Книга 3. Письма. Творения гимнографические. Эпиграммы. Слова

Крестобогородичен: Вознесена на Древе яко виде, рождшая Тя Мати кроме болезней, и рыдаше с плачем, и взываше: увы Мне сладчайший Сыне, уязвляюся ныне душею, на Кресте зрящи Тя, посреде двою злодею, аки злодея пригвождаема.

Трипеснец. Глас 5

Песнь 5

Ирмос: От нощи покланяющияся Тебе Христе помилуй и мир даруй: зане свет повеления Твоя, быша исцеления рабом Твоим Человеколюбче.

Ты распенся тления избавляеши мя, и прободен быв обезсмертствуеши мя: славлю Твою неизреченную милость, яко пришел еси Христе, да спасеши мя.

На Кресте простер длани Твоя, мысленнаго Амалика убил еси, люди Твоя спасаяй Господи. Сего ради поем державу Твою.

Троичен: В трех Лицах Божество, едино начало всепресущное, воспоим Отца безначальнаго, и Сына, и Духа Святаго.

Богородичен: Егоже небо вместити не можаше, Ты во чреве заченши родила еси. О страннаго и неизреченнаго чудесе! Темже Тя вси поем Пречистая.

Мене ради претерпевый распятие, оцет пивый, и рекий: совершишася! (Ин. 19:30) соверши мое постное поприще, удостояя мя видети Твое востание.

Песнь 8

Ирмос: Творца твари, Егоже ужасаются Ангели, пойте людие, и превозносите во вся веки.

Древо всесвятое, на немже Ты Христе мой распялся еси, поя преблагословлю Тя во вся веки.

На Голгофе, беззаконнии Тя Христе, распенше убиша; но живеши, и спасаеши нас во веки.

Троичен: Страннолепно разделяется Троица, и пребывает нераздельна, яко Бог, Егоже превозносим во вся веки.

Богородичен: Молитву сотвори о поющих Тя Пречистая, избавитися всяких искушений и бед.

Креста Твоего Господи, силою вжилив мя, сподоби благодушно скончати поста течение.

Песнь 9

Ирмос: Исаие ликуй, Дева име во чреве и роди Сына Еммануила, Бога же и Человека, Восток имя Ему; Егоже величающе, Деву ублажаем.

Паки рай отверзаеши единою распенся, в немже причащаяся жизни радуюся, смерти избавляяся вечныя преслушания; темже Человеколюбче, яко Бога моего величаю Тя.

Клятвы орган, благословения показася печать, Твой животворный Господи Крест, на немже Тя взирающе, оживляемся умершии прежде, и воспевающе Тя, яко Владыку величаем.

Троичен: Едину Существом воспеваю Тя безначальная Троице честная, живоначальная, несекомая Единице, Отче нерожденный, и рожденный Слове и Сыне, Душе Святый, спаси ны поющия Тя.

Богородичен: Паче ума Рождество Твое Богомати, без мужа бо зачатие в Тебе, и девственно рождение бысть, ибо Бог есть рождейся; Егоже величающе, Тя Дево ублажаем.

Кресте честный, крепосте моя и прибежище, буди ми просвещение ныне воздержательно, веселя и очищая мя, избавляя от искушений: да прославляя тебе, Владыку величаю Христа.

В субботу второй седмицы

Четверопеснец. Глас 3

Песнь 6

Ирмос: Глубина страстей воста на мя, и буря противных ветров; но предварив мя Ты спаси Спасе, и избави от тли, яко спасл еси от зверя пророка (Дан. 6:22).

Мучеников память совершаем божественно мучениколюбцы, приидите возрадуемся, песньми тыя венчающе, подвигоположника Христа благословим.

Ран первее искус приемше, потом же камением побиени бывше, претрени бывше (Евр. 11:37), зверем на снедь дани бысте, и заклани бысте яко агнцы Христовы; но живете присно страстотерпцы.

Троичен: Три единым Естеством совокупляя, едино же треми разсекая Лицы, яже Божество есть; Савеллиа же и Ариа, равномерныя стремнины отбегаю.

Богородичен: Дева явилася еси и по рождестве, чистотствуеши во обою, и раждаеши: страннолепное видение, глаголемое и разумеваемое, содеянное в Тебе Богомати.

Мученичен: Кровь вашего терпения, Господу молится непрестанно о нас, мученицы; темже и ныне помолитеся поститися нам от страстей безчестия.

Мертвен: Всему хотяй судити миру, предстоящим тьмам Ангелов (ср. Дан. 7:10), неосужденно тогда предстати Тебе сподоби усопшия, верно Всещедрый.

Песнь 7

Ирмос: Пламень оросивый пещный и отроки неопалимы спасый, благословен еси во веки, Господи Боже отец наших.

Огнь, и меч, и звери, страстотерпцы, яко сладость вменивше, внегда страдати удивисте убийцы ваша, воспевающе Бога отец наших.

На уды разсекаеми, и опаляеми, Богу принесостеся жертва благовонная, Христовы мученицы; но Того о нас присно молите.

Троичен: В Троице единаго Бога славлю, Отца, Сына и Духа: Единицу простую, Троицу честную, начало предначальное и единосущное.

Богородичен: Всесвятая Владычице Богородице, молитвы рабов Твоих приемлющи, принеси всех Богу, да спасет нас от всякаго искушения.

Мученичен: Мучеников собори, с небесе представше, вас воспевающия благословите, освятите, усердно постов время скончати.

Мертвен: Верою к Тебе преставльшияся, ведый дела человеков, вольная и невольная прегрешения прощая, упокой яко Бог.

Песнь 8

Ирмос: Из безначальнаго Отца рожденнаго прежде век Бога, и в последняя от Богородицы в плоть облекшася, яко совершенна Человека и Бога истинна, пойте, благословите и превозносите во вся веки.