротка и молчалива, небуява[1488] и невеличава, от смеха и всякия игры отгребашеся. Аще и многажды на игры и на песни пустошныя от сверстницъ нудима бе, она же не приставаше к совету их и недоумение на ся возлагая,[1489] и тем потаити хотя своя добродетели к богу. Точию в предивеномъ и пяличном деле[1490] прилежание велие имяше, и не угасаше свеща ея вся нощи. А иже сироты и вдовы немощный в веси той бяху, и всех обшиваше и всехъ нужных[1491] и болных всяцем добром назираше, яко всем дивитися разуму ея и благоверию; и вселися в ню страхъ божий. Не бе бо в той веси церкви близ, но яко два поприща; и не лучися ей въ девичестем возрасте в церковь приходити, ни слышати словесъ божиих почитаемых, ни учителя учаща на спасение николи же; но смысломъ благимъ наставляема нраву добродетельному.

Егда же достиже 16 летъ, вдана бысть мужу добродетелну и богату, именем Георгию, порекломъ Осорьинъ, и веньчани быша от сущаго ту попа, именем Потапия, в церкви праведнаго Лазаря, в селе мужа ея. Сей поучи ихъ по правиломъ святымъ закону божию; она же послуша учения и наказания[1492] внятно и деломъ исполняше. Еще бо свекру и свекрови ея в животе сущимъ; иже видевъше ю возрастомъ и всею добротою исполнену и разумну, и повелеста ей все домовное строение[1493] правити. Она же со смирениемъ послушание имяше к нимъ, ни в чем не ослушася, ни вопреки глагола, но почиташе я[1494] и вся повеленная ими непреткновенно[1495] соверьшааше, яко всемъ дивитися о ней. И многимъ искушающимъ ю в речах и во ответехъ, она же ко всякому вопросу благочиненъ и смысленъ ответъ даяше; и вси дивляхуся разуму ея и славяху бога. По вся же вечеры довольно богу моляшеся и коленопреклонения по 100 и множае, и, воставая рано, по вся утра такоже творяше и с мужем своим.

Егда же мужу ея на царьскихъ служьбахъ бывающу лето или два, иногда же и по 3 лета в Астарахани, она же в та времена по вся нощи без сна пребываше, в молбах и в рукоделии, и в прядиве, и в пяличном деле. И то продавъ, нищимъ цену[1496] даяше и на церковное строение; многу же милостыню отаи творяше в нощи, в день же домовное строение правяще. Вдовами и сиротами, аки истовая мати, печашеся, своима рукама омываше, и кормяше, и напаяя. И рабы же и рабыня удовляше[1497] пищею и одеждею, и дело по силе налагаше, и никого же простымъ именем не зваше, и не требоваше воды ей на омовение рукъ подающаго, ни сапог разрешающа,[1498] но все сама собою творяше. А неразумныя рабы и рабыня смирением и кротостию наказуя, и исправляше, и на ся вину возлагаше; и никого же оклеветаше, но всю надежу на бога и на пречистую возлагаше и великого чюдотворца Николу на помощь призываше, от него же помощь приимаше.

Во едину же нощь воставъ на молитву по обычаю, без мужа. Беси же страхъ и ужасъ напущаху ей великъ. Она же, млада еще и неискусна, тому убояся и ляже спати на постели и усну крепко. И виде многи беси, пришедше же на ню со оружиемъ, хотяще ю убити, рекуще: «Аще не престанешь от таковаго начинания, абие погубимъ тя!» Она же помолися богу, и пречистой богородицы, и святому Николе чюдотворцу. И явися ей святый Никола, держа книгу велику, и разгна бесы, яко дым бо исчезоша. И воздвигъ десницу свою, и благослови ю: «Дщи моя, мужайся и крепися, и не бойся бесовскаго прещения:[1499] Христос бо мне повеле тя соблюдати от бесовъ и злых человекъ!» Она же, абие от сна возбнувъ,[1500] и виде мужа свята яве, из храмины дверми изшедша скоро, аки молнию. И востав скоро, иде во след его, и абие невидим бысть: но и притворъ[1501] храмины тоя крепко запертъ бяше. Она же оттоле, извещение приимъши, возрадовася, славя бога, и паче перваго добрыхъ делъ прилежа.