Избранные сочинения

1

Святѣйшего и всеблаженнѣйшаго великаго господина кир Иоакима патриарха Московскаго и всея России

ЖЕЛАНИЕ

Да благословит тя господь от Сиона

на высокочестнѣм мѣсте царя фрона,
Да благоволит же вѣнчанную главу
40 на премнога лѣта соблюдати здраву
И да не престанет на ню изливати
по вся дни своея даров благодати.

2

Благовѣрныя и христолюбивыя государыни царицы и великия княгини Наталии Кириловны

ЖЕЛАНИЕ

Яже содержит божия десница

благая людем, всѣх тебѣ царица
45 И мати твоя усердно желает,
молбы о тебѣ к богу возсылает.
Да царствуеши на многая лѣта
во свѣтлых зарях превѣчнаго свѣта.

3

Благороднаго и благовѣрнаго государя царевича и великаго князя Иоанна Алексиевича

ЖЕЛАНИЕ

Иоан имя благодать являет,

50 тоя ти брат твой от бога желает.
Да тою душа ти будет живленна
и рука царска выну укрѣплѣнна
Скипетр держати вѣрных в правление,
на супостаты мечь во отмщение.

4

Благороднаго и благовѣрнаго государя царевича и великаго князя-Петра Алексиевича

ЖЕЛАНИЕ

55 Петр имя камене толком знаменает,

камен же твердость собою являет.
Петр убо, брат твой, тверду тебѣ быти,
непозыблему на престолѣ жити
Радостно хощет и да побѣдиши
60 вся Голиафы, егда я узриши.

5

Благородныя и благовѣрныя царевны и великия княжны Ирины Михайловны

ЖЕЛАНИЕ

Ирина мирная имать сказание;

от Ирины тебѣ сие жалание,
Да мир во державѣ твоей водворится,
да кождо о своих благих веселится,
65 Да мечы на рала будут прекованы,
сулицы на серпы будут предѣланы.

6

Благовѣрныя и благородныя царевны и великия княжны Анны Михайловны

ЖЕЛАНИЕ

Анна во имени своем радость носит;

радости царевна Анна тебѣ просит
От всещедра бога. Да радость отвсюду
70 тебѣ ся приносит, печаль ниоткуду.
От всѣх твоих предѣл да есть веселие,
яко бѣ в дни царя Августа велие.

7

Благовѣрныя и благородныя царевны и великия княжны Татианы Михайловны

ЖЕЛАНИЕ

Повелителница толк есть Татианы;

повелителства ти, царю богом данны,
75 Пресвѣтла царевна усердно желает,
да твой странным царствам жезл повелѣвает;
Правлению его да ся покаряют,
иже за пространным морем обитают.

8

Благородныя и благовѣрныя царевны и великия княжны Евдокии Алексиевны

ЖЕЛАНИЕ

Евдокии толк есть благоволение;

во тоя к тебѣ, царю, доброхотѣние
Есть, да благих правых всѣх ся насытиши,
желаний сердца ти да ся не лишиши.
И да благоволит бог всещедрый в тебѣ,
по временном царствѣ даст и вѣчно в небѣ.

9

Благородныя и благовѣрныя царевны и великия княжны Марфы Алексиевны

ЖЕЛАНИЕ

85 Марфа сказанием есть попечение;

Марфы убо тебѣ сие хотѣние:
Да господь всещедрый печется тобою,
управляя путь твой своею рукою,
И в попечениих твоих да поможет,
90 иже все что хощет преудобно может.

10

Благородныя и благовѣрныя царевны и великия княжны Софии Алексиевны

ЖЕЛАНИЕ

Имя София мудрость знаменает;

София сестра мудрости желает
Главѣ ти царстей, да мудро правиши
данное царство и вся свѣтло зриши,
95 Яже во оном добрѣ знати требѣ,
Первосудии всѣх дѣл сущу тебѣ.

