Избранные сочинения

Внегда торжество нѣкое свѣтлорадостное славным мира совершати, обычай имут и устными знамения того изъявляти органы, ово друг другу привѣтство дѣюще усердное, ово радостнѣ восклицающе, и орудийными свѣтлая радостно играти. Тако бысть во Иизраили ветхом, егда благочестиваго царя Давида любезнѣйшее чадо Соломон на царствие от иерея помазан бяше;[3] се бо священное глаголет Писание: „И взят Садок иерей рог с еллем от скинии и помаза Соломона. И возтрубиша рогом, и рѣша вси людие: живет царь Соломон!“. Егда вострубиша рогом, орудийным гласом новую радость возвѣстиша людем. Внегда возклицаху: „Живет царь Соломон!“ — устным привѣтством произъявляху веселие сердца и благожелание воцарившемуся Соломону. Подобное дѣйство и в день рождения плотскаго царя всея твари обрѣтаем: ибо Христу господу, плотию рождьшуся на земли, и словесное небесныя силы славословие воспѣваху, восклицающе: Слава во вышних богу и на земли мир, во человѣцѣх благоволение! — и орудийными цѣвницами, мусикийскими пищалми пастырие свиряху, аки миру всему и друг другу радости новыя о рождшемся спасѣ мира привѣтствующе. Не точию же в подсолнечнѣй юдоли сицево дѣйство обрѣтаемо есть, но и во выше солнечном емпирийстем градѣ тожде содѣваемо усмотрѣ высокопарный и быстро видящий орел, святый тезоименник благодати:[4] ибо егда видѣ ангнца приемша книгу от десницы сѣдяща на престолѣ, абие четыре животная и двадесят и четыри старцы падоша пред агнцем, имуще кождо гусли и фиалы златы, полны фимиама, яже суть молитвы святых; и пѣша пѣснь нову. Се и устно во день свѣтлости пояху и гусльми играху: не бездѣлно бо в руках си держаша я. Аще сице в небеси, аще тако во Церкви торжествующей, достойно убо и праведно нам, сущим на земли, во Церкви ратующей, подражати небесныя гражданы и в день радости настоящия и гласы преподобными восклицати привѣтственная, и орудии мусиикийскими играти ликовственная. Космицы убо да ликовствуют космическо. Аз же, старец грѣшный, тщася подражатель быти онѣх старцев святых, земный небесных, егда твою царскую пресвѣтлость вижду агнца за кротость, агнца за незлобие, агнца ко своим подданым; даст же господь лва крѣпка и страшна врагом, брани хотящым; егда ти вижду от первопрестолника церкве, от святѣйшаго и всеблаженнейшаго великаго господина кир Иоакима патриарха Московскаго и всея России, вся царская знамения приемша и тѣми велѣлѣпно, ибо царски, сияюща: пад лицем на землю, главу мою под нозѣ ти преклоняю, чая не попраннѣй ей быти, но яко смиреннѣй вознестися, — и ваше бо царско, еже божие, свойство гордыя смиряти, смиренныя же возносити, — и ожидая не отриновения яростнаго, но златаго ти скипетра на ню во знамение милости возложения, яко же великий царь Артаксеркс обычай имѣ творити. Имам же в руках моих гусль и фиалу в персѣх. Фиалу убо сердца — вещию плотяну, но рачителством чистозлату. Туже исполненну фимиама молитв прилѣжных и желаний всеблагих: ибо, желая, молюся и, моляся, желаю, да жезл силы послет ти господь от Сиона и господствуеши посредѣ врагов твоих. Молюся, да речет о тебѣ господь, еже о Давидѣ:[5] Обрѣтох Феодора, раба моего, елеем святым моим помазах его. Ибо рука моя заступит его, и мышца моя укрѣпит его. Ничтоже успѣет враг на него, и сын беззакония не приложит озлобити его. Изсѣку от лица его враги его и ненавидящыя его побѣжду. И истинна моя и милость моя с ним, и о имени моем вознесется рог его. И положу на мори руку его и на рѣках десницу его. Той призовет мя: Отец мой еси ты, бог мой и заступник спасения моего! И аз первенца положу его, высока паче царей земных, во вѣк сохраню ему милость мою, и завѣт мой вѣрен ему. И положу во вѣк вѣка сѣмя его и престол его, — яко дние неба. Желаю, да благоденствен живеши на престолѣ твоем царстем, благочестия во разширение, славы божия во умножение, добродѣтелей христианских в насаждение, всяких же злодѣяний во искоренение. Желаю, да яко Тиверию, древле во ветсѣ Римѣ воцарившуся, путь нѣкий бывый на странѣ шуией, прейде на десную, по свѣдѣлству историописателя Плиния, — тако во время царствования твоего блаженнѣйшаго даст десница божия, еже шуим путем всяческих дѣяний преити в десная, преложитися в правая. Да тако истинствуется велегласным прореченное пророком: И будет все кривое в правое и остроавое в пути гладки. Желаю, да будеши церкви вторый Констянтин или новый Владимир царствию, да будеши силою Александр Великий, добротою Тит римский, кротостию Давид, мудростию Соломон, благочестием Езекия, промыслом Иосиф, сирым же отец, вдовицам заступник, обидимым свобода, обидящим отмщение, — сокрощеннѣ да реку: всѣм да будеши вся, да вся всѣх господеви приобрящеши и тебѣ самому. Молю паки царя царствующих и господа господствующих, да вездѣ сый существом, присутствием и силою в тебѣ ис тобою будет благодатию. Да присущствует правлению ти, судом твоим, совѣтом твоим, начинанием твоим, дѣлом твоим, промыслом твоим, войнам твоим и миру твоему. Да возвеселится Израиль новый (царство Российское) о сотворшем его и сынове Сиона Московскаго да возрадуются о тебѣ, царѣ своем, и да восхвалят имя его в лицѣ и тимпанѣ, и во псалтыри да поют ему. Сицевыми молитвы и желании нося фиалу сердца исполненну, пою твоей пресвѣтлости пѣснь нову, нововоцарившемуся монарсѣ благопривѣтствия и несу гусль духовную в руках моих, доброгласну зело, ибо благая ти звяцающую, желания убо всѣх санов и чинов державы твоея благочестивыя и привѣтства усердная твоему пресвѣтлому царскому величеству о божественном главы твоея увѣнчании и о прочих знамениих царскому лицу твоему приличнодостойных поющую, ея же сладостию да возвеселиши сердце твое, да возрадуеши душу ти праведную, да утѣшишися чювствы твоими царскими. Благоволи гусль сию духовную от мужа духовна царскою ти рукою из рук богомолца твоего возприяти милостивно, ни за худость вещества внѣшняго отрѣвая, ниже за малость искуства моего в художествѣ пиитичестем презирая, но по своей царстей милости благоутробен являяся и пресвѣтлыя зѣницы сердца твоего обращая на рачителство. Удостой гусль сию прикосновения всечестную руку твоею, видѣния пресвѣтлую очию твоею и приклонения на глас ея ушию ти царскую. Мене же, смиреннѣйшаго богомолца своего, лобзания щедродаровитыя десницы ти любезнаго сподобити изволи, иже пресвѣтлаго твоего царскаго величества призрѣнию, милости и благодати со усердием моим и с недостойными иеромонашескими молбами всесмиренно вручаюся.