11

Благородныя и благовѣрныя царевны и великия княжны Екатерины Алексиевны

ЖЕЛАНИЕ

Екатерина надежду являет,

истинну купно таже знаменает;
Надежды она молит ти у бога
100 и да истинна возсияет многа
В дни царствия ти, за ню же на небѣ
вѣнец нетлѣнный господь воздаст тебѣ.

12

Благородныя и благовѣрныя царевны и великия княжны Марии Алексиевны

ЖЕЛАНИЕ

Мария тожде есть, что владущая:

сестра хощет ти под солнцем сущая
105 Имѣти власти, да вся приведеши
ко Христу богу, души их спасеши.
Да Владимиру точен ся явиши,
многия роды вѣрны сотвориши.

13

Благородныя и благовѣрныя царевны и великия княжны Феодосии Алексиевны

ЖЕЛАНИЕ

Феодосии имя си толкует —

110 богоданная: таже усердствует
Богом данному царю ти нашему,
да подаст господь скипетру твоему
Вся управляти, яже обливает
окиан роды, и неба желает.

14

Благородныя и благовѣрныя царевны и великия княжны Наталии Алексиевны

ЖЕЛАНИЕ

120 Имя Наталиа есть день рождения;

сия желает тебѣ владѣния
Вездѣ, гдѣ нужда есть от рождения
водою духом, богу въсынения;
Сих же множество родов безчисленно,
125 до конец земли в мирѣ разширенно.

15

Благородныя и благовѣрные царевны и великия княжны Феодоры Алексиевны

ЖЕЛАНИЕ

Что Феодора сестра ти желает,

царю пресвѣтлый, имя изъявляет;
Седмочислием писмен заключенных,
седми ти хочет даров божественных.
130 Да тѣми будет душа исполненна,
царства держава всечинно строенна.

16

Преосвященных митрополитов, архиепископов и боголюбивых епископов

ЖЕЛАНИЕ

Архиереи богу служащии,

жертву безкровну ему носящии,
Вси ти всѣх благих усердно желают,
135 молбы о тебѣ выну возсылают
Ко богу щедру, да изволит дати
здраво, щасливо тебѣ царствовати.

17

Всего пресвѣтлаго сигклита

ЖЕЛАНИЕ

Сигклит твой царский, свѣтлая полата,

не ищет богатств, бисерей и злата
140 Тако, яко же царстей ти свѣтлости
желает тощно здравия цѣлости.
Занеже кождо готов умирати
за тя, всѣх главу, главу полагати.

18

Преподобносвященных архимандритов, священнопреподобных игуменов, священных протопопов и всего священническаго, диаконскаго, иноческаго чина и всего причта церковнаго

ЖЕЛАНИЕ

Лик преподобных отец ти желает

145 и кождо, иже в церкви ся труждает,
Да яко солнце на небѣ свѣтиши,
мрак невѣрия в мирѣ истребиши
И вся ереси, вѣру же святую
распространиши во страну всякую.

19

Благочестивых князей и боляр и всего христолюбиваго воинства

ЖЕЛАНИЕ

150 Кто видѣ, како пчелы матери радѣют,

вся ея правителством во ульи си дѣют,
За ню, яко за царя, главы полагают;
тако сии за тебе готови бывают
На вся бѣдства и на смерть; желают же тебѣ
155 и в мирѣ царствовати и в премирном небѣ.

20

Всѣх православных христиан

ЖЕЛАНИЕ

Любезная вещь: солнце яко освѣщает

и теплотою в мирѣ плоды содѣвает.
Ты православных солнце за точная дѣла,
тѣмже вси тя желаем здрава, славна, цѣла,
160 Свѣтла, побѣдоносна всегда созерцати,
дондеже господь даст ти миром обладати.

ЗАКЛЮЧЕНИЕ

Буди же обладатель чрез время толико,

в подложенней скрижали возможно елико
Многа лѣта считати многими премѣны,
165 от среды на вся страны будиж без измѣны.